Boas umpobaine Rut
4:1-17
4
Landa'i Boas, iya le'ba'um lako ba'bana kotaa anna muokko'i dio. Pissananna, liu siaham duka' indo to nauaam Boas la sipäto' puha mahhuhu'. Iya nauaammi Boas: “Lempä säkäko, solasubum. Okko'ko eta inde!” Iya lempäm duka', anna muokko'i. 2 Mane untambai sapulo matua ulunna indo kota Boas anna nauaanni: “Okko'koa' eta inde.” Iya muokko'im duka'. 3 Iya ma'kadam Boas lako indo to la sipäto' puha mahhuhu' naua: “Indo litä'na solasubunta to mate Elimelekh, maelo' la nabalu' Naomi tappana ma'pasule dio mai Moab. 4 Dadi, kuua pahallu la kutulasangko kaha-kaha ia too. Maka' maelo'ko mentopehuhu'na indo litä', iya huhu'i nasa'bii inde mai to tadongkom, anna nasa'bii matua ulunna inde bottota. Sapo' maka' mokako la uhhuhu'i, iya tulasannä' angku issanni aka tä' deem tau senga' la mala uhhuhu'i sulibanna iko, anna lesuko too, iya kaom.” Natimba' indo tau naua: “Kao mentopehuhu'na.” 5 Iya nauam Boas: “Io. Sapo' maka' too muallii indo litä' lako Naomi, iya la umpasialapi duka' Rut, indo baine to Moab, balunna to mate Mahlon, anna mala deem pessubunna ullombunganni mana'na.” 6 Iya natimba'im indo to la sipäto' puha mahhuhu' naua: “Maka' susi, iya mokaä' la uhhuhu'i aka la nahoho pamenta kulle mammi'ku.b La ikom tia uhhuhu'i moi anna kao la sipäto' puha uhhuhu'i aka mokaä' kao.”7 Susi inde kabiasaam dio Israel yolona diona lalanna mahhuhu' anna sipalendu': Maka' deem dua tau la umpahatta' kasipalakoanna, iya mesa si untässu'i sandala'na sabali anna nabeenni indo solana. Susim too lalanna tau dio Israel umpahatta' kasipalakoanna.
8 Mane nauai indo tau lako Boas: “Ikom too allii.” Anna mane untässu'i sandala'na. 9 Iya ma'kadam Boas lako indo matua ulunna kota sola ingganna to dio heem eta too naua: “Allo temo ikonna' too titanam sa'bi muua: ‘Naalli asammi Boas ampuanna to mate Elimelekh, Kilyon anna Mahlon lako Naomi.’ 10 Susi toi duka' Rut, indo baine to Moab, balunna to mate Mahlon, la kuala kupobaine, anna mala da'da' liu sanganna to mate Mahlon, anna deem ullombunganni mana'na. Nasuhum tä' pa'de sanganna illaam alla'-alla'na kasahapuanna anna ingganna tau illaam kota. Ikonna' too titanam sa'bi inde allo temo.” 11 Iya ingganna to dio heem dio ba'bana kota eta too sola ingganna matua ulunna kota ma'kada naua: “Io, kami' titanam sa'bi. La natamba' di too DEBATA itim baine to la umpangngissi banuammu umba susi Rahel sola Lea, aka iam too indo dua baine naongei membea' pessubunna Israel. La mempokom dako too tassaju' mengngette' tambalala untadongkonni Efrata, anna la kaleleam di too sangammu dio Betlehem. 12 Indo änä' la manasangko DEBATA muolai itim to balu baine mangnguha, la susi hi too pessubunna Peres änä'na Yehuda nasibalii Tamar.c”
13 Puhai, iya mualam Rut Boas anna napobainei. Iya solam metindo, lambi' sola pa'mana'Na DEBATA kebättä Rut, iya undadiammi mesa änä' muane-ane. 14 Iya ma'kadam buda baine lako Naomi naua: “Dipuji dipa'kasallei DEBATA, tä'ko napabäi bäbä inde allo temo la pa'de uhhuhu'ko. La kaleleam di too sanganna itim änä'-änä' illaam Israel. 15 Iam too la umpasuleangko sumanga'mu, anna iam too la umpaliahako ke illaammoko kamatuaam, aka nadadiangammoko manintummu to umpakamäjjäko, keangga' puha ia anna la pitu änä' muane.” 16 Iya naalam Naomi indo änä'-änä' anna naabinni. Naomi si umpaliahai indo änä'-änä'. 17 Ingganna baine sambanuanna Naomi ussangai indo änä'-änä' napasindum ma'kada naua: “Didadiangammi Naomi mesa änä' muane-ane.” Sikanasangai Obed.d Obed-um too ambena Isai, anna Isai, ambena Daud.
Kalohonganna Daud
4:18-22
18 Indem ia pessubunna Peres: Keänä' Peres undadiam Hezron, 19 keänä' Hezron undadiam Ram, keänä' Ram undadiam Aminadab, 20 keänä' Aminadab undadiam Nahason, keänä' Nahason undadiam Salmon, 21 keänä' Salmon undadiam Boas, keänä' Boas undadiam Obed, 22 keänä' Obed undadiam Isai, keänä' Isai undadiam Daud.