टजोट अन्तर स्तफनुसे भाषण
7
1 त बोडे पुजारे स्तफनुस केईआं पुछु, “ए बोके कि सच्चे तेईं बोलो असी ना?” 2 तेन बोलु, “ए भाईओ त स्याणेओ, शुणे! हें पुरखा अब्राहम हारान शेहर अन्तर बसण केआं पेहले जपल मेसोपोटामियाa इलाके अन्तर थिआ; तपल परमेश्वरे तेस दर्शण दिते। 3 त तेस जे बोलु, ‘तु अपु देश त अपु ग्रां केआं निस कइ तेस देश जे गा, जेस अउं तोउ हरालता।’b 4 तोउं त से तेस जगाई कसदी मेह्णु केईआं निस कइ हारान शेहर अन्तर बसी गा। तसे बोउ मरण केआं पता परमेश्वरे से हारान शेहर केआं लंघाई कइ इस देश अन्तर बसा, जेस अन्तर एचेल तुस बसो असे। 5 तपल तेन तसे धे विरासते लिए यक हथ बि जगाह न दिती, पर अपु जुबान दिती कि ‘तोउ केआं पता अउं एस देश तें पीढ़ी के हवाले कता।’c हांलाकि तपल तसे कोई गभुर भुओरु नेओथ। 6 होर त होर, परमेश्वरे ईं बोलु, ‘तें पीढ़ी होर देश अन्तर घेई कइ परदेशी बणती, त तेन्के गुलामी कते त चोउर सौ साल तकर भुंजेईन्ते।’ 7 त तेन ईं बि बोलु, ‘जेस देशे से गुलामी कते, तेन्हि अउं सज्जा देन्ता। तढ़िया पता से तठिआ निस कइ इस जगाई एन्ते त में सेवा कते।’ 8 तोउं परमेश्वरे अब्राहमे धे खतने चाका दिता;d तोउं सच्चे बि तेस इसहाक जमा त अठूं रोजे तसे खतना किआ। होर इसहाक केआं याकूब त याकूब केआं हें बाराह पुरखे जमे।”9 “एनि बाराह पुरखी अपु भाई यूसुफ हेर जड़ कइ से मिस्र देश जे घेणे बाड़ी व्यापारी के हथ बेच छड़ा। पर परमेश्वरे से छड़ ना दिता। 10 बल्कि तसे सोब दुख तकलीफ दूर किए, त मिस्र देशे राजा फिरोने समाणि से ट्यारा त अक्लदार बणा। तोउं त राजा फिरोने से मिस्र देशे त अपु गीहे अधिकारी बणा। 11 त तपल मिस्र त कनान देश अन्तर अकाल घेई गा त सोबी सुआ अशी एई। एस बझई जोई हें बाव दादु अन्न मेई ना बटु। 12 पर जपल याकूबे ईं शुणु कि मिस्र देश अन्तर अनाज मेण लगो असु, त तेन हें बाव दादु पेहली बार मिस्र देश जे लंघाए। 13 दोके लिंगि घेणे टेम यूसुफे अपु भाई के समाणि अपु पिछाण बताई। त फिरोन राजा यूसुफे ऊड़ी पता लग गा। 14 तोउं यूसुफे अपु बोउ याकूब त पूरा टब्बरा मिस्र देश जे भिआई छड़ा, जेस अन्तर कुल पचहतर मेह्णु थिए। 15 तोउं याकूब मिस्र देश अन्तर गा; तठि से त हें बाव दादु मर गे।e 16 तेन्के लाश मिस्र देश केआं बाहर अण्ह कइ, इस देशे तेस कब्र अन्तर छइ, जे अब्राहमे चन्नी दी कइ शकेम शेहर अन्तर हमोरे गभुरु केआं खरीदो थी।”f
17 “पर जपल तेस जुबान पूरा भुणे टेम आ, जे जुबान परमेश्वरे अब्राहमे धे दुतो थी, त मिस्र देश अन्तर हें जाति मेह्णु बध कइ सुआ भोई गे। 18 तोउं मिस्र देश अन्तर यक ईं राजा बणा जे यूसुफे बारे कुछ बि ना जाणताथ। 19 तेन हें जाति मेह्णु जोई कपट किआ त हें बाव दादु सुआ भुंजाए। तेन से मजबूर कइ छड़े कि से अपु जमो गभुर बाहर फटाए ताकि से मर घियेल। 20 ईं टेम अन्तर मूसा जमो थिआ। से परमेश्वरे समाणि अब्बल थिआ त से टाई मेहन तकर अपु ईये बोउए गी पाड़ा। 21 होर जपल से फटा त फिरोने कुई से गोद नी छड़ा, त अपु कुआ बड़ाई कइ पाड़ा। 22 तेन मूसे मिस्र देशे सोब विद्या पढ़ाई, त से भाषणवाजी अन्तर त कम करण अन्तर उस्ताद बण गा।”
