सवाल करणे लेएक रीति रिवाजे बारे सलाह
(8:1—11:1)
भकत चढ़ो चीज खाणे बारे
8
1 आं, होरी यक बोक! भकत चढ़ो चीजे बारे असी पता असा कि “असी सोबी केईं ज्ञान असा”। एस ज्ञाने बेलि मेह्णु रोभ किढ़ते, पर परेमे बेलि सुहलियत भुन्ति। 2 अगर कोई सोचता कि तस कुछ पता लग गो असा, त तस जेसे बारे पता भुण लौताथ, तेस बारे तस अभेईं तकर कुछ पता नेईं लगो। 3 पर अगर कोई परमेश्वर जोई परेम कता, त परमेश्वर तस जाणता।4 त, मुर्ति केईं चढ़ो चीजे खाणे बारे असी पता असा कि मुर्ति त भुन्ति पर तेन्हि अन्तर परमेश्वरे कोई गुण ना भुन्ते। होर परमेश्वर छड़ दी कइ होर कोई नेईं। 5 आं, बेशक मेह्णु मानते कि स्वर्ग अन्तर त धरती पुठ भगवान असे (आं, जीं सुआ “भगवान” त “प्रभु” असे।) 6 तोउं बि अस सद यके परमेश्वर मानते। सेईंए बोउ असा, जेस केआं सम्हाई किछ अओ असु त जेसे लिए अस असे। हें सद यके प्रभु असा, मतलब यीशु मसीह जेसे बेलि सम्हाई किछ अओ असु त जेस बेलि अस असे।
7 पर सम्हाई जेईं ईं ना समझते। से चढ़ो चीजी प्रसाद समझ कइ खांते, किस कि से अभेईं तकर मुर्ति कुछ समझते। तोउं त तेन्के विश्वास कमजोर भुणे बझई जोई से अपफ जे दोष देन्ते। 8 पर तुस बोले, से प्रसाद कि असी परमेश्वरे सामणि खरा बणान्ता ना? तस ना खेआल त हें कुछ नुकसान न भुन्ता, होर, अगर खेआल बि त कुछ फायदा बि ना भुन्ता। 9 पर तुस चौकाने बिशे। ईं ना भो लौतु कि तुं ए समझदारी कम हेर कइ विश्वास अन्तर कमजोर मेह्णु दुबारी पाप ना कइ बिशियेल। 10 किस कि अगर कोई तें ईं समझदार मेह्णु देहेर अन्तर बिशो प्रसाद खांता केआल त कि तसे बि मन ना कता ना कि से बि मुर्ति जे चढ़ो चीजे खआल? 11 तोउं, तुं समझदारी बझई जुए विश्वास अन्तर कमजोर मेह्णु खतम भोई घेन्ता, जेस बचाण जे बि मसीह अपु जान दिती। 12 ईं ईं तुस अपु भाई खिलाफ कम कर कइ त तेन्के कमजोर विश्वास जे गोता दी कइ तुस मसीह खिलाफ पाप करण लगो असे। 13 तोउं त, में खांजे खाण अगर में भाई जे पाप करणे बझह बणता, त अउं तेस चढ़ो चीज कदी ना खऊं, ताकि अउं अपु भाई पाप करणे लुन्ज ना दिउं।