गलत शिक्षा शिचालणे बाड़े
4
1 शुची आत्मा सुसुर बोती कि एण बाड़े रोज अन्तर सुआ मेह्णु धोखा देण बाड़े मेह्णु के शिक्षा त दुष्ट आत्माई बारे शिक्षा मान कइ प्रभु यीशु पुठ विश्वास करण छड़ देन्ते। 2 ए तेन्हि झूठे मेह्णु के कपटे बझई जुए भुन्तु, जेन्के अन्तरात्मा मर गो असी।a 3 से ब्याह करण केआं मेह्णु ठाकते, त किछ खाणे चीज खाण ना देन्ते। पर परमेश्वरे खाणे चीज तोउं दुतो असी कि जे तेस पुठ विश्वास कते त सच्चाई पिछाणो असी, तसे धन्यवाद दी कइ खाए। 4 किस कि परमेश्वरे जे बि बणो असु, से सम्हाई खरु असे त खाणे लेएक असु। पर शर्त ईं असी कि परमेश्वरे धन्यवाद दी कइ खओ लौतु। 5 किस कि से परमेश्वरे वचन त प्रार्थनाई बेलि शुचे भोई घेन्ते।यीशु मसीह बधिया सेवक
6 बे कोईया, अगर तु विश्वासी भाई भेणि जे इन्हि बोकी के चेता दिआन्ता रेहन्ता त तु यीशु मसीहे बधिआ सेवक बणता। त विश्वासे वचन त जे खरी शिक्षा तेईं अभेईं तकर मनो असी, तेन्हि बोकी बइ तें लालन-पालन भुन्ता रेहन्ता। 7 पर बेधर्मी बोकी त स्याणी जिल्हाणु के मन गढ़त कथाई केआं दूर बिश, होर जीं यक खिलाड़ी कसरत कते रेहन्ता, तीं तु बि परमेश्वरे भक्ति अन्तर जीण जे पूरा कोशिश कते रेह। 8 किस कि जिसमे कसरते फायदा सद इस जिन्दगी अन्तर असा। पर परमेश्वरे भक्ति सम्हाई बोकी जे फायदामन्द असी, किस कि एस अन्तर इस टेमे जिन्दगी त एणे बाड़ी जिन्दगी जुबान असी।
9 ई बोक सच्ची त मानणे लेएक असी। 10 अस तोउं मेहनत त कष्ट कते, किस कि हें विश्वास तेस जीन्ता परमेश्वर पुठ असा, जे सम्हाई मेह्णु, खास कर विश्वासी मेह्णु बचाणे बाड़ा असा।
11 तु एन्हि बोकी के निआंग देन्ता रेह त शिचालते रेह। 12 तु परमेश्वरे वचन अन्तर, तें चाल चलण अन्तर, परेम त विश्वास अन्तर होर शुचे विचार अन्तर सम्हाई विश्वासी जे नमूना बण, ताकि तें कम उमरी बझई जुए कोई तें बोक अणशुणि ना करे, पर सोब पूरा मन लाई कइ शुणे। 13 जपल तकर अउं ना एईयाल, तपल तकर सतसंग अन्तर धरमे कताब पढ़ीण, शिचालण त प्रवचन देन्ता रेह। 14 परमेश्वरे जे वरदान तेन्धे दुतो असा, तस पूरे जोश जुए इस्तेमाल कर, किस कि ए वरदान सतसंगे स्याणी जपल तोउ पुठ हतेउ रख कइ प्रार्थना किओ थी, तपल भविष्य वाणि बेलि तोउ मेओ थी। 15 अन्हि बोकी मन लाई कइ ध्यान जोई कते रेह, जेसे बेलि सोब मेह्णु विश्वास अन्तर तें तरक्की हेरियेल। 16 अपु जीण त अपु प्रवचने पेहरा दिआ कर त इन्हि बोकी पुठ टिग बिश, किस कि अगर तु ईं कता रेहन्ता त तु सद अपफ जे ना, बल्कि जे तें बोक मानते, तेन्के बि बचणे बझह बणता।