16
1 Nyakumwambiani haya haya yonse ili mutsekudzaiyekeza hi faro yenu. 2 Nywinywi mudzayavigwa masunagogini, na kudzafika ngera ya wantu kumuyaga wakit̯ara ya kwamba kwa kuhenda hivyo, wakumuhumikiani Muungu. 3 Wao wanamuhendea dza hivyo, kwa kwamba ntawanidzi mimi wala Baba. 4 Mimi niyamwambia haya haya yonse, ili yadzepfohendeka, mukumbuke kwamba niiyamwambia d̯ura.”Kazi ya Ruhu Mudheru adzeyohenda
Yesu kagija kunena kamba, “Haya haya sikuyamwambia hangu pfapfaḍe ḍabvu, nipfoḍabva kuyongweeza, kwa kwamba niwa nya pfamodza nanywi. 5 Ela sasa nyakuujani kwa huyu anihumiye. Nanywi ntaku hat̯a mumodza jwenu eyekuniuzani kwamba nyekea! 6 Nywinywi mukaiya kusikit̯ika t̯u kwa dzambo ḍya hivi nimwambiiyevyo. 7 Ela hachi nyakumwambiani, kugonzowa kwangu ni kwa faiḍa yenu nywinywi. Koro nikitsagonzowa, huyu Mugijiija nkawezi kudza kwenu. Ela nikigonzowa, namuhuma adze kwenu. 8 Na adzepfokudza, kadzajuyanga huju lumwengu hi ya hachi dzuu ya nabvise, na dzuu ya kut̯alijwa hachi usoni kwa Muungu na dzuu ya hukumu. 9 Huyu Ruhu kadzajuyanga lumwengu kwamba, nabvise yao ni hivi wadziziyevyo kunihikiza mimi. 10 Wadzaona kwamba Baba kanit̯ala kuwa muntu muhachi kwa kwamba nyakwendani kwakwe. Nanywi ntamukudzaniona kawii. 11 Wantu wadzaona hakika ya kwamba hukumu yakudzani, kwa kwamba huyu haju jwa huju lumwengu kesakuhukumigwa.
12 Bo! Nina menji na menji ya kumwambia, ela kwehii saasambi ntamuyawezi. 13 Ela huyu Ruhu jwa kuiyanga hi hachi adzepfokudza, anamuyanga kula dzambo ḍiḍyo ḍya hachi muḍimanye. Jeje nkanene yakwe mwenye, ela anamwambia hayaḍe yonse eyonasikia kuyawa kwangu. Anamwambia dzuu ya haya yadzeyohendeka. 14 Anayamupfenwiiya nywinywi hayaḍe yonse niyonanena, na kwehii njia mimi napata kumanyikana namuna niivyo mukuu. 15 Vyonse vya Baba evyonavyo, nami pia mvyangu. Ndiyo maana nyambiyeyo kwamba, huyu Ruhu anahwaa hayaḍe yangu niyonanena, anayamupfenwiiya nywinywi.”
Masikit̯iko yadzawa tsekea
16 Yesu kagija kunena na wanafund̯iwe kawamba, “Ḅaad̯a ya muḍa ntamukudzaniona, ela ḅaad̯a ya kit̯emo kifufi mudzaniona kawii.” 17 Hawa wanafund̯i waḍabva kuuzana wao na wao wakyamba, “Akwakwambani, ḅaad̯a ya muḍa ntahukudzamuona, na ḅaad̯a ya kit̯emo kifufi hudzamuona kawii, maanaye ni? Ambu akyamba kakwendani kwa Babajwe, ana maana ga? 18 Na akyamba, ‘Ḅaad̯a ya muḍa,’ maanaye ni? Ntahukwakuimukani echokunenani t̯i!”
19 Yesu kahambuya kwamba hawa wanafund̯iwe wekitsaka kumuuza maana ya hivi aneneyevyo, ndookomu nae kawamba, “Mwakuuzanani maana yangu nyambiyeyo, ‘Ḅaad̯a ya muḍa ntamukudzaniona, ela ḅaad̯a ya kit̯emo kifufi mudzaniona kawii?’ 20 Hachi nyakumwambiani, mudzaiya na kusikit̯ika, ela lumwengu judzatsekea. Mudzasikit̯ika, ela sikit̯iko ḍyenu ḍidzaperuka ḍiwe tsekea. 21 Hat̯a muke akinukijwa, anaumwa muno. Ela akisakudzifunguya, hu tsungu anawaarerwa kwa dzambo ḍya tsekea ya kupata mwana. 22 Na hat̯a nanywi, hi hii saasambi muna masikit̯iko. Ela nidzamuona kawii na mudzawa na tsekea muno, na wala ntakuwe jwa kuimutsovya hiyo hiyo tsekea. 23 Hiyo hiyo ngera ikifika, ntamuwe na haḍya ya kuniyomba kiḍechonse. Koro hachi nyakumwambiani, kiḍechonse mudzechomuyomba Baba kwa sari ḍyangu, jeje anakimuhendea. 24 Mumpaka saambi, ntamudzayomba kiḍechonse kwa sari ḍyangu. Nywinywi yombani, nanywi munapfegwa ili myojo yenu ipate kudzaa tsekea.
25 Haya haya mambo niyamwambia na mainganyo, ela kudzafika ngera ya kwamba sikudzanena nanywi na mainganyo kawii. Nidzanena nanywi na lugha ya kuimukika tswee dzuu ya Baba. 26 Hiyo hiyo ngera ikifika, munamuyomba Baba kwa sari ḍyangu. Ela sikwakunenani kwamba ni had̯i nimuyombeye mimi kwa Baba hat̯a. 27 Koro Baba jeje mwenye, kamutsaka kwa dzambo ḍya kwamba, nywinywi munitsaka mimi na muhikiza ya kwamba mimi nihumigwa ni Baba. 28 Mimi niyawa kwa Baba nidza lumwenguni, na nyakunukani lumwenguni niuje kwa Baba.”
29 Hawa wanafund̯iwe wamwamba, “Ehe, sasa kwakunenani lugha ya kuimukika, nkukwakunenani na mainganyo kawii. 30 Sasa humanya ya kwamba katsi wewe nku dzambo usiḍyoḍimanya. Ndookomu ntaku haḍya ya muntu kukuuḅa-uḅa na maswali yaḍeyonse. Na kwa dzambo ḍyevyohivyo, huhikiza ya kwamba wewe kuyawa kwa Muungu ḍugha.” 31 Yesu kawambukuya kawamba, “Sasa muhikiza? 32 Ela ngera zakudzani, na hat̯a zimaafika haswa, ambapfo nywinywi mudzat̯amisaa na kula mumodza ende kwakwe. Mudzanifat̯ula mimi heket̯u, ela mimi sikwaa mimi heket̯u, koro Baba ka pfamodza nami. 33 Nimwambia haya haya mambo yonse, ili mupate kuingamaa myojo kwa dzambo ḍya kuwa na uharia nami. Gula huju lumwengu junamukuntisa d̯ina, ela namutseefwa mojo, mimi nijushinda lumwengu.”