23 “पता जपल से चढ़ी साले भुआ, त तसे मन किआ कि अपु इस्राएले भाई जोई मिउण। 24 होर तेन यक मिस्री मेह्णु केआं यक इस्राएली मेह्णु पुठ अन्याय भुन्ते काआ त से बचा। तेस मिस्री मेह्णुमार कइ तेन भुंजो तसे बदला पूरा किआ। 25 मूसे सोचो थी कि ‘में इस्राएली भाई समझेल कि परमेश्वर में हतेउ बइ तेन्हि बचान्ता’, पर से ना समझे। 26 दोके रोजे तेन दुई इस्राएली मेह्णु अपफ बुच झगड़ीन्ते काए, त ईं बोल कइ तेन्हि समझाण लगा, ‘ए मितरों! तुस त भाई भाई भिन्थ, तोउं बि यक होरी पुठ अन्याय किस करण चहन्ते?’ 27 पर जे अपु भेयाड़ पुठ अन्याय करण लगो थिआ, तेन तेस जे ईं बोल कइ से उओ ला कि ‘तु असी पुठ केन अधिकारी त पंच बणाओ असा? 28 जीं तेईं ही से मिस्री मेह्णु मारा तीं तु मोउं बि मारण चहन्ता ना?’ 29 ईं जवाब शुण कइ मूसा तठिआ नश गा त मिदियान देश अन्तर परदेशी बण कइ बिशुण लगा,g त तठि तेस दुई कुआ जमे।”
30 “तठि बिश्ते जपल चढ़ी साल पूरे भोई गे, त यक स्वर्गेदूते सिनै फाटे अरुणि धार जाओ किय्हामिलि के लपटी बुचा दर्शण दिते। 31 मूसा ई दर्शण भोई कइ हैरान भोई गा, त जपल हेरण जे भेएड़ गा, त तेन प्रभु ईं बोते शुणा। 32 ‘अउं तें बाव दादु अब्राहम, इसहाक त याकूबे परमेश्वर भो।’ मूसा डर कइ ठरकण लग गा, होर तेस दुबारी हेरणे बि हिम्मत न भुई। 33 प्रभु तेस जे बोलु, ‘अपु प्युले खूण दे, किस कि जेस जगाई तु खड़ खड़ बिशो असा, से शुची जिम भो। 34 मेईं सच्चे बि अपु मेह्णु के अशी हेरो असी, जे से मिस्र देश अन्तर सेहण लगो असे; होर तेन्के रोलुण मेईं शुणु त तेन्के डडोरे आग काई। तोउं त, अउं तेन्हि छुड़काण जे अओ असा। अब आई, अउं तोउ मिस्र देश जे लंघान्ता।’”h
35 “जे मूसा इस्राएले पुरखे ईं बोल कइ नेओथ मनो कि ‘तु असी पुठ केन अधिकारी त पंच बणाओ असा’, परमेश्वरे से मूसे जे तेस किय्हामिलि बुचा दर्शण दुतो स्वर्गेदूते बेलिए तेन्के अधिकारी त छुड़काणे बाड़ा बणाई कइ लंघा। 36 तेनि मूसे तेन्हि मिस्र देश केआं बाहर अण्हा। से मिस्र देश अन्तर, लाल समन्दर बइi त अरुणि धार अन्तर चढ़ी साल तकर चमत्कारे कम त निशाण हरालते रेहा।j 37 ए सेईंए मूसा भो, जेन इस्राएली मेह्णु जे बोलो थिउ, ‘परमेश्वर तुन्धेरी भाई बुचा तुं लिए में ईं यक भविष्य वक्ता बणान्ता।’k 38 ए सेईंए मूसा भो, जे अरुणि धार अन्तर हें बाव दादु के हुसुड़े जोई साते थिआ, जपल तेन स्वर्गेदूत सिनै फाट पुठ तेस जोई बोके की।l त तठि तेस जीवन देणे बाड़े वचन मेईंए कि असी तकर पुजाल।
39 पर हें बाव दादु तसे यक न मानी। तसे अणशुणि कर कइ अपु मन मिस्र देश कना जे खिरका। 40 तोउं तेन्हि तसे बोडे भाई हारुन जे बोलु, ‘असी जे ईं देवता बणा, जे हें अगर अगर हंटियेल, किस कि ए मूसा, जे असी मिस्र देश केआं घिन आ, असी पता नेईं कि तेस जोई की भुओ असु।’ 41 त तेन्हि दिनि तेन्हि यक बच्छुर बड़ाउ त तेस मुर्ति अगर भकत दिती। से अपु हथि के कमे लिए त्योहार मनाण अन्तर मस्त भोई गे।m 42 तपल, परमेश्वर तेन्हि जे मछोड़ा दी कइ घेई गा कि से अम्बरे चीजे पूजियेल, जीं भविष्य वक्ती के कताबी अन्तर लिखो असु।
‘ए इस्राएली मेह्णुओ, कि तुस सद मोउं जे
अरुणि धार अन्तर चढ़ी साल तकर
भकत चढ़ान्तेथ त दान देन्तेथ ना?’
