यूहन्ने लिखो
प्रकट भुओ बोके
तुसी केहि महापुरुषी के जीवने बारे पढ़ो भोल। तेन्के मठड़ियारी जिन्दगी कीं थी, तेन्हि की की कम किए त की की शिच दिती तसे बारे बि जरूर पता भोल। त प्रभु यीशु जिन्दगी बारे तुसी की लगतु?
अगर तुस ध्यान दियेल त तुस हेर बटते कि प्रभु यीशु सुआ ताकती बाड़ भोई कइ बि यक कमजोर त लचार मेह्णु ईं क्रूस पुठ मर गा। तिहांणि तस मानणे बाड़ी मेह्णु बि भुंजाण त नफरत सीढ़िण आई। तेन्हि बिचा केहि केहि त मौत बि सीढ़ गो असे। ए कोउं महापुरुष भो भला, जेन अपफ त अपु मेह्णु जे इस धरती पुठ भुंजाण त मरुण भुगतुण जे शिचालता। भला किस एसे शिच मानणे बाड़े बि अपु जान जोखिम अन्तर छते?
इस कताब पढ़ कइ पता लाए कि अखिर विश्वासी मेह्णु केस बझई जोई मेह्णु के भुंजाण त दुख तकलीफ सीढ़ण जे तेयार भुन्ते, होर अपु जान बि जोखिम अन्तर छड़ण जे नाह ना कते। इस कताब अन्तर तुसी धरती अखिर दिनि अन्तर की की भुणे बाड़ु असु, त इस पूरे भुमणे की हाल भुन्ता त विश्वासी जोई परमेश्वर की की कता, एन्हि सोबी बोकी के बारे पढ़ बटते। ए कताब यक सुआ खास कताब असी, किस कि ए अन्त भुणे बारे त नोई शुरुवात भुणे बारे असी।
ई कताब प्रभु यीशु प्रतिनिधि यूहन्ने शुची आत्माई ताकते बेलि भरी कइ लिखो असी। एस लिखणे टेम तसे उमर 90 साले भोई गो थी त से पतमस नओएं यक टापु अन्तर कैद थिआ। विद्वान मानते कि तेन ए कताब कोई 90 ईसवी अन्तर लिखो थी। होर प्रभु यीशु बाराह प्रतिनिधि बिचा सद एईएं असा जे सुसुर स्याणा भोई कइ मर गा। परमेश्वर कीं कइ इस दुष्ट मतोके अन्त कइ छता, कीं कइ नोई सृष्टि बणान्ता, होर तेस अन्तर विश्वासी मेह्णु की की कते त प्रभु यीशु ना मानणे बाड़ी जोई की की भुन्तु तेसे बारे पता लाण जे चले, झट इस कताब पढ़ते।
विषय सूची
शुरुवाती बोके (1:1-8)
सत सतसंगी जे चिट्ठि (1:9—3:22)
कताब त तसे सत मुहरी (4:1—7:17)
सत रेशमि फुक देण (8:1—11:19)
राकस त दुई जानवर (12:1—13:18)
होरे होरे दर्शण (14:1—15:8)
परमेश्वरे कोपे सत कटोरे (16:1-21)
बेबीलोन शेहर, झूठा भविष्य वक्ता त जानवर हार घेण (17:1—20:6)
अखिरि न्याय भुण (20:7-15)
नोई सृष्टि त नउआं यरुशलेम शेहर (21:1—22:5)
अखिरि बोके (22:6-21)