रोमी 12

विश्वासी मेह्‍णु के चाल चलण

(12:1—15:13)

मसीह अन्तर नोई जिन्‍दगी

1 तोउं त ए ट्यारेओ, अउं तुसी परमेश्वरे बोडी कृपा याद दिआई कइ छने कता कि तुस अपु अपफ परमेश्वरे जे यक ईं भकत बणे, जे शुची असी, होर जे सद परमेश्वर जे जीन्ता त जेस हेर परमेश्वर खुश भुन्ता। एईएं तुं सच्चे मन त आत्माई जोई परमेश्वरे पूजा अराधना भो। 2 इस मतोके मेह्‍णु के ईं न बणे। पर तुं मन बदलीणे हेसाब जोई परमेश्वर तुं चाल चलण बि बदलण दिए, जेसे बेलिए तुस परमेश्वरे खरी, तस खुश करणे बाड़ी त हर कनारी बइ सिद्ध इच्छा बिझियेल।

3 परमेश्वर केईआं मेओ कृपाई बझई जोई अउं तुसी अन्तरा हर यक जेईं जे बोता कि तुसी अपफ जे जीं समझुण चहिए, तेस केईआं बध कइ ना समझे। पर जीं परमेश्वरे हर यक जेईं कें धे जत विश्वास दुतो असा, तेस हेसाब जोई तुस अपु अपफ समझे। 4 किस कि जीं हें यक जिसम अन्तर सुआ अंग असे, होर सोबी अंगी के अपु अपु कम असे, 5 तिहांणि अस जे सुआ जेईं असे, मसीह अन्तर यक जिसमे ईं असे त अपफ बुच उई मी कइ यकी होरी अंगे ईं असे। 6 असी पुठ परमेश्वरे कृपाई हेसाब जोई असी अलग अलग वरदान मेओ असा। त जेस भविष्य वाणि करणे वरदान मेओ असा, से अपु विश्वासे हेसाब जोई भविष्य वाणि करे। 7 अगर सेवा करणे वरदान मेओ असा, त सेवा कते रिहे। होर अगर केसे शिचालणे वरदान मेओ असा त से बि तिहांणि शिचालते रिहे। 8 अगर हिम्मत देणे वरदान मेओ असा, त से हिम्मत देन्ते रिहे। दान देणे बाड़ा वरदान मेओ असा त खुले दिल जोई दिए। अगर नेता भुणे वरदान मेओ असा त तस पूरे जोश जुएई करे। अगर दाह दया करणे वरदान मेओ असा तस खुशी जोई करे।

9 परेम करण अन्तर कोई कपट ना करे, बुराई हेर नफरत करे, भलाई कते रिहे। 10 सोब भाईचारे जोई बिशे। होरी इज्जत करण अन्तर अपफ बुच यकी होरी केईआं बधते घिए। 11 कोशिश करण अन्तर सुस्त न बणे, अपु आत्मा जोश जुए रखे, होर प्रभु सेवा कते रिहे। 12 परमेश्वर पुठ अपु उम्मीदे बारे खुश रिहे, दुख तकलीफ अन्तर लाह रखे, हमेशा प्रार्थना कते रिहे। 13 विश्वासी मेह्‍णु के जरूरत पूरी करण जे तेन्के मदत करे, मेहमानी के खातिरदारी कते रिहे।

14 अपु भुंजाणे बाड़ी जे अशुश दिए; अशुश दिए, कदी शराप न दिए। 15 खुश बिशणे बाड़ी जोई खुश रिहे, रोलणे बाड़ी जोई रोलीण दिए। 16 अपफ बुच यक मन भोई बिशे। घमण्डी न बणे, पर गरीबी जोई उई मी कइ बिशे। अपणे आप अक्लदार न बणे। 17 बुराई बंटि केसे जोई बुराई न करे। तस कम करे जेसे बेलि सोबी मेह्‍णु के भलाई भुन्ति। 18 जोउं तकर भोई सकतु, तुस हर यक मेह्‍णु जोई परेम जोई बिशणे कोशिश करे। 19 ए ट्यारेओ, धरमे कताब अन्तर लिखो असु,

“प्रभु बोता कि बदला नेण में कम भो,

अउंए बदला नेन्ता।”

त तुसी कदी अपु बदला न नेण, पर तेस मेह्‍णु परमेश्वरे लेहेर जे छड़ दिए। 20 एस बंटि

“अगर तुं दुश्माण ढुका भोल त तेस खांजे खिलाण दिए,

अगर से टिशो असा त तेस पुओणि पिआण दिए,

किस कि ईं करणे बेलिए तुस तेन्हि लज लाई कइ फुकते

होर लजी बेलिए तेन्के किणहेरु धरती लगतु।”

21 बुराई केईआं हार न घिए, पर भलाई बेलिए बुराई जीतीण दिए।