रोमी 7

ब्याह बाड़े कथा

1 ए ट्यारेओ! तुस जे नियम जाणते, तुसी त ईं बि जरूर पता भोल कि नियमे राज सद तपल तकर रेहन्तु, जपल तकर मेह्‍णु जीन्ते भुन्ते? 2 किस कि नियमे हेसाब जुए ब्याहो जिल्हाणु अपु धाणि उमर भइ तेस जोई बन्हिएरी रेहन्ती। पर अगर धाणि मर घियाल त से तेस नियम केआं छूट घेन्ति, जेस नियमे बेलि से बन्हिए थी। 3 तोउं त, धाणि जीते जी अगर से केसे होरे मड़दे भोई घियेल त नाजायज रिश्ता रखणे बाड़ी बोलिन्ती। पर अगर धाणि मर घियाल, त से तेस नियमे शंकीड़ केआं छूट घेन्ति। होर पता अगर से केसे होरे मड़दे भोई बि घियेल त बि नाजायज रिश्ता रखणे बाड़ी ना बोलिन्ती।

4 तिहांणि ए में ट्यारेओ! तुस बि जपल मसीहे क्रूस पुठ मरणे बेलि अपु अपफ जे मर गे त तेस नियमे शंकीड़ केआं छूट गे। होर तुस यीशु भोई गो असे, जे परमेश्वरे मरो तेन्हि अन्तरा दुबारी जीआ, ताकि तुसी परमेश्वरे महिमाईं लिए फल फलियेल। 5 किस कि जपल अस अपु पुराणे सभावे बेलि जीन्तेथ, त बुरी इच्छा हें हर यक अंग अन्तर कम कतीथ, जे नियमे ताकते बेलि असी केआं पाप कराई कइ मौत पैदा कतीथ। 6 पर जेसे नियम अन्तर अस बन्हिए थिए, तसे लिए मर कइ अब छूट गो असे, ताकि लिखो तसे पुराणि रीत जोई ना, पर परमेश्वरे आत्माई नोई रीत जोई तसे सेवा कते।

मूसे दुतो नियमे बेलि पापे पिछाण भुण

7 मोखयाल, कोउं जेईं ई बोलियाल कि “नियम असी पाप करण जे लुन्जि देन्ता त नियम पाप भो”। अउं बोता, “कदी ना!” पर बजन नियमे अउं पाप ना पिछाणताथ। अगर नियम ना बोताथ “लालच ना कर” त लालच की भो, अउं ना जाणताथ। 8 पर इस निआंगे बेलि पाप मौका मेई गा त में पापे गुण में अन्तर सोबी किस्मे लालच पैदा कइ छड़ी, किस कि बजन नियमे पाप मुड़दे ईं असा। 9 पेहले अउं नियम ना जाणताथ, त मोउं पता बि नेओथ कि लालच करण बि पाप भो। पर जपल मोउं नियमे निआंगी पता लगा त मोउं अन्तर पाप जी गा। 10 होर एस बझई जोई अउं मर गा। जे निआंग मोउं जीवन देण जे थी, तेन मोउं जीवने बंटि मौत दिती। 11 किस कि पापे मौका हेर कइ निआंगी बेलिए अउं लचेरा, होर अउं मार बि छड़ा। 12 तोउं त नियम शुचे असे, होर नियमे निआंग बि शुची, सही त खरी असी।

13 त कि परमेश्वरे दुतो नियम, जे खरे थिए, मोउं तस केआं दूर कर कइ कि मोउं मारणे बाड़े भुए ना? कदी ना! पर पाप तेस खरे नियमे बेलिए मोउं जे मौत जमाणे बाड़ा भुआ। अब अस सुसुर हेर सकते कि पाप कत भयंकर असा।

मने लड़ाई

14 असी पता असा कि नियम परमेश्वरे केईआं असे। पर अउं जिसमे त लहु बाड़ा मनख भो त पापे गुलाम भो। 15 जे अउं कता, तेस ना जाणता। किस कि जे अउं करण चहन्ता तस ना कता, पर जेस हेर अउं नफरत कता, तस कता। 16 होर जेस करण जे अउं ना चहन्ता, अगर तस कता त अउं मन छता कि नियम खरे असे। 17 त ईं हाल अन्तर तेस करणे बाड़ा अउं ना भो, पर में अन्तर बसो से पाप भो। 18 किस कि मोउं पता असा कि अउं अपु जिसमे सभावे बेलि कोई बि खरे कम कइ ना बटता। खरे कम करणे चह त मोउं अन्तर असी, पर खरे कम में बेलिए भुन्ते ईं नउ। 19 किस कि जेस खरे कम करण अउं चहन्ता, तेन्हि त ना कता, पर जेन्हि बुरे कमी करण ना चहन्ता, तेन्हि कता रेहन्ता। 20 तोउं त, अगर अउं तेन्हि कमी कता, जेस करण ना चहन्ता, त तस करणे बाड़ा अउं ना भो, पर मोउं अन्तर बसो से पाप भो।

21 ईं कते-कुते अउं अपु जिन्‍दगी अन्तर हेरता कि जपल बि अउं कोई खरे कम करण चहन्ता, त में अन्तरी बुरी इच्छा मोउं तेस करण केआं रोकती। 22 किस कि मसीहे बेलिए मेओ नोउए सभावे बझई जोई परमेश्वरे नियम त मोउं ती ट्यारे असे। 23 पर अपु जिन्‍दगी अन्तर मोउं होर किस्मी नियम कम करणे केते। ए नियम में नोउए सभावे नियम जोई झगड़ीन्‍ते त मोउं पापे नियम अन्तर छइ छते, जे में जिन्‍दगी पुठ राज कते। 24 छी! अउं कत नभागा मेह्‍णु असा! मोउं एस पापे जिन्‍दगी केईआं कोउं बचान्ता? 25 हें प्रभु यीशु मसीहे बेलिए परमेश्वरे धन्यवाद लौतु भो, जेन मोउं जे ए कम किआ।

तोउं त, मसीहे बेलि मेओ अपु नोउए सभावे बेलिए अउं परमेश्वरे नियमे गुलाम भो, पर जिसमे बेलिए अउं पापे गुलाम भो।