10
1 ए ट्यारेओ, अउं पूरे मन जुए चहन्ता, होर इस्राएले मेह्णु लिए परमेश्वरे सामणि में प्रार्थना ईं असी कि से बच घियेल। 2 किस कि तेन्हि परमेश्वरे लिए लगाव त असा, पर अक्ल जोई ना। एसे उगाही अउं देन्ता। 3 किस कि तेन्हि परमेश्वरे मेह्णु धर्मी बणाणे बारे अणजाण भोई कइ, अपफ धर्मी बणणे कोशिश की। होर धर्मी बणाणे परमेश्वरे योजना ना मनी। 4 मसीह एणे बेलि नियमे कम पूरा भुआ, ताकि जे कोउं मसीह पुठ विश्वास कराल, परमेश्वर तस धर्मी बड़ाल।सोबी जाति बचाणे बत यीशु भो
5 मेह्णु सम्हाई नियम मान कइ धरमे करमे बेलि धर्मी भुणे बारे मूसे ईं लिखो असु कि
“जे मेह्णु नियम मानता,
से तसे बेलिए जीन्ता।”a
6 पर विश्वासे बेलिए धर्मी भुणे बारे धरमे कताब ई बोती कि
“तोउ अपु मन अन्तर ईं ना बोलुण कि
स्वर्ग तकर कोउं जेईं चढ़ता”b
(मतलब कि मसीह उन्न धरती पुठ जे अण्हियेल।)
7 या “काल खपर अन्तर कोउं जेईं घेन्ता?”c
(मतलब कि मसीह मरो तेन्हि अन्तरा दुबारी जीआई कइ खड़िया अण्हियेल।)
8 पर मसीह पुठ विश्वास कर कइ धर्मी बणो मेह्णु ई बोता जीं मूसे लिखो असु,
“परमेश्वरे वचन तुं भेएड़ असे,
से तुं मुंह अन्तर त
तुं मन अन्तर असे।”d
ए विश्वासे से समाचार भो, जेसे अस प्रचार कते। 9 तोउं त, अगर तु अपु मुंहे बइ यीशु जे “प्रभु” बोलाल, होर अपु पूरे मने बइ विश्वास करियाल कि परमेश्वरे से मरो तेन्हि अन्तरा दुबारी जीआ, त तु जरूर बचता। 10 किस कि धर्मी भुण जे मने बइ विश्वास करिए लौता, होर बचणे लिए मुंहुए बइ बोलिये लौतु। 11 धरमे कताब अन्तर ईं लिखो असु,
“जे कोउं तेस पुठ विश्वास करियाल, से कदी लजेईन्ता नउ।”e
12 यहूदी त गैर यहूदी मेह्णु अन्तर कोई केहर-बेहर नेईं, किस कि यीशु सोबी के प्रभु भो त जे बि तसे नओं नी कइ प्रार्थना कते, तेन्हि सोबी जे से खुल कइ अशुश देन्ता। 13 किस कि धरमे कताब अन्तर लिखो असु,
“जे कोउं प्रभु नओं नी कइ प्रार्थना करियेल,
से बच घेन्ते।”f
14 पर जेस पुठ तेन्हि विश्वास ना किआ, से तसे नओं नी कइ कीं प्रार्थना कते? होर जेसे बारे तेन्हि कदी शुणोरु नेईं, तेस पुठ कीं विश्वास कते? होर से शुणते बि कीं, अगर कोई शुणाणे बाड़ा ई ना भोल? 15 होर अगर लंघाल नउ, त कोई कीं कइ शुणान्ता त प्रचार कता? धरमे कताब अन्तर एसे बारे लिखो असु,
“तेन्के एण कतु शुभ असु,
जे खुश खबरी शुणान्ते!”g
16 पर सोबी से खुश खबरी ना मनी: जीं यशायाह भविष्य वक्ता बोता,
“ए प्रभु, केन हें समाचार पुठ विश्वास किओ असा?”h
17 तोउं, एसे मतलब भुआ ईं कि मेह्णु मसीह पुठ विश्वास करण लगो असे, किस कि तेन्हि तसे समाचार शुणो असे। से तोउं शुणते किस कि होरे मेह्णु मसीहे बारे प्रचार करण लगो असे।
18 पर मोखयाल कोउं जेईं पुछाल, कि मेह्णु सच्चे तसे समाचार न शुणा ना? अउं बोता कि तेन्हि जरूर शुणो असा; किस कि धरमे कताब अन्तर लिखो असु,
“शुणाणे बाड़ी के बोके पूरे धरती पुठ,
होर तेन्के समाचार धरती यक मुख केईआं होर मुख तकर पूज गो असा।”i
19 होर मोखयाल कोउं जेईं पुछाल, कि इस्राएली मेह्णु ना समझे ना? एसे बारे पेहले त मूसा बोता,
“जे तुं जाति न भो, तेन्के बेलिए अउं तुं मन अन्तर जड़ा लवान्ता;
होर मुर्खी के जाति बेलिए अउं तुसी लेहरारता।”j
20 तोउं परमेश्वरे बोलो बोक यशायाह भविष्य वक्ता बि खरी हिम्मत जोई लिखो असु,
“जे मोउं ना तोपतेथ, तेन्हि अउं मेई गा,
होर जे मोउं धरान्तेथ बि नउ, तेन्के सामणि अउं निस गा।”k
21 पर इस्राएली मेह्णु के बारे परमेश्वर ईं बोता,
“सुआ टेम केआं यक निआंग ना मानणे बाड़ी त मुहाबला करणे बाड़ी टजे कना जे,
मेईं अपु हथ टड रखे कि से मोउं केईं एईयेल।”l