मसीह अन्तर नोई जिन्दगी
(5:1—8:39)
धर्मी भुणे फल
5
1 तोउं त, किस कि हें प्रभु यीशु मसीह पुठ विश्वास करणे बेलि परमेश्वरे अस धर्मी बणो असे त तसे बेलिए अस परमेश्वर जोई मी गो असे। 2 मसीह अपु कमे बझई जोई विश्वासे बेलि अस परमेश्वरे कृपा तकर पुजाई छो असे त असी तसे कृपा बिझिण बि लगो असी। होर ई उम्मीद पुठ अस सुआ खुश असे कि असी परमेश्वर अपु महिमा अन्तर बिशुण देन्ता। 3 सद एईएं ना, अस त दुख तकलीफ अन्तर बि खुश बिश्ते, किस कि असी पता असा कि दुख तकलीफे बेलिए सीढ़णे ताकत बधती, 4 लाह रख कइ सीढ़णे बेलि परमेश्वर असी जे खरु बोता। तसे सामणि खरे भुणे बेलि अस पूरे यकीन जुए उम्मीद कइ सकते। 5 तेस पुठ हें उम्मीद असी कदी लजेरती नउ। किस कि से अपु दुतो शुची आत्माई बेलि हें मन अपु परेम जुए भर छता।6 किस कि जपल अस अपफ बचाण जे कमजोरे थिए, परमेश्वरे ठीक किओ टेम पुठ मसीहे एई कइ असी सोबी अधर्मी मेह्णु जे अपु जान दिती। 7 केस भलेमास मेह्णु लिए कोई मरे, ए भुण मुश्किल असु। पर भोई सकतु कि केस सुआ खास भलेमासे लिए शयद कोई मरणे हिम्मत कइ सकियेल। 8 पर परमेश्वरे असी जोई अपु परेम ईं कइ हराला कि जपल अस अपु अपु गलती त पाप अन्तर डूब गो थिए, हें बदले मसीह मरा। 9 तोउं त, किस कि अस अब तसे लहुए बझई जोई धर्मी बण गो असे, त तसे बेलिए परमेश्वरे लेहेर केआं जरूर बच सकते। 10 किस कि जपल अस परमेश्वर जुए बैरी ईं थिए, तपल तसे कोईया मरणे बेलिए हें मितरी तेस जोई भुई। त फि मितर बण कइ तसे कोईया जिन्नि बझई जोई अस कि घट बचते ना? 11 होर एन्हि सोबी केआं बध कइ, अस अपु प्रभु यीशु मसीहे बेलिए, परमेश्वर जुए खुश असे, किस कि तेन अस परमेश्वरे मितर बणाए।
आदमे बेलि मौत त मसीहे बेलि जीवन एण
12 तोउं त, जीं यक मेह्णु आदमे बेलिए मतोक अन्तर पाप आ, त तेस पापे बेलिए मौत आई,a तिहांणि मौत सोब मेह्णु अन्तर एई गई, किस कि सोबी गलती त पाप किआ। 13 परमेश्वरे अपु नियम देण केआं पेहले बि पाप मतोक अन्तर थिआ। पर जेठि नियम नेईं, तठि पाप ना गणिन्ता। 14 तोउं बि, आदम केआं खड़ मूसे तकर मौती तेन्हि सोबी मेह्णु पुठ बि राज किआ, जेन्हि तेस आदमे ईं निआंग न मानणे पाप ना किआ। से आदम एणे बाड़े तेस मसीहे ईं असा। 15 पर जे वरदान परमेश्वरे कृपा कर कइ दिता, से आदमे पापे ईं नेईं। किस कि तेस यक मेह्णु पापे बेलिए सुआ मेह्णु मरे, पर परमेश्वरे कृपा सुआ असरदार असी, होर तसे वरदान यक मेह्णु बेलि मतलब यीशु मसीहे कृपाई बेलि सुआ मेह्णु जे मेईंया। 16 होर परमेश्वरे वरदाने फल, तेस यक मेह्णु आदमे पाप करणे फले ईं नेईं, किस कि तसे यके पापे सज्जाई बेलि सुआ जेईं दोषी बणे। पर परमेश्वरे तेस वरदान, यीशु बेलिए सुआ गलती त पाप कर कइ बि मेह्णु धर्मी बण गे। 17 किस कि यक मेह्णु पापे बेलिए अगर मौती तेस यके जेईं बेलि सोबी पुठ राज किआ, त जेन्हि मेह्णु परमेश्वरे सुआ कृपा त धर्मी भुणे वरदान मेओ असा, से कि यके मेह्णु मतलब यीशु मसीहे बेलिए तेस जुए घट राज कते ना?
18 तोउं त, जीं आदमे यक पाप सोबी मेह्णु जे सज्जा देणे बझह बणा, तिहांणि यीशु यक धरमे कम बि सोबी मेह्णु के जिन्दगी लिए धर्मी बणाणे बझह बणा। 19 किस कि जीं यक मेह्णु आदमे निआंग ना मानणे बझई जोई सोब मेह्णु पापी बण गे, तिहांणि यक जेईं यीशु निआंग मानणे बेलिए सुआ मेह्णु धर्मी बण घेन्ते। 20 परमेश्वरे नियम तोउं दिता कि मेह्णु पता लगाल कि तेन्हि कत गलती त पाप किआ। पर तेन्के पाप सुआ भुन्ते भुन्ते, परमेश्वरे कृपा तढ़िया बि बध कइ भुई। 21 त जीं पापे मरणे बेलि सोबी पुठ राज किआ, तिहांणि परमेश्वरे कृपा बि हें प्रभु यीशु मसीहे बेलि, असी धर्मी बणाई कइ अमर जीवने लिए राज कती।