खुश खबरी प्रचार करणे पौलुसे दोका सफर
पौलुस तिमुथियुस जोई मिइण त अपफ जोई साते नेण
16
1 तोउं पौलुस, त सीलास देरबे त लुस्त्रा शेहर पूज गे। तठि तिमुथियुस नओएं यक विश्वासी भाई थिआ। तसे बोउ यूनानी थिआ त ई यहूदण थी, पर मसीह पुठ विश्वास कतीथ। 2 लुस्त्रा त इकुनियुम शेहरे विश्वासी भाई भेण तिमुथियुस सुआ खरा मानतेथ। 3 पौलुस चहन्ताथ कि से तेस जोई साते हंटे। पर सोब जाणतेथ कि तसे बोउ गैर यहूदी थिआ। त पौलुसे तेस जगाई यहूदी मेह्णु के बझई जोई तसे खतना करवा। 4 तोउं तेन्हि शेहर शेहर घेई कइ से ब्योराa पुजा जे यरुशलेम शेहरे सतसंगे स्याणे त प्रतिनिधि किओ थिआ कि विश्वासी मेह्णु ए मनो लौता। 5 ईं कर कइ हर जगाई सतसंग विश्वास अन्तर पक्के भुन्ते गे त रोज रोज विश्वासी बि बधते गे।त्रोआस शेहर अन्तर पौलुसे दर्शण
6 तोउं से फ्रूगिया त गलाती इलाके जे गे, किस कि शुची आत्माई तेन्हि एशिया इलाके अन्तर वचन शुणाण ना किआ। 7 जपल से मूसिया इलाके भेएड़ पुजे त तेन्हि बिथुनिया इलाके घेणे की। पर यीशु आत्माई तेन्हि घेणे इजाजत ना दिती। 8 तोउं त, से मूसिया इलाके पार कर कइ त्रोआस शेहर जे आए। 9 तठि पौलुस रात दर्शण भुए। तेन हेरु कि मकिदुनिया राज्ये यक मेह्णु खड़ भुआ त तसे छनेअरे कर कइ बोलुण लगा, “तुस समन्दर पार एई कइ मकिदुनिया राज्य जे एईए, त हें मदत करे।” 10 जीं तस ईं दर्शण भुओ त असb झठ मकिदुनिया राज्य घेणे कोशिश करण लगे, किस कि अस ईं समझ गो थिए कि परमेश्वर अस तेन्हि जे खुश खबरी शुणाण जे भिहो असे।
फिलिप्पी शेहरे लुदिया भेणि यीशु पुठ विश्वास करण
11 तोउं त, अस त्रोआस शेहर केआं जहाजे बइ सिधे सुमात्राके टापु पुजे त दोके रोजे नियापुलिस बंदरगाह पुजी गे। 12 होर तठि भीं निस कइ अस फिलिप्पी शेहर पुजे। फिलिप्पी शेहर मकिदुनिया राज्ये खास शेहर त रोमी मेह्णु के बस्ती भो; अस कुछ रोजे लिए इस शेहर बिशे।
13 भक्ति करणे रोज अस ईं समझ कइ शेहरे बाहर दरेउए औत गे कि तठि प्रार्थना करणे जगाह भोल। असी तठि बिश कइ तेन्हि जिल्हाणु जोई बोके की, जे तठि किठिए थी। 14 तेन्हि जिल्हाणु अन्तरा लुदिया नओएं यक जिल्हाणु हें बोके शुणी बिशो थी। से थुआतीरा शेहरे, यक कीमति झिणे बेचणे बाड़ी भक्त जिल्हाणु थी। प्रभु तसे मन खोला कि पौलुसे बोक यक चत भोई कइ शुणेल। 15 होर जपल से अपु पूरे टब्बर जोई साते पुओणि अन्तर चुसिए, त तेन छने किउ, “अगर तुस मोउं सच्चे प्रभु विश्वासी समझते, त हंटे, दुई चोउर रोज में गी बिशे।” तोउं से असी मनाई कइ घिन गई।
पौलुस त सीलास फिलिप्पी शेहर अन्तर कैद भुण
16 तोउं यक रोज, जपल अस प्रार्थना करणे जगाई जे घेण लगो थिए, त असी यक कुई मेई, जे गुलाम थी। तेस अन्तर भविष्य बताणे बाड़ी आत्मा थी; होर से मेह्णु के भविष्य बोल बोल कइ अपु मालिकी जे सुआ कमान्तीथ। 17 से पौलुसे त हें पता एई कइ जोरी जोरी हक देण लगी, “ए मेह्णु सर्व शक्तिमान परमेश्वरे सेवक भिन्थ, जे तुसी जे बचणे बती बारे बतान्ते।” 18 से सुआ रोज तकर इहांणि कती रेही। अखिर अन्तर पौलुस झाईं गा, त मुड़ कइ तेस आत्मा जे बोलु, “अउं तोउ जे यीशु मसीहे नओएं बइ निआंग देन्ता कि एस अन्तरा बाहर निस गा।” त से आत्मा तिखेईंए तसे अन्तरा बाहर निस गई।
