राज्यपाल फेलिक्से समाणि पौलुसे पेशी भुण
24
1 पन्ज रोज पता बोडा पुजारा हनन्याह, टजे स्याणे त तिरतुल्लुस नओएं यक वकील अपफ जोई साते घिन कइ कैसरिया शेहर पुजा। तेन्हि राज्यपाले समाणि पौलुस पुठ इलजाम ला। 2 जपल से पेश किआ त तिरतुल्लुस तेस पुठ इलजाम लाई कइ बोलुण लगा: “ए महामहिम फेलिक्स, तुं राज अन्तर हें इलाके मेह्णु सुआ सुख शान्ति मेओ असी; होर तुं दूरे सोचे बेलि हें जाति सुआ बुराई बि सुधरती गो असी। 3 एस अस हर कनारा त हर वकत मानते त पूरे मन केआं तुं जइ कते। 4 पर तोउ होर दुख देण न चहन्ते, त अउं तें छने कता कि मेहरवानी कर कइ हें दुई बोके शुणे।”5 “किस कि हें लिए ए मेह्णु मगरी चिंग भोई गो असा। एन धरतीए सोबी यहूदी मेह्णु बुछ फूट कराण लओ असी, त ए ‘नासरी’ नओएं तेस झूठा दले बाड़ी के मुखिया भो। 6 होर त होर ए देहेर जुठा करणे कोशिश अन्तर थिआ। पर असी ए टाइ छड़ा। [अस त एस अपु नियमे हेसाब जोई सज्जा देण चहन्तेथ; 7 पर सेनापति लूसियास एस जब्बरदस्ती असी केआं घिन गा, 8 त सोब इलजाम तुं समाणि रखण जे निआंग दिती।] त अब तुस अपफ अन्हि सोबी इलजामी के जांच पड़ताल करे कि तुसी एन्हि बोकी के सच्चाई पता लगियाल।”
9 तोउं यहूदी मेह्णु बि तेस जोई साते इलजाम लाण लगे, होर बोलु कि ए सोब बोके सही असी।
रोमी राज्यपाले समाणि पौलुस अपु बचाव करण
10 जपल राज्यपाले पौलुस जे बोलुणे भाश की, त तेन जवाब दी कइ बोलु, “राज्यपाल जी, अउं ईं जाण कइ कि तुस सुआ साल केआं में यहूदी जाति न्याय करण लगो असे, बोडे खुशी जोई अपु बचाव पेश करण लगो असा। 11 तुस अपफ इस बोके पता लाई सकते कि अउं बाराह रोज पेहले सद पूजा अराधना करण जे यरुशलेम शेहर जे अओ थिआ। 12 एन्हि अउं ना देहेर अन्तर, ना यहूदी मेह्णु के अराधनालय अन्तर, होर ना शेहर अन्तर केसे जोई बेहेस कते या शेहर अन्तर हल्ला कते काआ। 13 एन्हि त तुं समाणि जे सोबी इलजाम मोउं पुठ लओ असे, से बि साबित कइ ना बटते। 14 पर अउं तें समाणि ई जरूर मान छता कि जेस ‘यीशु बत’ ए झूठा दल बोते, तसे रीत जोई अउं अपु पितरी के परमेश्वरे सेवा कता; होर जे जे नियम त भविष्य वक्ती के लिखो बोकी के हेसाब जोई असी, तेन्हि सोबी पुठ पूरे मन जोई विश्वास कता। 15 परमेश्वर पुठ में बि सेईंए उम्मीद असी, जे एन्के बि असी कि सच्चे बि ईं यक रोज ठीक भुओ असा, जपल धर्मी मेह्णु त अधर्मी मेह्णु मर कइ दुबारी जीन्ते। 16 एस बझई जोई अउं बि हमेशा कोशिश कता कि परमेश्वरे समाणि त मेह्णु के समाणि में अन्तरात्मा बजन दोषे रिहेल।”
17 “सुआ साल बाद अउं गरीब मेह्णु जे दान पुजाण जे त भकत चढ़ाण जे यरुशलेम शेहर अओ थिआ। 18 तेस टेम एन्हि अउं देहेर अन्तर अपफ शुचा करणे रीति पूरी कते काआ। तपल ना तठि कोई हुसुड़ा थिआ, होर ना कोई हल्ला भो थिआ। 19 पर आं, एशिया इलाके कुछ यहूदी मेह्णु तठि जरूर थिए। अगर तेन्हि में बारे कोई इलजाम लाण थिआ त तेन्हि जे सही भुन्तुथ कि तुं समाणि लान्तेथ। 20 ना त ए अपफ बोले कि जपल अउं यहूदी टजोटे समाणि पेश किओ थिआ, त तेन्हि में की दोष मेआ? 21 सद यक बोक छड़ दी कइ जे मेईं तेन्के बुच खड़ खड़ हुशेरि दी कइ बोलो थी: ‘मरो तेन्हि दुबारी जीणे बारे आज में तुं समाणि पेशी भुण लगो असी।’”
22 पर राज्यपाल फेलिक्स, जे एस “बते” बोक सुसुर जाणताथ, से ईं बोल कइ रोक छड़ा, “जपल सेनापति लूसियास एईयाल, तपल अउं तुं बोकी फैसला शुणान्ता।” 23 तोउं तेन सुबेदार जे निआंग दी कइ बोलु कि पौलुस किले अन्तर रखे, पर तसे खास मितर एई कइ तसे सेवा करण केआं न रोके।
फेलिक्स त तसे जुएली द्रुसिल्ला
24 कुछ रोज पता फेलिक्स अपु जुएली द्रुसिल्ला जोई साते तठि आ। तसे जुएली यहूदण थी। तेन्हि पौलुस भिआई छड़ा त तेस केईआं मसीह यीशु पुठ तेस विश्वासे बारे बोके शुणी। 25 जपल पौलुसे दानधर्म जोई जीणे, समोझि कइ बिशणे त एणे बाड़े न्याय बारे बोलुण लगो थिआ, त फेलिक्से डर कइ पौलुस जे बोलु, “अभेईं त तु गा; टेम मेईंयाल त अउं तोउ दुबारी भिआन्ता।” 26 तेस उम्मीद थी कि पौलुस तेस गुझि अन्तर कुछ रुपेई दिआल, तोउं त से तेस बार बार भिआई कइ बोके कताथ। 27 इहांणि भुन्ते भुन्ते कोई दुई साल भोई गे। त राज्यपाल फेलिक्से जगाई पुरकियुस फेस्तुसे नियुक्ति भुई। त फेलिक्स यहूदी मेह्णु खुश करणे चक्कर अन्तर पौलुस जेहले अन्तर ईं बिशुण दिता।