राज्यपाल फेस्तुसे सम्हाणि पौलुस अपु बचाव करण
25
1 राज्यपाल फेस्तुस कैसरिया शेहर पुजुण केआं टाई रोज पता तठिआ यरुशलेम शेहर जे गा। 2 तिखेईं मुख्य पुजारे त यहूदी के खास खास मेह्णु तसे सम्हाणि पौलुसे खिलाफ इलजाम ला। 3 होर तसे छने कर कइ बोलु कि पौलुस यरुशलेम शेहर वापस लंघाए। तेन्हि ईं तोउं बोलु किस कि तेन्हि बथ तेस मारणे किओ थी।4 पर फेस्तुसे जवाब दिता, “पौलुस कैसरिया शेहर अन्तर कैद असा, होर अउं अपफ बि झठ तठि घेण लगो असा। 5 त तुसी बिचा खास खास मेह्णु मोउं जोई साते हंटे। अगर तेन मेह्णु कोई बुरे कम किओ असे त तेस पुठ तुस इलजाम लाए।”
6 अठ दस रोज तठि बिशणे केआं पता राज्यपाल फेस्तुस कैसरिया शेहर जे घेई गा। त दोके रोजे न्याय करणे कुण्सी पुठ बिश कइ पौलुस अण्हणे निआंग दिती। 7 जपल से आ त यरुशलेम शेहर केआं अओ यहूदी मेह्णु तसे बियेर बइ खड़ी गे त सुआ झुठी झुठी इलजाम लाण लगे, जे तेन्हि अपफ साबित कइ ना बटे।
8 पर पौलुसे अपु बचाव अन्तर बोलु, “मेईं यहूदी मेह्णु के नियमे खिलाफ कोई कम नेईं किओ। होर ना देहरे, ना रोमी सम्राट कैसरे खिलाफ कोई बुराई किओ असी।” 9 तोउं बि फेस्तुसे यहूदी मेह्णु खुश करणे चक्कर अन्तर पौलुस जे बोलु, “तु कि यरुशलेम शेहर घेण चहन्ता ना; तोउं तठि में सम्हाणि तें मुकदमे फैसला करिन्ता?” 10 पौलुसे बोलु, “अउं कैसरे न्याय करणे कुण्सी समाणि खड़ खड़ बिशो असा; में मुकदमे फैसला इठि भुओ लौता। मेईं यहूदी मेह्णु के खिलाफ कोई कम नेईं किओ, ए बोक तुस बि अपफ खरी जाणते। 11 अगर अउं दोषी असा त या मेईं मरणे सज्जा मेएणे लेएक कोई कम किओ असु, त मरणे सज्जा अउं मानता। पर जेन्हि बोकी के ए मोउं पुठ इलजाम लान्ते, अगर तेन्हि अन्तरा कोई बि बोक सच्ची न निसेल, त कोई जेईं बि मोउं एन्के हवाले कइ न सकता। अउं रोमी सम्राट कैसरे दुहाई देन्ता।”
12 तोउं फेस्तुसे मन्त्री के सभा जोई बोक कर कइ बोलु, “ठीक असु! तेईं कैसरे दुहाई दुतो असी, तु कैसरे केईं जे लंघेईन्ता।”
राजा अग्रिप्पे समाणि पौलुस
13 कुछ टेमे पता राजा अग्रिप्पा त तसे भेण बिरनीके कैसरिया शेहर आए त फेस्तुस जोई मिए। 14 से तठि सुआ रोज तकर बिशे। पता फेस्तुसे पौलुसे बारे राजा अग्रिप्पा जे ईं बताउं: “यक मेह्णु असा, जेस पेहला राज्यपाल फेलिक्स कैद अन्तर छइ कइ गा। 15 जपल अउं यरुशलेम शेहर गो थिआ, त मुख्य पुजारे, टजे स्याणे तस पुठ इलजाम ला त तेस मारणे सज्जा देणे मांग की। 16 पर मेईं तेन्हि जे रोमी सम्राटे शासने रीत सुसुर समझाई कइ बोलु कि जपल तकर से, जेस पुठ मुकदमा चलो असा, त मुकदमा करणे बाड़े अमाणि-समाणि खड़ भोई कइ अपु सवाल जवाब न कते, होर जपल तकर दोषी अपु सफाई देण जे मौका न मेईंयाल, तपल तकर केस बि मेह्णु सज्जा देण सही नेईं।”
