Ḅaruwa ya Paulo kwa tsanganiko ḍya
WAKOLOSAI
Ndwahiyo
Mudzi wa Kolosai wiwa mudzi wa ḍyimbo ḍya Asia ndoḍo. Hizi hizi nsiku, hi hii nsi inahanwa Ut̯uruki. Mudzi wa Kolosai wikikajwa ni wantu garagara. Kwiwa Wafurugia weokuwa wenye hi nsi pfamodza na Wayahud̯i na Wayunani.
Hi hii ḅaruwa yoregwa ni Paulo kwa Wakirist̯o wa Kolosai chima cha mwaka wa 61 ambu 62 ḅaad̯a ya kudza kwa Yesu Kirist̯o. Wenji wao wewa si Wayahud̯i. Epfoakiyora hi hii ḅaruwa, Paulo ewa kafungwa gerenzani mudzi wa Rumi. Timoteo ndiye akimugijiija kuyora hi hii ḅaruwa.
Kwiwa muhikiza mumodza eyeakihanwa Epafuro, endeyeakimumpa maagu Paulo dzuu ya tsanganiko ḍya Kolosai. Kamwamba mudzi wa Kolosai wiwa unjijwa na mayongweezo ya nsuwe, yeyoyakitsaka kuḍinanga hiḍi tsanganiko. Kwiwa wantu weowakiyongweeza kwamba Muungu siye ajuumbiye huju lumwengu. Wekyamba huju lumwengu judzaa mazuka kwa kwamba juumbwa ni viumbe vingine vizuka vivyokuwa nsii ya Muungu. Na mayongweezo yangine yekyamba muntu nkawezi kuwa muhachi usoni kwa Muungu mumpaka ahinywe apate kuwa Muyahud̯i nguzi tswee. Kisa ni awe kwamba anauḅa haya masharia yonse ya Kiyahud̯i yawekejweyo.
Ela Paulo epfopata haya haya maagu, kora hi hii ḅaruwa kuyadziza haya mayongweezo ya nsuwe yonse. Nguzi d̯ura kawangiza mojo Wakirist̯o wa Kolosai kwa kuwambia kwamba kapfegwa maagu dzuu ya faro yao kwa Kirist̯o na namuna waivyo wahikizika. Kawamba wagije kuihikiza hi hachi na wala watseiyekeza, koro mwiso wananjia maremboni mwa Muungu. Na kwa kwamba Yesu Kirist̯o na Muungu ni wamodza, na waumba lumwengu na vyonse vivyo kuzimuye, d̯ubva vyonse vivyo lumwenguni vyaa nsii ya Kirist̯o. Na pia kawamba, Muungu anawakuḅali Wakirist̯o wonse kwa dzambo ḍya kwamba Kirist̯o kafwa kwa dzambo ḍyao. Ndookomu kawamba ntawa haḍya iḍeyonse ya kuuḅa masharia ya kiḍini ya kuwahendeza wakuḅalike kwa Muungu. Ishinu kawamba wamuud̯amie kuishi dza vya wantu wamuhikiziyeo Yesu Kirist̯o wevyonamala kuishi.
Yeyo humu ḅaruwani kwa ufufi
Kedhya 1:1-2
Mayombo kwa dzambo ḍya Wakolosai 1:3-14
Kazi ya Kirist̯o ahendeyeyo 1:15-23
Kazi ya Paulo ahendeyeyo kwa Wakolosai 1:24-2:5
Kirist̯o kayeha uhuru 2:6-23
Ishini maisha ya Kikirist̯o 3:1-4:6
Maḍamano na kedhya za kwisia 4:7-18