Ḅaruwa ya d̯ura ya Paulo kwa
TIMOTEO
Ndwahiyo
Hii ni ḅaruwa ya d̯ura yorejweyo ni Paulo kwa Timoteo chima cha mwaka wa 64 ḅaad̯a ya kudza kwa Yesu Kirist̯o. Timoteo ewa ni Mukirist̯o mwana jwa kuyawa ḍyimbo ḍya Asia ndoḍo. Nina ewa Muyahud̯i na ise ewa Muyunani. Paulo ewa kamutsaka Timoteo muno dza mwanawe jwa kiruhu, na ekimuyongweeza namuna ya kuihenda hi kazi ya Muungu.
Paulo kamworea Timoteo hi hii ḅaruwa ili apate kumumpa maghaghisa dzuu ya kuyasumamia matsanganiko. Kamuyanga t̯aḅia ya wayongozi na wahumisi wa matsanganiko weyonamala kuwa nayo. Na pia Paulo kamuyanga Timoteo jeje mwenye namuna ya kuwa muhumisi mwema jwa Yesu Kirist̯o, na muzigo eo nao kwa vit̯aro garagara vya wahikiza. Haya mafunda yeyonamuhusu Timoteo jeje mwenye hunayapata kwa hivi viḍinku hivi: 1:18-20; 4:6-16; 5:21-23; 6:11-16 na 6:20-21.
Na kawii Paulo kora hi hii ḅaruwa ili aweze kuyabusa mayongweezo ya nsuwe yanjiiyeyo matsanganikoni. Kwa mufaano, wantu wangine wekiyongweeza kwamba muntu anaweza kupfonywa kwa njia ya kutsaaḍya vyakuḍya visiku ambu kwa njia ya kutsahwaa muke (4:3). Ela Paulo kayabusa vyumuni haya haya mayongweezo ya nsuwe na kamwamba Timoteo adzit̯unze nayo. Kayongweeza kwamba Wakirist̯o ni wamanye ya kwamba kuna Muungu mumodza t̯u. Na ni wamanye ya kwamba, Kirist̯o Yesu ndiye jeje heket̯u eyenaweza kuhupfiika kwa Muungu (2:5).
Yeyo humu ḅaruwani kwa ufufi
Kedhya 1:1-2
Kudzit̯unza na mayongweezo ya nsuwe 1:3-11
T̯ei ya Muungu kwa Paulo 1:12-17
Maana ya Paulo oreeyo haya maghaghisa kwa Timoteo 1:18-20
Mayongweezo dzuu ya mayombo 2:1-15
Wayongozi na wahumisi wa matsanganiko wevyonamala kuwa 3:1-13
Ngadzi ya faro ya Kikirist̯o 3:14-16
Mayongweezo ya nsuwe yadzeyokudza nsiku za mwiso 4:1-5
Namuna ya kudzit̯unza na haya mayongweezo ya nsuwe 4:6-16
Namuna ya kuḍit̯ikisa hiḍi tsanganiko 5:1-6:2
Jabva wa Ukirist̯o 6:3-10
Maghaghisa dzuu ya maisha ya Kikirist̯o 6:11-21