17 “तोउं त, जपल से इठि कठे भो थिए, त मेईं चेरे न लाउ, दोके रोजे न्याय करणे कुण्सी पुठ बिश कइ तेस मेह्णु पेश करण जे निआंग दिती। 18 जपल तेस पुठ मुकदमा करणे बाड़े खड़ भुए त तेस पुठ इलजाम लाण लगे। पर तेन्हि ईं कोई दोष न ला, जेस दोषे मोउं उम्मीद थी। 19 पर से तेन्हि अपफ बुची अणबण बारे थी। से तेन्के विश्वासे बारे त यीशु नओएं यक मरो मेह्णु बारे थी, जेस बारे पौलुस बोता कि से मर कइ दुबारी जीओ असा। 20 मोउं समझ नेओथ एण लगो कि अन्हि बोकी के बारे कीं पता करण? तोउं त मेईं तेस केआं पुछु, ‘कि तु यरुशलेम शेहर घेण जे राजि असा ना, ताकि तठि अन्हि बोकी के फैसला भोल?’ 21 पर पौलुसे कैसरे दुहाई देणे बझई जुए मेईं फैसला कर कइ निआंग दिती कि जपल तकर एस कैसर केईं ना लंघाल, एस किला अन्तर रखे।”
22 तोउं राजा अग्रिप्पे फेस्तुस जे बोलु, “अउं अपफ बि तेस मेह्णु जवाब शुणुण चहन्ता।” तेन बोलु, “ठीक असु। तुस शुई शुणे, तोउं।”
23 तोउं दोके रोज, राजा अग्रिप्पा त तसे भेण बिरनीके सुआ हके हुशेरि जोई बीहे भखेरी अन्तर आए। तेन्हि जोई सेनापति त शेहरे खास खास मेह्णु बि अओ थिए। तपल फेस्तुसे निआंग दी कइ पौलुस तठि अण्हवा। 24 राज्यपाल फेस्तुस बोलुण लगा, “ए राजा अग्रिप्पा, त किठे भुओ सोब मेह्णुओ! इस मेह्णु हेरे, जेसे खिलाफ यरुशलेम शेहरे त इठियाणि सोबी यहूदी मेह्णु में सम्हाणि शिकायत किओ असी। तेन्हि हुशेरि दी दी कइ बोलु कि अब एस जीन्ता रेहण कोई हक नेईं। 25 पर में जांच पड़ताल अन्तर मोउं पता लग गा कि एन ईं कुछ नेईं किओ कि एस मारणे सज्जा दियेल।”
“अब किस कि एन अपफ सम्राट कैसरे दुहाई दुतो असी, त मेईं एस लंघाणे फैसला किओ असा। 26 तोउं बि मोउं केईं एसे बारे लिखण जे कोई पक्की जाणकारी नेईं, जेस अउं महामहिम सम्राट जे लिख सकुं। तोउं त, मेईं ए तुं सम्हाणि, खास कर कइ ए राजा अग्रिप्पा, तुं सम्हाणि अण्हतो असा कि पूरी जांच पड़ताल करण केआं पता मोउं कुछ लिखुण जे मेईंयेल, जेस अउं सम्राटे सम्हाणि पेश कइ सकुं। 27 किस कि कोई बि दोषी तसे दोष बताणे बगैर सम्राट केईं जे लंघाण मोउं सुसुर ना लगतु।”