दुबारी जीणे बारे शिच
(15:1-58)
मसीहे दुबारी जीणे बारे
15
1 ए ट्यारेओ! अब अउं फि तुसी यीशु मसीहे तसे खुश खबरी याद दिआन्ता, जे पेहले शुणाई छओ असी। से खुश खबरी तुसी मनो बि थी त तेस अन्तर तुस मजबूत भोई कइ बिशो बि असे। 2 अगर तुस तेस खुश खबरी, जे मेईं तुसी शुणो थी सुसुर याद रखते त तेस बेलिए परमेश्वर तुसी बचान्ता। पर अगर तुस बिसरी गो असे त तुं विश्वास करण बेकार भोई गा। 3 तोउं त मेईं सेईंए समाचार जे सोबी केआं खास असा, तुसी केईं पुजाई छड़ा, जे मोउं केईं पुजो थिआ। से समाचार ई थिआ कि धरमे कताबे हेसाब जोई यीशु मसीह हें पापी के लिए मर गा। 4 होर कब्र अन्तर रखा त धरमे कताबे हिसाब जोई टेके रोजे जी बि गा।a 5 होर तेन पतरस दर्शण दिता त तढ़िया पता होरे रोज बाराह चेली के सामणि बि आ।b 6 फि से पन्ज सौ केआं बि ज्यादे विश्वासी भाई भेणि केई गा, जेन्हि अन्तरा सुआ जेईं अपल तकर बि जीन्ते असे त केहि मर मुख गे। 7 तोउं से याकूब केई गा त तढ़िया पता होरी सोबी प्रतिनिधि बि केई गा।8 होर सोबी केआं पता से मोउं बि केई गा, जे सतुआंचु गभुर ईं बेटेमे तसे चेला बणा। 9 त सोबी प्रतिनिधि अन्तर में कोई खासियत नेईं। अउं त तसे प्रतिनिधि बणणे जोग बि ना थिआ, किस कि अउं परमेश्वरे सतसंग भुंजान्ताथ। 10 तोउं बि, परमेश्वरे कृपादृष्टि कर कइ अउं अपु प्रतिनिधि बणा। मोउं पुठ तसे कृपादृष्टि जब्बर असर भुआ किस कि मेईं होरे सोब प्रतिनिधि केआं बि ज्यादा खुश खबरी लिए कष्ट किआ। ए मेईं अपु ताकते बेलि ना, बल्कि परमेश्वरे कृपादृष्टि बेलि किउ, जे मोउं पुठ भो असी। 11 त खुश खबरी चहे मेईं प्रचार किआ या होरे प्रतिनिधि किआ, तसे कोई मतलब नेईं। खास बोक त ई असी कि तुसी तेस पुठ विश्वास किआ।
मरो मेह्णु के दुबारी जीणे बारे शिक्षा
12 त अगर असी “यीशु मसीह मर कइ दुबारी जी गा” बोल कइ तुसी बुछ प्रचार किओ असे त तुस कीं कइ बोते कि मरो मेह्णु दुबारी ना जीएईन्ते? 13 अगर मरो मेह्णु दुबारी ना जीएईन्ते त तुस ए बि माने कि मसीह बि मर कइ दुबारी जीआ ईं नउ। 14 त अगर मसीह मर कइ दुबारी ना जीआ त हें प्रचार करण बेकार असा त तुं विश्वास करणे बि कोई फायदा नेईं। 15 अगर मरो मेह्णु दुबारी ना जीएईन्ते त असी सोबी प्रतिनिधि परमेश्वरे बारे बि झूठे उगाह दुतो असा, किस कि असी ई उगाही दिती कि परमेश्वरे मसीह दुबारी जीआ। 16 किस कि अगर मरो मेह्णु दुबारी ना जीएईन्ते त परमेश्वर मसीह बि दुबारी ना जीआ। 17 होर, अगर परमेश्वरे मसीह दुबारी ना जीआ त तुं तेस पुठ विश्वास करण बि बेकार असा त तुस अभेईं बि अपु अपु पापे वश अन्तर असे। 18 होर जे मसीह पुठ विश्वास कर कइ मर गो असे, से बि खतम असे। 19 अगर अस सद इस मतोके जीवने लिए मसीह पुठ उम्मीद रखते त असी केआं बोडे नभागे होरे कोई नेईं।