43 ‘ना! पर तुस त मोलेकn नओएं देवते डेरा,
त रिफानo नओएं देवते तारे ढीड़ते रेहन्तेथ,
त तेन्के मुर्ति तुसी पूजा करण जे बड़ाओ थी।
तोउं त अउं तुसी कैद करवाई कइ बेबीलोन देश केआं दूर बसान्ता।’p”
44 “सच्चे बि अरुणि धार अन्तर हें बाव दादु परमेश्वरे जुबानी दुतो उगाही डेरा अपफ जोई साते नेन्तेथ। होर जेन से मूसा केईआं बणवा, तेन तस जे बोलो थिउ कि ‘जीं तेईं नमूने अन्तर काउ, ए यकदम तिहांणि बणाण।’q 45 पता सेईंए डेरा, हें बाव दादु मेईंया, जे यहोशू जोई मी कइ इस देश अन्तर घिन आए। तपल इस देश पुठ गैर यहूदी के राज थिउ, तोउं बि परमेश्वरे हें बाव दादु के खातिर से इठिआ नशाण छड़ा।r त से डेरा राजा दाऊदे टेम तकर तिहांणि रेहा। 46 तेस पुठ परमेश्वरे कृपादृष्टि भुई; त तेन प्रार्थना की कि से याकूबे परमेश्वरे लिए यक देहेर बणाई बटियेल।s 47 पर तसे कोईये राजा सुलैमाने तेस जे देहेर बणा।t 48 तोउं बि सर्व शक्तिमान परमेश्वरे हथे बणाओ देहेर अन्तर ना बिश्ता, जीं भविष्य वक्ते बोलो असु, परमेश्वर बोता कि
49 ‘स्वर्ग में सिंहासन भो
त धरती में खुर पढी औकुड़ भो,
त मोउं जे तुस केस किस्मी देहेर बणान्ते?
त में अराम करणे जगाह कोठी भुन्ति?
50 कि ए सोब चीजे में हथे बणो न भिन्थ ना?’”u
51 “ए नकठर मेह्णुओ, मने पापी त कने कच्चे मेह्णुओ! तुस हमेशा केईआं शुची आत्माई खिलाफ असे। जीं तुं बाव दादु कतेथ, तिहांणि तुस बि कते। 52 भविष्य वक्ती अन्तरा कोउं जेईं तुं बाव दादु ना भुंजा? तेन्हि से बि मार छड़े जेन्हि तेस धर्मीv यीशु एणे बारे पेहलाई केआं बोल छो थी। त अब तुस तेस धर्मी टोवाणे बाड़े त मरवाणे बाड़े बण गो असे। 53 तुसी स्वर्गेदूती बेलि दुतो नियम त मेईंए, पर तुस तेन्हि ना मानते।”
घोड़िआई कइ स्तफनुस मारण
54 स्तफनुसे ईं बोक शुण कइ टजोटे सोब मेह्णु ती जड़ी गे त दन्त कुरुड़ खाण लगे। 55 पर तेन शुची आत्माई बेलि भरी कइ स्वर्गे कना जे हेरु त परमेश्वरे महिमा त परमेश्वरे देहणा कना यीशु खड़ खड़ हेरा का। 56 तोउं बोलु, “हेरे, अउं स्वर्ग खुला, त मनखे कुआ परमेश्वरे देहणा कना खड़ खड़ बिशो हेरता।” 57 ईं शुण कइ तेन्हि अपु अपु कन बन्न कइ छड़े त जोरी जोई हुशेरि दिती। त से सोब जेईं मी कइ तेस पुठ झुमिर गे। 58 त तेस शेहर केआं ढीड़ कइ बाहर घिन गे। तेन्हि अपु अपु झिणे खोल कइ शाऊल नओएं यक जवान कोईया खुरे भेएड़ छइ छड़े, त स्तफनुस घोड़िआण लगे। 59 जपल से स्तफनुस पुठ घोड़िआ देन्ते रिहे, त तेन ईं प्रार्थना की, “ए प्रभु यीशु, में आत्मा रखीण दिए।” 60 तोउं तेन उटेऊ बिश कइ जोरी जोई बोलु, “ए प्रभु, इस पाप अन्हि पुठ ना ला।” होर ईं बोल कइ से मर गा।