कुरिन्थुस शेहरे मेह्णु जे
प्रतिनिधि पौलुसे दोकी चिट्ठि
नमस्कार त शुरुवाती बोके
(1:1-11)
नमस्कार
1
1 ट्यारे कुरिन्थुस शेहरे परमेश्वरे सतसंग त पूरे अखया राज्य परमेश्वरे चुणो मेह्णुओ! अउं पौलुस, जे परमेश्वरे इच्छाई बेलि मसीह यीशु प्रतिनिधि असा त हें भाई तिमुथियुस, तुसी जे नमस्ते कते।2 हें परमपिता परमेश्वरे त प्रभु यीशु मसीहे कृपादृष्टि तुसी पुठ भुन्ति रिहे त तुसी शान्ति मेती रिहे।
आमीन
पौलुस परमेश्वरे धन्यवाद करण
3 चले, अस हें परमेश्वरे त हें प्रभु यीशु मसीहे बोउए धन्यवाद कते, जे दाह कता त सुख चैन देन्ता। 4 से असी सोब परेशानी अन्तर बि सुख चैन देन्ता, ताकि अस बि, जे परेशान असे तेन्हि सोबी जे तेस सुख चैन दी बटुं, जे तेन हें धे दुतो असा। 5 आं! जीं असी मसीह जे सुआ कष्ट त परेशानी असी, तीं मसीहे बेलि बि असी जे सुख चैन बि असा। 6 अगर अस परेशान असे त तुं बचुण त सुख चैन जे। होर अगर असी सुख चैन मेओ असा त तुं सुख चैन जे, जेसे बेलि जे दुख तकलीफ अस सेहन्ते, तस तुस बि धीरज धर कइ सेह बटियेल। 7 तुं बारे असी पूरा यकीन असा कि जीं कष्ट सेहणे अन्तर तुसी हें साथ दुतो असा, तीं हें सुख चैन अन्तर बि तुसी सुख चैन मेता।
8 ए ट्यारेओ! एशिया इलाके अन्तर असी पुठ जे जे कष्ट आ, अस ई ना चहन्ते कि तसे बारे तुस अणजाण रेह। अस एत भुंजो थिए कि जीणे उम्मीद असी छड़ दुतो थी। 9 आं! सच बोलियेल त असी त लगु कि शयद असी मरणे सज्जा मेओ असी। पर ए सोब इस बझई जुए भु, ताकि अस अपु ताकत पुठ ना, बल्कि परमेश्वरे ताकत पुठ भरोसा कते, जे मरो तेन्हि दुबारी जीआन्ता। 10 त जेन असी तेस ईं मरणे हालत केआं बचा, से हउ बि असी बचान्ता। तेस पुठ हें उम्मीद असी कि भविष्य अन्तर बि से असी बचान्ता रेहन्ता। 11 अगर असी जे प्रार्थना कर कइ तुस बि हें मदत कते त सुआ जेईं के प्रार्थना बेलि प्रभु असी अशुश देन्ता। होर सुआ जेईं तसे धन्यवाद कते।
पौलुस त कुरिन्थुस शेहरे सतसंग
(1:12—7:16)
पौलुस अपु घेणे योजना बदलीण
12 अस इस बोकी पुठ रोभ किढ़ बटते त हें अन्तरात्मा बि इ उगाह देन्ती कि असी पूरी सच्चाई जुए, शुची जिन्दगी जीओ असी, खास कर तुं सामणि। ए असी मेह्णु दुतो ज्ञाने बेलि नेईं किओ, बल्कि परमेश्वर केआं भुओ कृपादृष्टि बेलि। 13 तुसी जे अस कुछ होरु नेईं लिखुण लगो, बल्कि सद सेईंए, जे तुस पढ़ बटते त बिझ घेन्ते। त अभेईं, जीं तुस हें बारे धिक धिक समझो असे, मोउं उम्मीद असी कि अखिर अन्तर तुस पूरु समझ घेन्ते। 14 तोउं, यीशु मसीहे एणे रोज तुस असी पुठ रोभ लान्ते त अस तुसी पुठ।
15 किस कि मोउं इस बारे पूरा यकीन थिआ, त मेईं तुं आ जे एणे मन बड़ो थिआ ताकि तुसी में बेलि दुई दुई लिंग अशुश मेईंयेल। 16 मेईं त सोचो थिउ कि मकिदुनिया राज्य घेण पेंत, तुस केईं एऊं त पैठते टेम बि तुसी केईं एऊं ताकि यहूदिया राज्य वापिस घेण जे तुस में किछ मदत करियेल। 17 त ई उपाय करुं अन्तर, मेईं कि जल्दबाजी की ना? की अउं होरे मेह्णु के ईं अपु फायदा लिए अभेईंए “हाँ, हाँ” त अभेईंए “ना, ना” बोलुण जे तेयार असा ना? 18 कदी ना! जीं परमेश्वर यकीन लेएक असा, तीं तुसी जे अस बि यकीन लेएक असे। त हें “हाँ” हमेशा “हाँ” असा, त हें “ना” हमेशा “ना” असा। 19 होर परमेश्वरे कुआ यीशु मसीह हमेशा यकीन लेएक असा, जेसे बारे अउं पौलुस, सिलवानुसa त तिमुथियुस तुं बुच प्रचार किओ असा। से कदी झूठ ना बोता। 20 त यीशु मसीहे बेलि ईं परमेश्वरे सम्हाई जुबान हमेशा पूरी भुन्ति। तोउं त, परमेश्वरे महिमा भुण जे अस यीशु मसीहे बेलि “आमीन” बोते। 21 त परमेश्वर ईं असा, जे तुसी त असी, मसीह पुठ मिआई कइ बसान्ता त 22 असी पुठ अपु मुहर लाई कइ तेन अस नियुक्त किओ असे। अपु आत्मा निशाणी तौर पुठ हें अन्तर छोओ असी।