पतरस कैद भुण त कैद केआं छुटुण
12
1 तेस टेम राजा हेरोदेसेa सतसंगे कुछ मेह्णु ती भुंजाए। 2 तेन प्रतिनिधि यूहन्ने भाई याकूब तलवारी बइ कटवाई छड़ा। 3 जपल तेन हेरु कि यहूदी मेह्णु ईं हेर कइ खुश भुओ असे, त तेन पतरस बि कैद कइ छड़ा। तेन्हि दिनि रौठि त्योहार चलो थिआ। 4 तेन पतरस टाइ कइ जेहेल अन्तर छइ छड़ा। होर चोउर चोउर सपाही के चोउर दल तसे पेहरा देण जे रखे। तेन सोचो थिउ कि बचणे त्योहार खतम भुण केआं पता, तस मेह्णु के सामणि आण कइ मरवाई छता। 5 जपल जेहेल अन्तर पतरस पुठ ईं पेहरा लगो थिआ; तपल विश्वासी के सतसंग तेस जे पूरे मन जोई प्रार्थना करण लगो थिआ।6 जेस रोज राजा हेरोदेस तस मेह्णु के सामणि अण्हणे बाड़ा थिआ। अगरी रात पतरस दुई शंकीड़ी बइ बन्हो, दुई सपाही के बुच उंघो थिआ; त होरे दुआर पुठ पेहरा देण लगो थिए। 7 तोउं अजगता, प्रभु यक स्वर्गेदूत एई कइ खड़िया त तेस भखेरी अन्तर टगड़ियारी भोई गई। तोउं तेन पतरस हुंजोखि कइ खड़ेरा त बोलु, “खड़ भो, झठ कर।” तिखेईंए पतरसे हथ केआं शंकीड़ी टूट कइ भीं झड़ गई। 8 तोउं स्वर्गेदूते तेस जे बोलु, “मझीन बन्ह त अपु प्युले लाण दे।” पतरसे तिहांणि किउ। तोउं स्वर्गेदूते तेस जे बोलु, “अपु कोट डब कइ में पता आई।” 9 से तसे पता पता बाहर निस गा। पर तेस ई समझ नेओथ एण लगो कि जे किछ स्वर्गेदूते बेलिए भुण लगो असु, से सच्चु भुण लगो असु, कि सुपुन हेरण लगो असा। 10 तोउं से पेहले त दोके दुआरी के पेहरेदारी केआं बाहर निस कइ तेस लोहिए दुआर केईं पुजे, जेठिआ शेहरे कना जे बत असी। से दुआर तेन्हि जे अपणे आप खुल गोउ। तोउं से निस कइ गहि अखिर तकर आए, त तिखेईंए स्वर्गेदूत तेस छड़ दी कइ घेई गा। 11 तोउं पतरसे झजक कइ बोलु, “अब अउं समझ गा कि प्रभु अपु स्वर्गेदूत लंघाई कइ राजा हेरोदेस केआं अउं छुड़का, त यहूदी मेह्णु के उम्मीद बरबाद कइ छइ।”
12 तोउं अपु हाल हेर कइ से मरियमे गी गा, जे यूहन्ने ई थी, जेस जे “मरकुस” बि बोते। तठि सुआ विश्वासी मेह्णु कठे भोई कइ प्रार्थना करण लगो थिए। 13 जपल तेन दुआर घमकाऊ, त रोदा नओएं यक कुई हेरण जे आई, जे यक नौखराणि थी। 14 तोउं पतरसे अवाज पिछाण कइ तेन दुआर न उघाड़ु, बल्कि दौड़ दी कइ अन्तर गई त बोलुण लगी कि पतरस दुआर पुठ असा। 15 तेन्हि तेस जे बोलु, “तु जगरी असी।” पर तेन जोर दी कइ दुबारी बोलु कि पतरस दुआर पुठ खड़ खड़ असा त तेन्हि बोलु, “तसे स्वर्गेदूत भोल।” 16 तोउं बि पतरस दुआर घमकान्ता रेहा। जपल तेन्हि दुआर उघाड़ु, त तेस हेर कइ हैरान भोई गे। 17 पर तेन अपु हथे बइ भाश कर कइ से चुप कराए; त तेन्हि जे बोलु कि प्रभु कीं कइ से जेहेल अन्तरा बाहर किढ़ा। फि बोलु, “याकूबb त होरे विश्वासी भाई भेणि जे ई खबर दी छड़े।” तोउं से तठिआ निस कइ होर जगाई जे घेई गा।
18 जपल भ्याग भुई त सपाही के बुच सुआ हल्ला भोई गा कि पतरस को गा। 19 राजा हेरोदेसे से तोपवा, पर मेईंया नउ। त राजे तेन्हि पेहरेदारी के जांच पड़ताल कर कइ तेन्हि मारणे निआंग दिती। तोउं राजा हेरोदेस यहूदिया राज्य छड़ दी कइ कैसरिया शेहर अन्तर बिशुण लगा।
राजा हेरोदेसे मरण
20 हेरोदेस सूर त सैदा शेहरे मेह्णु जोई सुआ नराज थिआ। तोउं त से यक चत भोई कइ तेस केईं आए। से राजे देखभाल करणे बाड़ा ब्लास्तुस नओएं यक मेह्णु मनाई कइ राजे जोई मेल मिलाप करण चहन्तेथ, किस कि राजे देशे केआं ईं तेन्हि अनाज मेतुथ। 21 तेस ठीक किओ रोज राजा हेरोदेस राजी के झिणे लाई कइ अपु सिंहासन पुठ बिशा, त तेन्हि मेह्णु जे भाषण देण लगा। 22 त मेह्णु नारे लाण लगे, “वाह वाह! ए त मेह्णु ना, केसे देवते अवाज भो!” 23 तिखेईंए, प्रभु यक स्वर्गेदूते से बीमार कइ छड़ा, किस कि तेन परमेश्वरे महिमा न मनी। तेस लोलुड़ लगे त से मर गा।