यीशु, मूसा त यहोशू केईआं बि बोडा
(3:1—4:13)
यीशु, मूसा भविष्य वक्ते केआं बि खरा
3
1 तोउं त, ए में भाई त भेणिओं! तुस, जे परमेश्वरे शुचे भुण जे भिओ असे! हें विश्वासे मुखिया त हें बोडा पुजारे यीशु बारे धिक सोचे। 2 जीं मूसा पूरे परमेश्वरे गी अन्तर यकीन लेएक थिआ, तीं यीशु तेस परमेश्वर जे यकीन लेएक थिआ, जेन से नियुक्त किओ थिआ। 3 तोउं बि जीं यक घर बणाणे बाड़े जे, घर केआं बि ज्यादी इज्जत मेती, तीं यीशु मूसे केआं बि ज्यादा इज्जत मेणे लेएक असा। 4 किस कि घर बणाणे बाड़ा कोई बि भोई सकता, पर जेन सम्हाई कुछ बणो असु, से परमेश्वर भो। 5 अब मूसा परमेश्वरे गी अन्तर यक सेवक ईं यकीन लेएक थिआ। तसे कम ई थिउ कि से तेन्हि बोकी के मेह्णु उगाह दी बटियेल, जे परमेश्वर पता बोता। 6 पर यीशु मसीह यक कोईये ईं परमेश्वरे गी अन्तर यकीन लेएक थिआ। अगर अस अखिर तकर हें विश्वासे लिए हिम्मत रखते, परमेश्वर पुठ उम्मीद कते रेहन्ते त अस परमेश्वरे गीहे मेह्णु बणते।परमेश्वरे गभुर जे टांक
7 त जीं परमेश्वरे आत्मा बोती कि
“अगर आज तुस तसे बोक शुणियेल
त परमेश्वर बोता कि
8 ‘तुस अपु अपु मन नकठर ना करे,
जीं तुं पुरखी में खिलाफ किओ थिआ,
जपल तेन्के परीक्षा अरुणि धार अन्तर भुण लगो थी।
9 तठि तुं पुरखी में परीक्षा नी कइ अउं परखा,
त चढ़ी साल तकर में कम हेरु।
10 तोउं त, अउं तेन्हि पुठ लेहरी गा,
त बोलु, “एन्के मन हमेशा भटकोरा भुन्ता;
एन्हि समझ कइ बि ना समझु कि अउं एन्हि केईआं की कराण चहन्ता।”
11 त मेईं लेहरी कइ सोह कइ छड़े कि
अउं एन्हि अपु टांक तकर ना पुजान्ता।’”a
12 त, ए ट्यारेओ, समोझि बिशे! ई न लौतु भो कि तुं मन अन्तर बुराई एईए, होर तुस परमेश्वर पुठ शक कर कइ तेस जीन्ता परमेश्वर केआं दूर भोई घियेल। 13 बल्कि पापे जाल अन्तर फस कइ अपफ नकठर भुण केआं बचुण जे, जपल तकर “आजकण रोज” असा, तुस रोज के यकी होरी जे विश्वास अन्तर हिम्मत देन्ते रिहे। 14 किस कि अगर अस यीशु मसीह पुठ अखिर तकर अपु शुरुवाती भरोसा जुए बिश्ते त अस तेस जुए हेस्सेदार बणते।
15 किस कि धरमे कताब अन्तर लिखो असु,
“अगर आज तुस तसे बोक शुणियेल,
त परमेश्वर बोता कि
‘तुस अपु अपु मन नकठर ना करे,
जीं तुं पुरखी में खिलाफ किओ थिआ।’”b
16 बोले त धिक, से कोउं थिए, जे परमेश्वरे बोक शुण कइ बि तसे खिलाफ भुए? से सेईंए थिए जे मूसे जुए मिस्र देश छड़ दी कइ अओ थिए? 17 होर, केस जुए परमेश्वर 40 साल तकर लेहरी कइ बिशा? से तेन्हि जे लेहरिआ, जेन्हि पाप किओ थिए त से अरुणि धार अन्तर मर गे। 18 होर परमेश्वरे केन्के बारे सोह किओ थिए कि “अउं अन्हि मेह्णु अपु टांक तकर न पुजान्ता”? से सेईंए मेह्णु थिए, जेन्हि तसे निआंग ना मनी। 19 त अस हेरते कि सेईंए मेह्णु अपु अविश्वासे बझई जोई तसे टांक तकर ना पूज बटे।