विश्वासी मेह्णु सुसुर जीण
3
1 मेह्णु चेता देन्ता रेह कि से सोब अफसरे त अधिकारी बोक मान कइ रेह त सम्हाई खरे कम करण जे हमेशा तेयार बिशे। 2 केसे जे बदनाम ना करे, होर ना झगड़ा करे। पर सोबी अब्बल गुण जुए सम्हाई मेह्णु जुए बिशे। 3 किस कि अस बि पेहले वेबखुफ, बोक ना मानणे बाड़े, होरे होरे बेहकाव अन्तर फसो त होरे होरे इच्छाई त मौजमस्ति गुलामी अन्तर थिए त दुश्माणी त रोभ किढ़ कइ जीन्तेथ। अस बि रशुणे त यक होरी के खिलाफ थिए। 4 पर जपल हें बचाणे बाड़ा परमेश्वर अपु दाह त परेम हराला, 5 त अस बचाई छड़े। तेन अस हें किओ खरे कमी के बेलि नेईं बचाओ, पर अपु दाह जुए दुबारी जमणे सन्हुण त शुची आत्मा नोई बणाणे बेलि बचाए। 6 से आत्मा तेन असी बचाणे बाड़ा यीशु मसीहे बेलि असी पुठ रज्जि दुतो असी। 7 तसे दाहे बझई जुए, तेन अस धर्मी बणाए त हेन्धे अमर जीवने हकदार भुणे पक्का उम्मीद दुतो असी।8 ए त सोबी मानणे बाड़ी बोक असी त अउं बि चहन्ता कि तु ई सोब बोके बारे पूरे जोर जुए बोले। इसे बेलि जेन्हि परमेश्वर पुठ विश्वास किओ असा, से खरे खरे कम करणे मन रखते। ए सोब बोके खरी असी त मेह्णु फायदे लिए असी। 9 पर बेमतलब बेहेस केआं, त ऊड़ी बही खाता, मडीण झगड़ीण त नियमे बारे झगड़े केआं दूर बिश, किस कि से सोब खाली त बेकार असु। 10 अगर कोई मेह्णु बुच झगड़ा आणते, त तेन्हि यक दुई लिंग खबरदार कर; तढ़ेया पता तेन्हि जुए कुछ लेण देण ना कर। 11 किस कि से सच्चाई केआं मुकीर गो असे त तेन्के पाप तेन्हि अपफ दोषी ठहरेरते।
अखिर शिक्षा
12 बे कोईया! जपल अउं अर्टिमास भाई या तुखिकुस भाईa तोउ केईं लंघान्ता, त मोउं केईं नीकुपुलिस शेहर एणे भरपूर कोशिश कर, किस कि मेईं हियुंत ता घेणे ठीक किओ असा। 13 वकील जेनास त अपोलुस भाईb झट अगर लंघाण दिए त ध्यान रख कि तेन्के सोब जरूरते पूरे भोई गो असी। 14 हें विश्वासी मेह्णु बि होरी के जरूरते टेम मदत करणे खरा कम शिचो लौता। तोउं से बेकार ना भुन्ते।
15 जे मोउं जोई असे तेन्हि सोबी के तोउ जे नमस्कार। जे विश्वासे लिए असी जुए परेम कते, तेन्हि सोबी जे में नमस्कार बोले।
परमेश्वरे कृपादृष्टि तुसी पुठ भुन्ति रिहे। आमीन