20 पर सच्चाई त ई असी कि परमेश्वरे दुबारी जीणे बाड़ी के बुछ सोबी केआं पेहले मसीह जीआ त ई हरालु कि विश्वासी मेह्णु बि दुबारी जीएईन्ते। 21 किस कि जीं पेहला मेह्णु आदमे बेलिए मौत आई, तीं दोका मेह्णु यीशु बेलिए मर कइ दुबारी जीण बि आउ। 22 होर जीं आदमे पापीc के बझई जुएई असी सोबी जेईं जे मरुण आउ, तिहांणि मसीह पुठ विश्वास करणे बेलिए सोब विश्वासी जे दुबारी जीण बि आउ। 23 पर परमेश्वर असी सोबी अपु अपु बारी जोई जीआन्ता। तेन पेहले त हें मुखिया मसीह जीआ। तढ़े पता तसे दुबारी एणे टेम तस पुठ विश्वास करणे बाड़े सोबी मेह्णु जीआन्ता। 24 तढ़िया पता, मसीह सोबी राज, अधिकार त शक्ति खतम कर कइ राज्य परमपिता परमेश्वरे हवाले कइ छता। तोउं भुमण उदल-बदल भोई घेन्ता। 25 किस कि जपल तकर मसीह अपु सोबी बैरी दुश्माणी अपु खुर पड्डे रुढ़ाई ना छता, तपल तकर तस राज्य पुठ राज करण जरूरी असु। 26 त सोबी केआं अखिर अन्तर जे बैरी दुश्माण खतम करिन्ता, से भो “मौत”। 27 किस कि धरमे कताब अन्तर लिखो असु कि
“परमेश्वरे सोब किछ तसे खुर पड्डे कइ छो असु।”
एसे मतलब कि सोब किछ मसीहे वश अन्तर कइ छोउ असु। पर जेन “सोब किछ” मसीहे वश अन्तर कइ छओ असु, से अपफ एस केआं बखरे बिशा। 28 होर जपल सोब किछ मसीहे वश अन्तर भोई घियेल, तोउं कुआ बि अपफ तसे वश अन्तर भोई घेन्ता, जेन सोब किछ तसे वश अन्तर कइ छो असु, ताकि पूरी तरह सोबी पुठ परमेश्वरे अधिकार भोल।
29 अगर मरो से जीएईन्ते नउ त जे मेह्णु मरो असे तुस तेन्के लिए किस पुओणि अन्तर चुसीन्ते? तेन्के लिए पुओणि अन्तर चुसुणे बेलि की फायदा असा? 30 अगर मरो से जीएईन्ते नउ त अस बि किस हर घड़ी अपु जिन्दगी खतरे अन्तर छते? 31 ए ट्यारेओ! मोउं तेस घमण्डे सोह, जे हें यीशु मसीह अन्तर अउं तुं लिए कता, कि अउं हर रोज मरणे सामणा कता त मर मर कइ जीन्ता। 32 मेह्णु के हिसाब जुए बोलियेल त अगर मरो मेह्णु दुबारी ना जीन्ते त इस इफिसुस शेहरे जंगली जानवर ईं खुंखार मेह्णु सामणा करणे में की फायदा? इस केआं त खरु असु कि तीं करुं जीं से बोते ना कि
“चले, खाई पी मज्जे कते, किस कि शुई केन काउ!”d
33 तुस ना ठगीए! तुसी ठीक ठाक पता असा कि बुरी संगत, खरे मेह्णु बि बिगाड़ छती। 34 सुधरीण दिए त पाप करण छड़ दिए, किस कि तुं बुछ केहि केहि असे जे ना परमेश्वर जाणते, होर ना परमेश्वरे वचन जाणते। अउं तुसी लजेरण जे ई सोब बोता, किस कि होश करीण तुं लिए खरु असु।
दुबारी जीणे जिसमे बारे
