3
1 तुं बुचा मोखयाल कोउं जेईं ई बोलियाल, “त यहूदी भोई कइ जमणे की फायदा असा, होर अपु खतना कर कइ की फायदा असा?” 2 अउं बोता कि हर यक कनारा तेन्के फायदा असा। सोबी केआं पेहले त ई कि परमेश्वरे अपु वचन तेन्के पुरखी के जिम्म छो थिआ। 3 तेन्हि बिचा अगर केहि यकीन लेएक ना भुए त कोई गल नेईं। तेन्के यकीन लेएक ना भुणे बेलिए परमेश्वरे सच्चाई झुठी थोड़ी बणती? 4 कदी ना! चहे सोब मेह्णु झूठे बणियेल, पर परमेश्वर हमेशा सच्चा असा, जीं कि धरमे कताब अन्तर लिखो असु,“ताकि तु अपु बोकी अन्तर धर्मी बणाल,
होर न्याय कते टेम तु हमेशा जीताल।”a
5 पर, हें अधर्मे कमी के बेलि अगर परमेश्वरे न्याय त धरम सुआ सुसुर केता, त असी की बोलुण? कि ईं ना कि परमेश्वर इरुह लेहेर किढ़ता त सज्जा देन्ता? ई अउं मेह्णु के हेसाब जुए बोलुण लगो असा। 6 ईं कदी ना भोई सकतु कि परमेश्वर इरुह लेहेर किढ़ता! ना त से मतोके न्याय कीं कइ सकता? 7 मोखयाल कोउं जेईं ई बोलियाल कि “अगर में झूठे बझई जोई परमेश्वरे सच्चाई केती होर तसे महिमा बधती, त फि किस अउं दोषी बणाई कइ सज्जाई हकदार बणाई छो असा? 8 तोउं त खरु ई असु कि अस बुराई कते रिहे, ताकि तसे भलाई निस्ती रिहेल।” केहि मेह्णु असी पुठ ईं बोलुणे झूठा दोष बि लान्ते। पर परमेश्वर एन्हि मेह्णु पुठ दोष लाई कइ कोई गलत न कता।
कोई धर्मी नेईं
9 तोउं एसे मतलब की भुआ? अस यहूदी कि तेन्हि गैर यहूदी मेह्णु केआं खरे असे ना? कदी ना; किस कि मेईं पेहलाई बोल छो असु कि यहूदी त गैर यहूदी दुहे पापे वश अन्तर असे। 10 जीं कि धरमे कताब अन्तर लिखो असु :
“कोई बि धर्मी नेईं, यक जेईं बि नेईं।
11 कोई ईं नेईं, जे सही की असु समझ सकियेल;
ईं कोई नेईं जे परमेश्वरे इच्छा मनण चहन्ता।
12 परमेश्वर केईआं सोब उलाठ घेई गो असे,
सोब नकम्मे बण गो असे;
कोई भलाई करणे बाड़ा नेईं,
यक बि नेईं।b
13 तेन्के टेठु केईं खुली कब्रे ईं कुस्तुरी कुस्तुरी बोके निस्ती,
तेन्के मुंह केआं कपटी कपटी बोके घते छोए ईं निस्तु।c
तेन्के जिभुड़ पुठ कीड़े ईं जेहेर भुन्ता।d
14 तेन्के आसी बइ सद शराप त ग्या निस्ती।e
15 तेन्के हथ खुर मेह्णु मारण जे दौड़ते;
16 जेन बइ से कुमुले हंटते, तेस जगाई कदी पूरा ना भुन्ता।
17 तेन्हि शान्ति त भाईचारे जुए बिशुण ना एन्तु।f
18 तेन्हि परमेश्वर हेर कइ बि कोई डर ना लगता।”g
19 अस जाणते कि नियम अन्तर जे कुछ बि असु, से सोब तेन्हि जे असु जे नियमे वश अन्तर असे; ताकि परमेश्वरे सामणि कोई जेईं बि किछ बहाना ना बणाल, होर पूरा मतोक परमेश्वरे सज्जा मेणे लेएक बणियाल। 20 किस कि, नियम मान कइ कोई बि मेह्णु परमेश्वरे समाणि धर्मी ना बणता। बल्कि नियमे बेलि असी गलती त पापे पिछाण भुन्ति।
परमेश्वरे इच्छा - विश्वास करणे बेलि बचुण
(3:21—4:25)
यीशु पुठ विश्वास करणे बेलि धर्मी बणण
21 पर असी बचाणे से चाका परमेश्वरे अभेईं कुढ़ो असा। से नियम मान कइ धर्मी बणुण केआं अलग असा, जेसे उगाह मूसे दुतो नियम अन्तर त भविष्य वक्ती के बोकी अन्तर असा। 22 मतलब कि से चाका यीशु मसीह पुठ विश्वास करणे बेलि पूरा भुन्ता। परमेश्वर सोबी विश्वास करणे बाड़ी धर्मी बणान्ता, किस कि तसे सामणि सोब यक असे। कोई केहर-बेहर नेईं। 23 किस कि सोबी गलती त पाप किओ असे त परमेश्वरे महिमा मेणे लेएक नेईं रिहो। 24 पर परमेश्वरे कृपा कर कइ, यीशु मसीहे बचाणे कमे बेलि सोब धर्मी बणो असे। 25 परमेश्वरे से हें बचाणे भकत बणाई कइ लंघा, ताकि तसे क्रूस पुठ मरणे बेलि, तस पुठ विश्वास कर कइ अस धर्मी बण घियेल। ईं कर कइ परमेश्वरे हरालु कि इस केआं पेहले जेन्हि मेह्णु गलती त पाप किओ थिए, तेन्हि जुए लाह रख कइ त तेन्हि माफ कर कइ तेन सही किउ। 26 होर इस टेम एसे बेलि ई बि केई घेन्तु कि परमेश्वर धर्मी असा त जे यीशु पुठ विश्वास कते, तेन्हि धर्मी बणान्ता।
27 त मेह्णु केस बोक पुठ अक्कड़ लान्ते? केसे पुठ बि से अक्कड़ लाई ना सकते। किस कि से नियम मानणे बेलि नेईं, बल्कि विश्वास करणे बेलि धर्मी बणो असे। 28 तोउं त, अस एस नतीजे पुठ पुजो असे कि मेह्णु नियम मान कइ ना, बल्कि विश्वास करणे बेलिए धर्मी बणता। 29 तुस ई ना सोचे कि परमेश्वर सद यहूदी मेह्णु जोई परेम कता, होर गैर यहूदी मेह्णु जोई परेम ना कता। अउं त बोता कि से गैर यहूदी मेह्णु जोई बि परेम कता। 30 त किस कि यके परमेश्वर असा, त से खतना किओ यहूदी मेह्णु विश्वास बेलिए धर्मी बणान्ता, होर बगैर खतने बाड़ी गैर यहूदी मेह्णु जे बि तेसे विश्वासे बेलिए धर्मी बणान्ता। 31 त कि विश्वासे बेलिए अस नियम बेकार बणान्ते ना? कदी ना! बल्कि अस नियम पूरा कते।