यहूदे
लिखो चिट्ठि
नमस्कार
1
1 ए में ट्यारे भाई त भेणिओं, जे परमपिता परमेश्वरे भिहो असे त यीशु मसीहे लिए सम्हाड़ी कइ रखो असे। तुसी सोबी जे अउं यीशु मसीहे सेवक त याकूबे भाई यहूदा नमस्ते कता।2 तुसी सोबी पुठ हद केआं ज्यादा परमेश्वरे परेम त कृपादृष्टि भुन्ति रिहे त रज्जि शान्ति मेती रिहे।
आमीन
चिट्ठि लिखणे बझह
3 ए ट्यारेओ! में मन अन्तर त ती चह थी कि अउं तुसी जे परमेश्वरे असी बचाणे बारे लिखुं, जेस अन्तर अस सोब मी कइ हेस्सेदार असे। पर अब मोउं ई जरूरी लगतु कि तुसी हिम्मत दिउं कि तुस कीं कइ अपु तेस विश्वासे रक्षा करियेल, जे विश्वास परमेश्वरे सोबी शुचे मेह्णु कें धे यके लिंगि दुतो असा। 4 किस कि ईं केहि मेह्णु मठे नियोक कइ तुसी बुच एई गो असे, जे परमेश्वरे भक्ति ना कते त हें परमेश्वरे कृपादृष्टि यक मखोल ईं समझ कइ लूचियाम कते। होर त होर, ए हें यके मालिक त प्रभु यीशु मसीह बि ना मानते। परमेश्वर एन्हि की सज्जा देन्ता तसे बारे सुआ टेम केआं पेहलाई धरमे कताब अन्तर लिख छो असु।a
5 तुसी ए सोब बोके पेहलाई केआं सुसुर पता असी। तोउं बि, अभेईं अउं तुसी इन्हि बोकी के चेता दिआण चहन्ता कि बेशक प्रभु पूरे इस्राएले मेह्णु मिस्र देशे गुलामी केआं छुड़के, तोउं बि जेन्हि तेस पुठ विश्वास ना किआ, से सोब खतम कइ छड़े।b 6 फि तुस तेन्हि स्वर्गेदूती के बि याद करे, जेन्हि परमेश्वरे दुतो अपु पद पुठ सुसुर ना बिश कइ, बगावत की। परमेश्वर से बि तेस न्याय करणे खतरनाक रोजे लिए अन्हारे अन्तर हमेशा हमेशा लिए बन्ह रखो असे।c 7 तिहांणि सदोम, अमोरा त तसे औत-कोती बइ शेहरे मेह्णु बि सुआ बुरा बर्ताव किआ त मड़द मड़द बुछ त जिल्हाणु जिल्हाणु बुछ नाजायज रिश्ते रख कइ लूचियाम किउ।d तेन्हि बि परमेश्वरे अमर आगी सज्जा दिती कि से सोबी जे यक नमूना बणियेल।
मेह्णु बुरे गुण
8 तसे रीत जुएई ईं ए मेह्णु अपु अपु जिसम पुठ गन्दे गन्दे कम कते त बोते “असी दर्शण भो थिए।” से प्रभु हेर बि ना डरते त अपफ केईआं बोडे इज्जतदारी स्वर्गेदूती जे भलु बुरु बोलुण केआं बि ना डरते। 9 पर स्वर्गेदूती के मुखिया मीकाईलेe बि जपल शैतान जुएई मूसे लाशे बारे बेहेस किओ थी, त भलु बुरु बोल कइ तेस पुठ दोष लाणे हिम्मत ना की, पर ईं बोलु, “प्रभु तोउ जड़काल।”f 10 पर ए मेह्णु तेन्हि सोबी जे भलु बुरु बोते, जेन्के बारे से कुछ ना जाणते। होर जानवरी के ईं सभाव केईआं जेन्हि बोकी जाणते, तसे बेलि अपु अपफ खतम कते।