35 तुं बुछ शयद कोई ई पुछता “मरो मेह्णु कीं कइ दुबारी जीन्ते? तेन्के जिसम कीं भुन्ता?” 36 मुर्खो! तुसी कि अतु बि पता नेईं ना कि जे बि तुस बांते, जपल तकर से ना मरते, लुंगते नउ। 37 होर बाओ चीज त लुंगो चीज की यके भुन्ति ना? तेन्के जिसम होरा ना भुन्ता ना? तुस त बस गिहुंए या होरे अनाजे बिएजु फटान्ते। 38 पर परमेश्वर अपु इच्छाई मुताविक तेन्हि रूप देन्ता त हर यक बिएजु डाए अपु अपु रूप भुन्ता। 39 किस कि सोबी के जिसम यक ना भुन्ता। मनखे जिसम अलग भुन्ता त जानवरी के जिसम अलग भुन्ता। चड़ी चखुरु के जिसम अलग भुन्ता त मछली के बि अलग भुन्ता। 40 अम्बरे चीजे असी त धरती बि असी: पर अम्बरे चीजी के शान अलग भुन्ति त धरती चीजी के शान अलग। 41 दिसे चमकुण, जोसणी चमकुण केआं अलग असु, होर तारी के चमकुण बि अलग असु किस कि यक तारा होरा तारा केआं अलग चमकता।
42 त मरो मेह्णु दुबारी जीणे बि तिहांणि भुन्तु। बाणे पता, जीं यक बिएजु खतम भोई कइ होरी रूप अन्तर दुबारी जी घेन्तु, तिहांणि हें जिसम बि खतम भोई कइ जे जिसम जीएईन्ता से कदी खतम भुणे बाड़ा न भुन्ता। 43 जे जिसम पथिन्ता तेस अन्तर कोई खासियत न भुन्ति त से कमजोर भुन्ता। पर जे जिसम जीएईन्ता से शाने बाड़ा त शक्तिशाली भुन्ता। 44 जे जिसम पथिन्ता, से इस मतोके जिसम भो, पर जे जिसम जीएईन्ता से स्वर्गे भुन्ता। किस कि जीं इस मतोक अन्तर हें जिसम असा, तीं स्वर्ग अन्तर बि हें जिसम असा। 45 धरमे कताब अन्तर बि लिखो असु कि,
“परमेश्वरे पेहले आदम बणा
त तस अन्तर फूक दी कइ पेहला जीन्ता मेह्णु बणा।”e
होर अखिरि आदम मतलब यीशु मसीह शुची आत्माई बेलि हें धे जीवन देन्ता। 46 पर सोबी केआं पेहले हेन्धे इस मतोके जिसम दिई गो असा, तढ़िया पता स्वर्गे जिसम दिईन्ता। 47 परमेश्वरे पेहला मेह्णु धरती जने बइ बड़ा त दोका मेह्णु यीशु मसीह स्वर्ग केआं अओ असा। 48 जीं से पेहला मेह्णु जने थिआ, तीं इस मतोके अस सोब मेह्णु बि तसेरी ईं जने असे। होर जीं यीशु मसीह स्वर्गे भो, तीं स्वर्ग अन्तर घेणे बाड़े मेह्णु बि स्वर्गे भो। 49 होर जीं अस जने बड़ाओ तेस पेहले मेह्णु रूप अन्तर असे, तिहांणि अस तसे रूप अन्तर बि जीएईन्ते जे स्वर्गे केआं अओ असा।
50 ए ट्यारेओ! अउं ई बोता कि लहुए त मासे इस जिसम जुए, अस परमेश्वरे राज्ये हकदार बण ना बटते, होर ना खतम भुणे बाड़ा हें जिसम अमर भुणे हकदार भोई बटता। 51 शुणे। अउं यक नियोको बोक बोता कि अस जे मसीह पुठ विश्वास कते, अस ना मरते, पर अस सोब बदली घेन्ते।f 52 जपल अखिर रेशमिg बजती, त तिखेईंए, टीर झपकते ईं पेहले त जे मर गो असे से अमर भुण जे जी घेन्ते। तोउं तेन्के पता अस जे जीन्ते असे, अस बि अमर भुण जे बदली घेन्ते। 53 किस कि ए जरूरी असु कि खतम भुणे बाड़ा हें जिसम बदली कइ तीं बणे, जे कदी ना खतम भुन्ता। होर मतोके हें जिसम बदली कइ तीं बणे, जे स्वर्ग अन्तर अमर भुणे लेएक असा। 54 त जपल खतम भुणे बाड़ा हें जिसम अमर बणता, त मतोके हें जिसम स्वर्गे लेएक बणता। तोउं धरमे कताब अन्तर जे ईं लिखो असु, से पूरा भुन्तु कि
“परमेश्वरे मरणे ताकत खतम कइ छड़ी।”h
55 तोउं त मरणे डर अब केसे नेईं।
मरणे विष अब की कता?i