Ḅaruwa ya pfii ya Paulo kwa
TIMOTEO
Ndwahiyo
Hii ni ḅaruwa ya pfii ya Paulo oreeyo kwa Timoteo chima cha mwaka wa 67 ambu 68 ḅaad̯a ya kudza kwa Ḅwana Yesu. Wasomi wenji wahikiza kwamba ndiyo ḅaruwa ya mwiso oreeyo kaḅila nkadzafwa. Vikaa dza kwamba Paulo ewa kadzihambuya kwamba njwakufwa, ndookomu kora hi hii ḅaruwa kwa Timoteo ili aweze kumungiza mojo dzuu ya kuihenda hi kazi ya Muungu. Chuuwo muhimu cha hi ḅaruwa ni kuit̯isa. Paulo kakumufundani Timoteo namuna ya kuwa asikari mwema jwa Kirist̯o Yesu na adziyongweeze kuit̯isa mad̯inani (2 Tim 2:1, 3).
Paulo kakumuimusyani Timoteo adzit̯unze na mayongweezo ya nsuwe. Koro wangine wadzihaniyeo wanafund̯i wa Ḅwana wewa wesakugizwa ni Shaat̯ani. Ndookomu kakumukanyani Timoteo adzit̯unze na haya maḍemo haswa yeyonakudzia maḍyana. Na kamukanya adzit̯unze na yuḍaat̯o jusijo maana, jwijonananga faro za wantu. Na kawii Timoteo kakukumbuswani awe muntu jwa faro, muntu jwa matsako na jwa kuit̯isa. Na ya kwamba akiwa muhikizika anapfegwa t̯ubvo, dza vya matsoro yaneneyevyo yakyamba, “Ikiwa kwamba hufwa na Kirist̯o, pia hudzaishi pfamodza nae. Hukigija kuit̯isa, pia hudzat̯awala pfamodza nae.” (2:11-12)
Kuzimuni mwa dhango ḍyane, Paulo kakuneneani kwamba hi kazi yakwe hapfa lumwenguni isakusia. Ndookomu kakumungizani mojo Timoteo ayagije haya mayongweezo ya hachi ya Muungu na ayasumwiiye wakati wiwonafaa na wakati usiofaa (4:2).
Yeyo humu ḅaruwani kwa ufufi
Kedhya 1:1-2
Paulo kamungiza mojo Timoteo 1:3-18
Namuna ya kuwa muhumisi eyenahikizika kwa Kirist̯o Yesu 2:1-26
Namuna ya wantu wadzevyowa ngera za mwiso 3:1-9
Mafunda ya Paulo kwa Timoteo 3:10-4:8
Maḍamano na kedhya 4:9-22