प्रतिनिधि 2

शुची आत्माई विश्वासी पुठ एण

1 प्रभु यीशु मर कइ दुबारी जीणे सत हफ्ते पता पिन्तेकुस्त नओएं त्योहार आ, त तेस रोज से सोब विश्वासी भाई भेण यक जगाई कठे थिए। 2 अजगता तेज तुफाने ईं अम्बर केआं गड़गड़ाहट भुई, त जेठि से बिशो थिए से घर पूरा भर छड़ा। 3 तोउं तठि आगी लौई किछ निसु त यक यक भोई कइ तेन्हि बिचा हर जेईं पुठ बिश गे। 4 त से सोब शुची आत्माई बेलि भरी गे। त जीं शुची आत्माई तेन्के धे बोलुणे ताकत दिती, तीं से होरी होरी भाषा अन्तर बोलुण लगे।

5 तेन्हि त्योहारे दिनि, हर यक देश केआं यहूदी भक्त यरुशलेम शेहर अन्तर अओ थिए। 6 त ईं अवाज शुण कइ तठि मेह्‍णु के सुआ हेल भोई गई। मेह्‍णु टकभक घेई गे, किस कि तेन्हि बिचा हर यक जेईं से विश्वासी अपु अपु भाषा अन्तर बोक कते शुणे। 7 से सोब हैरान भोई कइ बोलुण लगे, “हेरे, ए जे बोक करण लगो असे, ए सोब मेह्‍णु कि गलीले ना भिन्थ ना? 8 त फिर असी सोबी किस अपु अपु भाषा शुणती?” 9 तठि होरे होरे देशे मेह्‍णु थिए, जीं कि पारथी, मेदी, एलामी, मेसोपोटामिया, यहूदिया, कप्पादूकिया, पुन्तुस त एशिया, 10 फ्रूगिया, पंफूलिया, मिस्र त कुरेन शेहरे औत-कोते लीबिया देशे मेह्‍णु त रोम शेहरे यात्री, 11 होर क्रेते टापु मेह्‍णु त अरब इलाके मेह्‍णु, मतलब यहूदी त यहूदी धरम मानणे बाड़े सोब गैर यहूदी थिए। तेन्हि अपफ बुच बोलुण लाउ, “तोउं बि अस एन्हि मेह्‍णु अपु अपु भाषाई अन्तर परमेश्वरे किओ बोडे बोडे कमे बारे बोक करण कीं शुणते?” 12 त से सोब हैरान भोई गे त परेशान भोई कइ यक होरी जे बोलुण लगे, “ए की भुण लगो असु?” 13 पर होरी मखोल कर कइ बोलु, “ए त अढावा अराखे नशे अन्तर असे।”

पतरसे भाषण

14 तपल पतरस तेन्हि ग्याराह चेली जोई खड़ भुआ त जोरी जोई तेन्हि जे बोलुण लगा, “ए यहूदी भाईओ त यरुशलेम शेहरे सोबी मेह्‍णुओ! में बोक धिक शुणे त मोउं इसे बारे बताण दिए। 15 तुस जीं सोचुण लगो असे कि अस नशे अन्तर असे, ए ठीक नेईं, किस कि होता भ्यागे नौ बजो असे। 16 पर ए से बोक भो, जे योएल भविष्य वक्ते बोलो थी:

17 ‘परमेश्वर बोता कि अखिरि रोजी अन्तर ईं भुन्तु कि

अउं अपु आत्मा सोबी मेह्‍णु पुठ छता,

त तुं कुआ त तुं कुई भविष्य वाणि कते,

होर तुं जवान मेह्‍णु दर्शण भुन्ते,

त तुं स्याणे सुपुन हेरते।

18 होर त होर, तेन्हि रोजी अउं अपु सेवक त सेविका पुठ बि

अपु आत्मा छता, त से बि भविष्य वाणि कते।

19 होर अउं खड़ी अम्बर पुठ चमत्कार

त उन्न धरती पुठ होरे होरे निशाणी,

मतलब लहु, आग त तुउए बदेए हरालता;

20 प्रभु एणे तेस बोडे त सुआ खास रोज केआं पेहले

दिस अन्हारु भोई घेन्तु

त जोसुण लहुए ईं भोई घेन्ति।

21 होर जे कोउं प्रभु नओं नी कइ प्रार्थना कराल, से बच घेन्ता।’”

