अखिर बोक
(16:1-24)
विश्वासी मेह्णु जे चन्ना कठेरण
16
1 ए ट्यारेओ! यरुशलेम शेहरे विश्वासी मेह्णु जे, जे चन्ना कठेरण बारे तुसी पुछो थिउ, तस बारे अउं ई बोता कि जीं मेईं गलाती राज्ये हर सतसंग जे बोलो असु, तुस बि तिहांणि करे। 2 से ईं असु कि हफ्ते पेहलकण रोज (मतलब हर ऐतवारे) तुसी बुचा हर यक जेईं अपु अपु कमाई हिसाब जोई किछ रुपेई बखरे कर कइ सम्हाड़ी रखण, ताकि जिखेईं अउं एऊं त तुसी चन्ना कठेरणे जरूरत न पड़ियेल। 3 होर, जपल अउं तठि पुजाल त तुं कठेरो चन्ना जेन्हि तुस चुणते, तेन्हि केईआं यरुशलेम शेहर जे लंघाई छता। त तेन्के धे चिट्ठि लिख कइ बि देन्ता कि ए मेह्णु तुसी लंघो असे। 4 अगर तुसी लगतु कि में घेण बि जरूरी असु त जिखेईं अउं घिउं तिखेईंए से बि मोउं जुए साते एई बटते।सफर बारे पौलुसे योजना
5 अउं मकिदुनिया राज्य बइ तुसी केईं एन्ता, किस कि मेईं मकिदुनिया राज्य बइ घेणे सोचो असु। 6 पर भोई बटतु कि किछ वकत अउं तुसी जोई बिशुण या ईं बि भोई बटतु कि अउं पूरा हियुंत तुसी जोई कटुण। तढ़िया पता, मोउं जेस कनार बि घेण भोल, तुसी में मदत करीण। 7 किस कि अब अउं बथ एन्ते घेन्ते तुसी जोई मिइण न चहन्ता। पर मोउं भरोसा असा कि अगर प्रभु चहाल त किछ वकत तकर अउं तुसी जोई बिश्ता। 8 पर अउं पिन्तेकुस्ते त्योहार तकर इफिसुस शेहर बिश्ता। 9 किस कि इठि खुश खबरी प्रचार करणे लिए मोउं अब्बल मौका मेओ असा, त इठि खुश खबरी खिलाफ बि सुआ जेईं असे।
10 अगर तिमुथियुसa पूज घियाल, त तसे खरी खातिरदारी करे, किस कि में ईं से बि प्रभु कम करण लगो असा।b 11 कोई जेईं तेस पराया न समझे। पर तसे सफर अन्तर हर कनारा तसे मदत करे, ताकि से सुसुर इठि मोउं केईं पूज घियाल, किस कि अउं तेस होरे विश्वासी भाई जोई एणे बोडी बेशब्री जोई भाड़ण लगो असा।
12 हें भाई अपोलुसेc बारे मोउं तुसी ई बताण असु कि मेईं तस जे होरे भाई जुए तुसी केईं एण जे बार बार बोलु, तोउं बि से एण ना चह। पर अगर मौका मेईंयाल त से एई घेन्ता।
अखिरि बोक त नमस्कार
(16:13-24)
13 चौकाने भोई बिशे त मसीह पुठ विश्वास अन्तर मजबूत भोई घिए। मसीह जे हिम्मत करे त परमेश्वरे शक्ति बेलि ताकतवर बण घिए। 14 तुस, जे कुछ बि कते, तस परेम जुए करीण दिए।
15 तुसी त पता असा की तुं अखया राज्य अन्तर सोबी केआं पेहले भाई स्तिफनासे टब्बरे मसीह पुठ विश्वास किआd त परमेश्वरे शुचा मेह्णु के सेवा करण जे बि से हमेशा तेयार बिश्ते। 16 त अउं तुसी जे हथ जोड़ता कि तुस एन्के ईं मेह्णु के वश अन्तर बिशे। सद एन्केरी ना, बल्कि तेन्के सोबी के वश अन्तर बिशे जे इस सेवाई कम अन्तर कष्ट कते। 17 भाई स्तिफनास, फुरतुनातुस त अखईकुसे एणे बेलि अउं तीं खुश असा, किस कि तेन्हि जुए मी कइ मोउं तुं याद एन्ती। 18 त तेन्हि एई कइ मोउं त तुसी बि शान्ति दिती। तोउं त, एन्के ईं मेह्णु के खरी इज्जत करे।
नमस्कार
19 एशिया इलाके सोब सतसंग तुसी जे नमस्ते कते। भाई अक्विला त तसे जुएली प्रिस्का त तेन्के गी भुणे बाड़ी सतसंग बि प्रभु नओं पुठ तुसी जे नमस्ते कते।
20 इठियाणि सोब जेईं तुसी जे नमस्ते कते। सोब भाई भेण जे शुचे गड़ेमेड़े करे।
21 अउं पौलुस बि तुसी जे अपु हतेउ बइ ए नमस्ते लिखता।
22 अगर कोई प्रभु जे परेम ना कता, तस पुठ परमेश्वर केआं शराप लगो लौता। अउं त बोता “ए प्रभु, आई।” 23 प्रभु यीशु कृपादृष्टि तुसी पुठ भुन्ति रिहे। आमीन
24 जे मसीह यीशु पुठ विश्वास कते तुसी सोबी जेईं जोई अउं परेम कता।