पतरसे
लिखो दोकी चिट्ठि
नमस्कार
1
1 ए ट्यारे भाई त भेणिओं! जेन्हि हें ईं मसीह पुठ विश्वास करणे मौका मेओ असा, अउं शमौन पतरस, यीशु मसीहे नौखर त प्रतिनिधि, तुसी सोबी जे नमस्ते कता।हें परमेश्वरे त बचाणे बाड़ा यीशु मसीहे भलाईa बेलि ईं असी ए कीमति विश्वास मेओ असा।
2 परमेश्वरे त हें प्रभु यीशु जाणणे बेलिए तुसी पुठ तीं कृपादृष्टि त सुआ शान्ति मेती रिहे।
आमीन
परमेश्वरे चुणुण त भिआण पक्का करुण
3 जीवन जीण जे त परमेश्वरे भक्ति करण जे जे कुछ बि असी लौतु, परमेश्वरे अपु शक्ति बेलि से सोब हें धे दुतो असु। परमेश्वर बोडा त सुआ खरा भुणे बझई जोई अस भिहो असे। असी तसे पता असा, तोउं त ई सोब असी मेई गो असु। 4 किस कि से परमेश्वर बोडा त खरा असा, तेन हेन्धे बेहिसाब त बोडी बोडी जुबान दुतो असी। एसे बेलि तुस मतोके तेस बुराई केआं छूट कइ जे बुरी इच्छाई बेलिए भुन्ति, परमेश्वरे गुणे हेस्सेदार बणियेल। 5 एस बझई जोई तुस मसीह पुठ अपु विश्वासे हेसाब जुए अब्बल जीण दिए, त तेस अब्बल जीण अन्तर परमेश्वरे इच्छा जाणणे लिए जब्बर कोशिश करे। 6 होर परमेश्वरे इच्छा जाण कइ अपु अपफ वश अन्तर रखण जे त अपु अपफ वश अन्तर रख कइ लाह रखणे जब्बर कोशिश करे। लाह रखते रखते परमेश्वरे भक्ति करणे कोशिश करे। 7 तसे भक्ति कते-कुते अपफ बुच भाईचारे जुए बिशणे, त भाईचारे जुए बिश्ते टेम परेम अन्तर बधणे कोशिश करे। 8 किस कि अगर तुस ए सोब कते रिहेल, होर अगर ए सोब गुण तुं अन्तर बधते घियेल, त तुस ई हरालते कि हें प्रभु यीशु मसीहे पिछाणणे बेलि तुं अन्तर जब्बर खरे असर भो असा। 9 किस कि जे कोउं एन्हि बोकी अन्तर न बधता, से जीं काणा त अन्हा ईं असा। होर से बिसरी गो असा कि तसे पुराणे पाप सोब धुई गो असे। 10 एस बझई जोई ए ट्यारेओ! परमेश्वरे तुसी भिआणे त चुणुणे सही साबित करणे लिए हर कोशिश कते रिहे। किस कि अगर ईं करियेल त तुस कदी बि विश्वास केईआं न भटकते। 11 बल्कि एस बझई जोई तुस हें प्रभु त बचाणे बाड़ा यीशु मसीहे कदी न खतम भुणे बाड़े राज्य अन्तर इज्जत जुए घेन्ते।
परमेश्वरे वचन पुठ ध्यान देण
12 तोउं त, बेशक तुस अन्हि बोकी जाणते, होर जे सच्चे वचने शिक्षा तुसी मेओ असी, तेस पुठ पक्के भोई गो असे, तोउं बि अउं तुसी इन्हि बोकी के चेता दिआण जे हमेशा तेयार रेहन्ता। 13 त जपल तकर अउं डेरे ईं मेओ जिसम अन्तर असा, तपल तकर इन्हि बोकी के बेलि तुसी खबरदार कता रेहन्ता। ईं करण मोउं खरु लगतु। 14 किस कि अउं ई जाणता कि में दुई रोजे डेरा छुटुणे बाड़ा असा, जीं हें प्रभु यीशु मसीहे मोउं जे बोलो असु। 15 तोउं त, अउं तीं कोशिश कता, ताकि में डेरा छुटुण केआं पता बि तुस अन्हि सोबी बोकी याद कइ बटियेल।
16 जपल असी तुसी जे हें प्रभु यीशु मसीहे शक्ति त एणे खुश खबरी शुणाओ थी, त से चलाकी जोई बड़ाओ मेह्णु के कथा न थी, पर असी अपफ अपु टीरी बइ हेरो थी कि से कत ताकतवर असा। 17 किस कि तस परमपिता परमेश्वर केआं इज्जत त ताकत तपल मेईं, जपल सर्व शक्तिमान परमेश्वरे केईआंb अवाज आई कि
“ए में ट्यारा कुआ भो।
एस जुए अउं सुआ खुश असा।”c
18 तपल अस यीशु जोई साते तेस शुचे फाट पुठ थिए त स्वर्ग केआं ईं अवाज एन्ती शुणी।d 19 एन्हि सोब बोकी केआं असी पता चलता कि मसीहे बारे भविष्य वक्ती जे बि लिखो असु, से सोब सच्चु असु। जीं यक अन्हारे जगाई दीया पुठ ध्यान देन्ते, तीं तुस तेन्के बोकी पुठ ध्यान दी कइ खरु कते। त तुस तेस टेम तकर ध्यान लाई रखे, जपल तकर पथवारी ईं त भ्यागे तारेe ईं मसीह ना एईयाल। 20 पर पेहले ई जाण घिए कि धरमे कताबे कोई बि भविष्य वाणि केनि अपु विचारी के बेलि नेईं लिखो। 21 किस कि कोई बि भविष्य वाणि मेह्णु के मर्जी जुए कदी न भुन्ति, पर परमेश्वरे भक्त, शुची आत्माई बेलिए परमेश्वरे कनारा बोतेथ।