प्रभु यीशु दुबारी एणे जे तेयार बिशुण
5
1 ए भाई त भेणिओं! प्रभु यीशु दुबारी एणे वकत त रोजे बारे तुसी जे किछ बि लिखणे जरूरत नेईं। 2 किस कि तुस अपफ जाणते कि जीं चोर राति अजगता एन्ता, तिहांणि प्रभु यीशु बि अजगता दुबारी एन्ता।a 3 जपल मेह्णु बोते कि “सुख शान्ति असी, कोई डर नेईं”, त तिखेईं जीं गभुरवाल जिल्हाणु शुले लगती, तीं तेन्हि पुठ अजगता आफत एन्ती त से किछ कर कइ बि ना बचते। 4 पर ए भाई त भेणिओं! इस बोकी बारे तुस अत बि अणजाण नेईं कि से रोज तुसी पुठ चोरे ईं अजगता एईयाल। 5 किस कि तुस सोब टगड़ियार त दिसाई कम करणे बाड़े असे। अस ना रात ना अन्हार अन्तर बिशणे बाड़े असे। 6 तोउं त अस होरी के ईं उंघो ना लौते, पर खड़ खड़ त चौकाने बिशो लौते। 7 किस कि जे उंघते, से ब्यादि उंघते, होर जे नशा कते, से बि ब्यादि ईं नशा कते। 8 पर अस त टगड़ियारी भिन्थ। त असी प्रभु यीशु पुठ विश्वास करणे त यकी होरी जोई परेम करणे कवच डब कइ त प्रभु यीशु जे असी बचान्ता, तेस बचणे उम्मीदे टोफ लाई कइ चौकाने बिश्ते।b 9 किस की परमेश्वरे असी अपु कोप जे ना, बल्कि हें प्रभु यीशु मसीह अन्तर बचुण जे ठीक किओ असु। 10 यीशु असी जे इस बझई जुए मुआ, ताकि अस चहे चौकाने बिशो भोल या मरो भोल, सोब मी कइ तेस जोई जीए। 11 तोउं त यक होरी हिम्मत दिए त यकी होरी के तरक्की करणे बझह बणे, जीं तुस करुं बि लगो असे।अखिरि बोके
12 त ए भाई त भेणिओं! अस तुसी जे हथ जोड़ते कि जे तुसी बुच कम कते, त प्रभु यीशु अन्तर तुसी बधान्ते, त तुसी शिचालते, तेन्के इज्जत करे। 13 त तेन्के कमे बझई जुए परेम जुए तेन्हि सुआ इज्जते लेएक समझे त अपफ बुच उई मी कइ बिशे।
14 ए भाई त भेणिओं! अस तुसी जे छनेअरे कते कि जे नकम्मे असे, तेन्हि समझाण दिए! डरो तेन्हि हिम्मत दिए! त जे कमजोर असे तेन्के मदत करे! त सोबी जुएई उई मी कइ बिशे! 15 हेरी बिशे कि कोई केसे नुकसाने बदले नुकसान ना करे। पर हर वकत खरु कम करण जे तेयार बिशे। अपफ बुच त होरी जोई भलाई करणे कोशिश कते रिहे। 16 हर वकत खुश बिशे। 17 त हमेशा प्रार्थना कते रिहे। 18 हर बोक पुठ धन्यवाद करे: किस कि यीशु मसीह अन्तर परमेश्वर चहन्ता कि तुस इहांणि करे। 19 शुची आत्माई कम ना रोके। 20 जपल कोई भविष्य वाणि करियाल त तसे बोकी पुठ ध्यान दिए। 21 हर बोक परखे, त जे खरी असी, तस मने। 22 केसे किस्मी बि बुराई ना करे।
अशुशी त नमस्कार
23 त अभेईं, जे परमेश्वर शान्ति देन्ता, से अपफ तुसी पूरा शुचा करे; त तुं आत्मा, प्राण, त तुं जिसम हें प्रभु यीशु मसीह दुबारी एण तकर बजन कोई दोषे त बचाई रखे। 24 जेन तुस भिहो असे, से यकीन लेएक असा त इहांणि कता।
25 ए भाई त भेणिओं! असी जे प्रार्थना करे।
26 सोब भाई भेणि जोई शुचे गड़ेमेड़े करे। 27 अउं तुसी प्रभु सोहो दिआन्ता कि इस चिट्ठि सतसंगे सोबी मेह्णु पढ़ कइ शुणाए।
28 हें प्रभु यीशु मसीहे कृपादृष्टि तुसी पुठ भुन्ति रिहे।
आमीन!