19 पर जपल तेस कुई मालिकी हेरु कि हें कमाई करणे जरिया खतम भोई गा, त तेन्हि पौलुस त सीलास टाइ कइ बाजारे चौबाटे अधिकारी केईं घिन गे। 20 तोउं तेन्हि से शेहरे पंची के समाणि पेश किए त बोलु, “ए मेह्णु हें शेहर अन्तर हल्ला करण लगो असे। ए यहूदी भिन्थ। 21 होर ए ईं ईं रीति बारे प्रचार करण लगो असे, जेन्हि मनण त अपणाण असी रोमी मेह्णु जे ठीक नेईं।” 22 हुसुड़ा बि तेन्के खिलाफ किठे भोई गा। तोउं शेहरे पंची तेन्के झिणे चीर छड़े, त तेन्हि लेउडी बइ मडणे बोल छउ। 23 तेन्हि पौलुस त सीलास लेउडी बेलिए सुआ मड कइ, से जेहेल अन्तर छइ छड़े त जेहले ठाणेदार जे बोलु कि अन्हि पुठ सुसुर नजर रख। 24 तेन तेन्के केहणा मना त से दुहे जेईं जेहले अन्तरी भखेरी अन्तर छड़े त तेन्के जंघ जुए बोडे बोडे कठोड़े डड बन्ह छड़े।
परमेश्वर पौलुस त सीलास कैद केआं छुड़काण
25 अधरात पौलुस त सीलास प्रार्थना कते-कुते परमेश्वरे भजन लाण लगो थिए, त सोब कैदी शुणुण लगो थिए। 26 तोउं अजगता सुआ भुंजल गा, त जेहले खाई बि हिल गई। तोउं तिखेईंए सोब दुआर बि खुल गे; त सोबी कैदी के हथ खुर बि अपणे आप खुल गे। 27 जेहले ठाणेदार उंघ केआं खड़ी गा, त जेहले दुआर हेर कइ समझा कि सोब कैदी नश गे। तोउं त तेन तलवार किढ़ कइ अपफ मरणे की। 28 पर पौलुसे जोरी जोई हक दी कइ बोलु, “साहब! अपु अपफ किछ न करे, किस कि अस सोब इठि ईं असे।” 29 तोउं से ठाणेदार दीया मग कइ अन्तर जे दौड़ा त ठरकता ठरकता पौलुसे त सीलासे अगर उटेऊ झड़ गा। 30 त तेन पौलुस त सीलास बाहर अण्हते त बोलु, “ए जनाव! बचणे लिए मोउं की करुण?” 31 तेन्हि बोलु, “प्रभु यीशु पुठ विश्वास कर, तोउं तु त तें पूरे टब्बर बच घेन्ता।” 32 ईं बोल कइ तेन्हि तेस त तसे गीहे बाड़ी प्रभु वचन शुणाए। 33 जेहले ठाणेदारे रात तेसे टेम से नीए त तेन्के घा धुए। तोउं तिखेईंए अपु अपफ त गीहे पूरा टब्बरा पुओणि अन्तर चुसिए। 34 तोउं तेन से अपु गी नीए त तेन्हि रौठि खिलेई त पूरे टब्बरे खुशी मनाई, किस कि तेन्हि परमेश्वर पुठ विश्वास किओ थिआ।
35 तोउं भ्यागे शेहरे पंची सपाही लंघाई कइ जेहले पेहरेदार जे बताउ कि तेन्हि मेह्णु छड़ दिए। 36 जेहले पेहरेदार ए सोब बोके पौलुस जे बोली, “पंची तुसी छड़ देणे निआंग दुतो असी। तोउं त तुस अब इठिआ अराम जोई घेई घिए।” 37 पर पौलुसे तेस जे बोलु, “तेन्हि अस मेह्णु के समाणि बगैर दोषे मडे त जेहेल अन्तर छड़े। अब कीं असी मठे चोर कइ लंघाण लगो असे? ईं ना भुन्तु, किस कि अस रोमी मेह्णु भिन्थ; से अपफ एई कइ असी बाहर किढ़ेल।”
38 ठाणेदारे ए बोके घेई कइ पंची जे लेई। होर ईं शुण कइ कि पौलुस त सीलास रोमी मेह्णु भिन्थ, से डर गे। 39 तोउं तेन्हि एई कइ माफी मगी, त जेहेल केआं बाहर नी कइ छनेअरे किउ कि शेहर छड़ दी कइ घेई घिए।
40 त तोउं पौलुस त सीलास जेहेल केआं बाहर निस कइ लुदिया गी गे, त विश्वासी भाई भेणि जोई मिइ कइ तेन्हि जे विश्वास अन्तर पक्के भोई कइ बिशुण जे हिम्मत दिती। तोउं से तठिआ घेई गे।