Ḅaruwa ya d̯ura ya Paulo kwa tsanganiko ḍya
WATESALONIKE
Ndwahiyo
Hii ni ḅaruwa ya d̯ura yorejweyo ni Paulo kwa Wakirist̯o weokuwa mudzi wa Tesalonike, wiwokuwa ḍyimbo ḍya Makedonia. Paulo kora hi hii ḅaruwa epfokuwa mudzi wa Korint̯o chima cha mwaka wa 50 mumpaka 52 ḅaad̯a ya kudza kwa Yesu Kirist̯o. Wasomi wenji wahikiza kwamba hizi ḅaruwa oreyezo kwa Watesalonike ndizo za d̯ura oreyezo kwa matsanganiko.
Saḅaḅu yakwe nkuu ya kwora hi hii ḅaruwa ni kuwamanyisa Watesalonike namuna evyokumuyavizani ḍuḍa Muungu kwa dzambo ḍyao na namuna awatsakiyevyo. Kahenda hivi ili awangize mojo wagije kumuserefat̯a Muungu na Yesu Kirist̯o.
Ela hiḍi tsanganiko ḍyenye ḍiiwa na d̯ina nyinji na nyinji. Wangine wa hawa Wakirist̯o wewa wayatsa kudzihendea kazi wadzilachie kantu, wakit̯ara kwamba Ḅwana njwakuuja mweedha wa pfii si hat̯a kae (4:11-12). Ela Paulo kawakanya wayatse kudzikaiya ḅasi. Wakirist̯o wangine wewa na wasiwasi kwamba maḅamu zao na wantu wao wangine wewa wesakufwa kaḅila Kirist̯o nkadzauja mweedha wa pfii. Dze, wana mat̯umaini yaḍeyonse? Paulo jeje kawahakikishia kwamba, hawa wafwiyeo wadzamuona Yesu akwakudzani, nao wadzaishi pfamodza nae maishi na maishi (4:13-15).
Paulo kawangiza mojo hawa Wakirist̯o kwa kuwamba watsekeye nsiku zonse! Kawamba wakikaa na kuyomba kut̯wa na kumuyaviza ḍuḍa Muungu kwa kula ḍiḍyonahendeka, koro ndivyo vya Muungu evyonatsaka wahende (5:16-18). Dhango ḍya hahu na ḍya tsano, Paulo kesa na mayombo ya kuwayombea Watesalonike (3:11-13 na 5:23-24).
Yeyo humu ḅaruwani kwa ufufi
Kedhya 1:1
Paulo kayavya ḍuḍa kwa dzambo ḍya Watesalonike 1:2-10
Kazi ya Paulo ahendeyeyo Tesalonike 2:11-16
Hamu ya Paulo ya kuwat̯embeeya Watesalonike 2:17-3:13
Kuishi maisha ya kumutsakiza Muungu 4:1-12
Kuuja kwa Ḅwana mweedha wa pfii 4:13-5:11
Maghaghisa ya kwisia na kedhya 5:12-28