सतसंग अन्तर अपफ बुच झगड़े मुकाण
6
1 तुसी शरम अओ लौती कि तुस पापी त अधर्मी मेह्णु के कोर्ट कचेरी अन्तर अपु झगड़े घिन कइ घेन्ते, पर परमेश्वरे शुचे मेह्णु केईं ना घेन्ते। 2 तुस न जाणते ना कि परमेश्वरे शुचे मेह्णु मतोके न्याय कतेa? अगर तुसी मतोके न्याय करण असा त तुस छोटी मोटी कड़ी फैसला करणे जोग बि नेईं ना? 3 अस त पापी स्वर्गेदूती के बि न्याय कते। त फि इस मतोके झगड़े फैसला अस किस ना कइ बटते? जरूर कइ बटते। 4 तोउं बि अगर तुं रोजे कड़ी फैसला करण असा, त तुसी कम से कम सतसंगे तेस मेह्णु केईं घेण चहिए, जेसे सतसंग अन्तर कोई इज्जत नेईं। 5 ई अउं तुसी जे तोउं बोलुण लगो असा, ताकि तुसी धिक शरम एईयेल। सच्चे बि तुसी बुच यक बि अक्लदार मेह्णु नेईं ना, जे अपु सतसंगे भाई के फैसला कइ सकियाल? 6 तुसी बुच यक भाई होरे भाई कोर्ट कचेरी हंटता, से बि अविश्वासी के समाणि। त कि ए ठीक असु ना? 7 सच्चे बि, तुं मन अन्तर सुआ दुरबुध असी कि तुसी अपफ बुच कोर्ट कचेरी जागीर छेई। तुस अन्याय किस न सेहन्ते? अपु नुकसान किस न सेहन्ते? 8 पर तुस सद होरी जुए ना पर अपफ बुच बि खेईंते त यकी होरी नुकसान बि कते।9 तुसी पता नेईं ना कि बुरे मेह्णु परमेश्वरे राज्ये हकदार न बणते? ईं ना सोचे कि गलत तरीके जुए जिसमे संमंध रखणे बाड़े, मुर्तिपुजा करणे बाड़े, नाजायज रिश्ता रखणे बाड़े त अपु लिंगे मेह्णु जुए जिसमे रिश्ता रखणे बाड़े, परमेश्वरे राज्ये हकदार बणते। कदी ना! 10 त चोर, लालची, प्याकड़, ग्या देणार त भुंजाणार बि परमेश्वरे राज्ये हकदार न बणते। 11 आं! तुसी अन्तर बि कत जेईं इहांणि थिए, पर परमेश्वरे तुस यीशु मसीहे नओएं बइ त अपु आत्माई बइ धुआई कइ शुचे किए त धर्मी बड़ाए।
नाजायज रिश्ता रखण केआं दूर बिशे
12 केहि बोते कि “अस कुछ बि कइ सकते।”b पर अउं बोता कि सोब कुछ में फायदा जे नेईं। तुस बोते “सोब कुछ करण जे हें हक असा।” पर अउं बोता कि अउं अपफ केसेरी वश अन्तर भुण ना देन्ता। 13 केहि बोते “खाण जिसमे लिए असु त जिसम खाणे लिए।” पर अउं बोता कि परमेश्वर एन्हि दुहिए मुकाई छता। परमेश्वरे जिसम नाजायज रिश्ता रखण जे नेईं बणो, बल्कि अपु जिसमे बेलि तसे महिमा करण जे बड़ाओ असा, किस कि सेईंए हें मालिक भो। 14 परमेश्वर जीं अपु ताकते बेलि प्रभु यीशु मरो तेन्हि केआं दुबारी जीआ, तीं असी सम्हाई बि दुबारी जीआन्ता। 15 तुसी पता नेईं ना कि विश्वासी के जिसम मसीहे अंगे ईं असा?c त जपल अस केसे वेश्या जुए रिश्ता रखते त कि अस खरे कते ना? कदी ना! ईं करणे बेलि त अस मसीहे यक अंग नी कइ वेश्या जुओई जोड़ते। 16 तुसी पता नेईं ना कि जे बि केसे वेश्या जुए रिश्ता रखता, से तस जुए यक भोई घेन्ता, किस कि मड़दे त जिल्हाणु बारे धरमे कताब अन्तर लिखो असु,
“से दुहिए यक बण घेन्ते।”d
17 पर जे प्रभु जुए संगत कता से आत्मा अन्तर प्रभु जुए यक भोई गो असा। 18 तोउं त, नाजायज रिश्ता रखण केआं दूर बिशे। किस कि मेह्णु होरे जे बि पाप कता, से तसे जिसम केआं बाहर भुन्ता, पर जे नाजायज रिश्ता रखता, से अपु जिसमे खिलाफ पाप कता। 19 तुसी त पता असा कि तुं जे जिसम असा, से शुची आत्माई देहेर भो।e से आत्मा तुसी परमेश्वर केईआं मेओ असी त से तुं अन्तर बिश्ति। तुस अपु अपफ नेईं। 20 किस कि यीशु मसीहे अपु जाने कीमत दी कइ तुस खरीदो असे। तोउं त तुस अपु अपु जिसमे बेलि परमेश्वरे महिमा करे।