11 एन्हि सुआ भयंकर सज्जा मेती, किस कि ए मेह्णुमार कैनेg ईं चाल हंटते, त रुपेई लोभ कर कइ बालामेh ईं गलत कम कते। त से कोराहेi ईं असे, जे बगावत कर कइ खतम भोई गा। 12 ए मेह्णु विश्वासी के धाम अन्तर तुसी जुएई खांते पीन्ते, होर बेफिकर भोई कइ सद अपणे पेट भरते। ए समन्दर अन्तर नियोको तेन्हि फाटी के ईं असे, जेन्के बेलि जहाज डूबते। ए बजन पाणि तेन्हि बदेए के ईं असे, जेन्हि ब्यार उडीर कइ नी छती। ए तेन्हि बुटी के ईं असे जे बरशाड़ बि फल ना देन्ते। ए सीरी केईआं उखड़ो बुटी के ईं असे, जे दुई दे लिंगि मर गो असे। 13 ए समन्दरे भयंकर छल्हारे ईं असे, जे अपु लज शरम तेन्हि शोफि के ईं फटान्ते। ए तेस टूटो तारे ईं असे, जेन्हि हमेशा हमेशा लिए अन्हारे अन्तर बिशुण ठीक किओ असु।
14 एन्के बारे हनोके बि, जे आदमे सतूं पीढ़ी थिआ, भविष्य वाणि कर कइ बोलो थिउ,
“हेरे! प्रभु अपु हजारों लखों शुचे स्वर्गेदूती जोई एण लगो असा
15 कि सोबी के न्याय करियाल।
होर से तेन्हि सोबी जेईं दोषी बणाल
जे भक्ति ना कते,
जे बुरे कम कते,
होर जेन्हि तसे खिलाफ नकठर बोके किओ असी।”
16 ए से मेह्णु भिन्थ जे कदी केसे बोकी पुठ खुश ना भुन्ते। ए हमेशा चरचर कते रेहन्ते त अपु अपु बुरी इच्छाई हेसाब जोई जीन्ते, होर अपु मुंहुए बइ बोडी बोडी बोके कते, त से अपु फायदे लिए कुछ बि बोते रेहन्ते।
विश्वासी मेह्णु जे सलाह
17 पर ए ट्यारेओ, तुसी से बोके याद रखीण, जे हें प्रभु यीशु मसीहे प्रतिनिधि तुसी जे पेहलाई बोल गो असे। 18 से तुसी जे बोलिआ कतेथ, “अखिरि रोजी अन्तर ईं मेह्णु एणे बाड़े असे, जे परमेश्वरे लठ लिहाज ना रखते, बजन भक्ति अपु बुरी इच्छाई हेसाब जोई जीन्ते।”j 19 ए से भिन्थ जे मेह्णु अपफ बुच झगड़ान्ते। ए जिसमे बुरी इच्छाई हेसाब जोई जीणे बाड़े से मेह्णु भिन्थ, जेन्हि अन्तर परमेश्वरे आत्मा असीए नउ।
20 पर ए ट्यारेओ! तुस अपु शुचा विश्वास अन्तर बधते घिए। होर शुची आत्माई मदती बेलिए प्रार्थना कते रिहे। 21 परमेश्वर जे तुसी जोई परेम कता, एन्हि बोकी तुस अपु मन अन्तर सम्हाड़ी रखे। त अमर जीवने लिए हें प्रभु यीशु मसीहे कृपादृष्टि बोडी उम्मीद जोई भाड़ते रिहे।
22 तेन्हि पुठ दाह दया करे, जेन्के विश्वास कमजोर असा। 23 होर सुआ जेईं लपझप दी कइ परमेश्वरे न्याय करणे आगी टहनु केआं बचाण दिए। होर जे अपु अपु जिसमे बुरी इच्छाई बेलि कुस्तुरी जिन्दगी जीन्ते, तेन्हि पुठ दाह दया कते टेम समोझि बिशे। ई ना लौतु भो कि तुस बि तेन्केरे ईं गलत करण लग घियेल।
परमेश्वरे महिमा त बधेए
24-25 जीं सृष्टि पेहलाई केआं अभेईं तकर भुण लगो असु,
अभेईं तेस यके परमेश्वरे, हें बचाणे बाड़ी के महिमा, गुणगान, शान त ताकत,
हें प्रभु यीशु मसीहे बेलिए जुग जुग भुन्ति रिहे।
किस कि से परमेश्वर तुसी गलती त पाप केईआं बचाई बटता,
त तुसी नरदोष बणाई कइ त सुआ खुशी जुए भर कइ अपु समाणि खड़ेर बटता।
आमीन!