सतसंग अन्तर पूजा अराधना करणे बारे शिक्षा
2
1 सोबी केआं पेहले अभेईं अउं तुसी जे हथ जोड़ कइ बोता कि परमेश्वरे सम्हाणि सोबी मेह्णु जे छनेअरे, विनती, प्रार्थना, त धन्यवाद करे। 2 परमेश्वरे सम्हाणि राजा त होरे मोटे अधिकारी जे बि प्रार्थना करे, ताकि अस सुख शान्ति जुए परमेश्वर पुठ विश्वास कर कइ त पूरी इज्जत जुए जी बटियेल। 3 ईं हें बचाणे बाड़ा परमेश्वर जे खरु लगतु त तस सुआ पसंद कता। 4 परमेश्वर ईं चहन्ता कि सोबी मेह्णु तसे सच्चाई सुसुर पता लगियाल त से सम्हाई बच घियेल। 5 किस कि यक परमेश्वर असा, होर परमेश्वर त मनखे बुच बि सद यक बचामी असा, से यीशु मसीह भो, जे इस धरती पुठ मेह्णु रूप अन्तर ओ थिआ। 6 तेन अपफ अपु मर्जी जुए अपु जान दी कइ सोबी बचाणे मुल दिता। होर इसे बेलि ए बि साबित भुआ कि परमेश्वर सच्चे बि मेह्णु बचाण चहन्ता, जे तेन अपु ठीक किओ टेम पुठ हरालु। 7 अउं सच बोता कि इस बझई जुए ईं अउं प्रचारक, त यीशु मसीहे प्रतिनिधि बणो असा।a परमेश्वरे अउं होरे जाति मेह्णु जे सच्चाई त विश्वासे शिक्षा देण जे नियुक्त किओ असा। ए बोक झूठ नेईं।8 तोउं त अउं चहन्ता कि तुस जेस जगाई बि सतसंग कते त सम्हाई मड़द अपु शुचे हथ खड़ियेर कइ प्रार्थना त दुआ करे। त ईं ख्याल रखे की तुं जिन्दगी परमेश्वरे लेएक असी, त तुं बुच लेहरीण त कोई झगड़ा भेएड़ा नेईं। 9 तिहांणि जिल्हाणु बि कउंचेई कइ त धीरज जुए बिशे। तेन्हि ना झशुड़ गुढि कइ, होर ना सुन्ने त कीमति मोती बेलि अपफ ठाटीण, बल्कि सुसुर झिणे लाई लुई त खरे कम कइ-कुइ अपु अपफ ठाटिए। 10 किस कि जे जिल्हाणु परमेश्वर मानती तस ए करण जचतु। 11 त सतसंग कते टेम जिल्हाणु हल्ला ना करण, पर पूरे ध्यान जुए शिचुण। 12 अउं बोता कि सतसंग कते टेम जिल्हाणु मड़द पुठ हुकुम ना चलाण, ना तस शिचालुण, पर अडोल बिशुण।b 13 किस कि परमेश्वरे पेहले मड़द “आदम” बणा, तोउं तसे जुएली “हब्बा” बणाई;c 14 होर पेहले शैताने आदम ना, बल्कि हब्बा ठगाई छइ त पापण बणि।d 15 तोउं त परमेश्वरे तसे धे शुली के टेम चिड़ंग दिती। तोउं बि अगर जिल्हाणु धीरज जुए विश्वास कती रेहन्ती, परेम जोई सोबी जुए उरतती-बरतती, होर अपफ शुचे रखती त बच घेन्ति।