सोबी जुबानी केईआं बि खरी, यीशु जुबान
(8:1—9:10)
मसीहे पुजारोठि
8
1 अब जे बोके अस तुसी बताण लगो असे, तेन्हि अन्तर सोबी केईआं बोडी बोक ई असी कि यीशु हें यके ईं बोडा पुजारा असा, जे स्वर्ग पुठ परमेश्वरे सिंहासने देहणा कना घेई बिशो असा। 2 से तेस शुचे देहरे त सच्चे उगाही डेरे सेवक बणा, जे मेह्णु के बेलिए ना, बल्कि प्रभु अपफ बड़ो असा। 3 होर किस कि परमेश्वर दान त भकत चढ़ाण जे बोडे पुजारे नियुक्ती कता, त ई जरूरी असु कि यीशु केईं बि भकत चढ़ाण जे कुछ लौतु। 4 अगर यीशु मसीह इस मतोक अन्तर भुन्ताथ, त कदी पुजारा न बणताथ, किस कि नियमे मुताविक दान त भकत चढ़ाणे बाड़े केहि असे। 5 पर से तेन्हि चीजी के सेवा कते, जे स्वर्ग अन्तरी चीजी के सद उडार भो। किस कि जपल मूसा उगाही डेरा बणाण लगो थिआ, त परमेश्वरे तेस ईं बोल कइ चेता दिआई छड़ा कि“ख्याल रख, हर यक चीज तिहांणि बणाण,
जीं मेईं तोउ फाट पुठ हरालो असु।”a
6 पर यीशु मसीह तेन्हि पुजारी केईआं बि बध कइ पुजारोठि मेई, किस कि से हउ बि बोडी जुबानी पंच बणा। ए पुजारोठि सोबी केआं अब्बल असी, किस कि ए परमेश्वरे बोडी बोडी जुबानी बेलिए बन्हिए असी। 7 अगर पेहली तेस जुबान अन्तर कोई कमी न भुन्तीथ, त दोकी जुबानी कोई जरूरते न भुन्तीथ। 8 पर परमेश्वर तेन्हि पुठ दोष लाई कइ यिर्मयाह भविष्य वक्ते बेलि बोताb,
“हेरे, से दन एई घेन्ते कि अउं इस्राएले गीहे बाड़ी कें धे
त यहूदे गीहे बाड़ी के धे नोई जुबान देन्ता।
ए में जुबान भो।
9 ए तेस जुबानी ईं न भुन्ति,
जे मेईं तेन्के पुरखी कें धे तेस टेम दुतो थी,
जपल अउं तेन्के हथ टाइ कइ
तेन्हि मिस्र देश केईआं बाहर घिन आ।
किस कि तेन्हि में जुबान पुठ भरोसा न किआ,
त मेईं तेन्के ख्याल न रखा।
10 तेन्हि रोजी पता, अउं इस्राएली मेह्णु कें धे ईं जुबान देन्ता कि,
अउं अपु नियम तेन्के मन अन्तर छता,
त अपु निआंग तेन्के दिल अन्तर लिखता,
अउं तेन्के परमेश्वर बणता,
होर से में गभुर बणते।
11 तोउं से होरी ना शिचालते कि ‘परमेश्वर जाण’
से अपु भाई बि ईं ना पुछते कि ‘की परमेश्वरे बारे तोउ पता असा ना?’
किस कि मठुड़ केआं बोडे तकर से सोबी जेईं मोउं जाणते।
12 किस कि अउं तेन्हि माफ कता,
त तेन्के गलती त पाप हउ याद ना कता।”c
13 परमेश्वरे ई नोई जुबान देणे बेलि जे पुराणि जुबान दुतो थी, से बेकार कइ छड़ी। जे बेकार त पुराणु भोई गो असु, से झट खतम भोई घेन्तु।