तिमुथियुस
जे प्रतिनिधि पौलुसे दोकी चिट्ठि
जपल यक मेह्णु पता लग घेन्ता कि से कुछ घड़ी पले मेहमान असा त से याद कर कर कइ बोके कता। से अपु गीहे बाड़ी जुओई सद तेन्हि चीजी के बारे बोके कता, जे शुई पाशु तेन्के कम एन्ती। तपल से हसाड़ ना कता, होर ना ठगता। से अपु जिन्दगी तजुर्वे हेसाब जुए अपु गीहे बाड़ी शिचालता कि ईं करे, ईं ना करे, तस केआं खबरदार भोई बिशे, फुलाणु फुलाणु। तपल अस बि खरे ध्यान जुए शुणते त तसे बोक मानणे कोशिश कते।
इस चिट्ठि अन्तर बि कुछ ईं लिखो असी। प्रभु यीशु मसीहे सेवक पौलुस जेहेल अन्तर कैद थिआ। होर तस पता लग गो थिआ कि तस झट मरणे सज्जा मेणे बाड़ी असी (2 तिमुथि 4:6-8)। त से अपु ट्यारा साथी त मसीहे सेवक तिमुथियुस जे कुछ खास सलाह देण जे इस चिट्ठि लिखुण लगो असा।
किस कि इस केआं पेहला बि तेन तिमुथियुस जे यक होरी चिट्ठि लिखो थी, त तुसी पता भोल कि पौलुस तठि की की बोता। पर तुसी कि पता असा ना कि से अपु जिन्दगी अखिरि रोजी अन्तर तिमुथियुस जे की की सलाह देन्ता? से तिमुथियुस जे केस केईआं दूर बिशुण जे बोता, त की की कर कइ अपु सेवा पूरी करुण जे बोता? इन्हि सोबी सवाली त होरे बि सुआ चीजी के बारे, जे पौलुस जे खास थी, तस बारे जाणणे लिए छने इस चिट्ठि शुरु केआं अखिर तकर पढ़े।
विषय सूची
नमस्कार (1:1-2)
भरोसे लेएक भुण जे हिम्मत देण (1:3-18)
यीशु मसीहे सच्चा फौजी (2:1-13)
परमेश्वरे बधिआ कारगीरी (2:14-26)
अखिर रोजी अन्तर कड़ा-क्लेश (3:1-9)
तिमुथियुस जे खास शिक्षा (3:10—4:8)
नीजी संदेश (4:9-18)
अखिर नमस्कार (4:19-22)