22 “ए इस्राएली मेह्‍णुओ, ध्यान जोई शुणे: नासरत ग्रां अन्तर यीशु नओएं यक मेह्‍णु थिआ। परमेश्वरे तेसे बेलि तुं बुछ बोडे ताकत बाड़े कम, चमत्कार, त निशाणी हराल कइ साबित किउ कि यीशु तसे कनारा अओ थिआ। एसे बारे तुस बि जाणते। 23 सेईंए यीशु तुसी परमेश्वरे समझ त बड़ाओ योजनाई हेसाब जोई अधर्मी मेह्‍णु के हथ टोवाई छड़ा, त क्रूस पुठ ढनाई कइ मरवाई छड़ा। 24 पर परमेश्वरे सेईंए मरण केआं छुड़कइ कइ दुबारी जीआ; किस कि ईं त भोईए ना बटतुथ कि से मरणे वश अन्तर रिहे। 25 किस कि दाऊद राजा तसे बारे बोता,

‘अउं प्रभु हमेशा अपु समाणि हेरता रेहा,

अउं कमजोर ना भुन्ता, किस कि से में देहणा कना असा;

26 इस बझई जुए में मन खुश भुआ, त अउं भजन लाण मस्त भुआ;

होर त होर, में मुकणे बाड़ी जिन्‍दगी परमेश्वर पुठ उम्मीद कती रेहन्ती।

27 किस कि तु में प्राण पाताल अन्तर ना छता;

होर ना अपु शुचे मेह्‍णु शड़ण देन्ता।

28 तेईं मोउं जीणे बथ हरालो असी;

तु मोउं अपु दर्शण दी कइ खुश कता।’”

29 “ए भाईओ, पुरखे दाऊदे बारे ए यकदम सच्ची बोक असी कि से मर गा त पथि बि छड़ा, होर तसे कब्र आज तकर हें इठि असी। 30 से भविष्य वक्ता थिआ। होर से ई बि जाणताथ कि परमेश्वरे तसे धे सोह कर कइ जुबान दुतो असी कि ‘अउं तें वंश अन्तरा यक मेह्‍णु राज सिंहासन पुठ बिशाणता।’ 31 इस बझई जुए तेन भुणे बाड़ी बोक पेहलाई केआं हेर कइ मसीहे दुबारी जीणे बारे भविष्य वाणि की, कि ना त परमेश्वर मसीहे प्राण पाताल छता, होर ना त तसे जिसम शड़ण देन्ता। 32 एईएं यीशु परमेश्वरे दुबारी जीआ। तसे उगाह अस सोब असे। 33 ईं कर कइ परमेश्वरे तसे धे अपु सुमले कना बोडी इज्जते जगाह दिती। होर पिता परमेश्वरे तसे धे से शुची आत्मा दिती, जेस देणे जुबान तेन पेहलाई दुतो थी। तेन से शुची आत्मा हें अन्तर छोओ असी, जेस तुस हेरण त शुणुण लगो असे। 34 किस कि दाऊद त स्वर्ग जे ना गा; पर से अपफ बोता,

‘प्रभु परमेश्वरे में प्रभु जे बोलु,

तोउं तकर तु में देहणा कना बिश,

35 जोउं तकर अउं तें दुश्माणी तें खुर पड्डे ना छइ छउं’

36 त अब पूरे इस्राएले मेह्‍णु सुसुर जाण घिए कि परमेश्वरे सेईंए यीशु, जे तुसी क्रूस पुठ ढनाई कइ मरो थिआ, प्रभु बि बणो असा त मसीह बि।”

3,000 मेह्‍णु मसीह पुठ विश्वास करण

37 ई शुण कइ शुणणे बाड़ी के काजे आग लग गई, होर से पतरस त होरे प्रतिनिधि केआं पुछुण लगे, “ए भाईओ, असी की करुण?” 38 पतरसे तेन्हि जे बोलु, “अपु अपु मन बदलीण दिए, त हर यक जेईं अपु अपु पापी के माफी लिए यीशु मसीहे नओएं बेलि पुओणि अन्तर चुसीण दिए; त तुसी परमेश्वरे वरदान, शुची आत्मा मेती। 39 किस कि पिता परमेश्वरे ए जुबान, तुसी त तुं गभुर जे असी। होर तेन्हि सोबी दूरे दूरे मेह्‍णु जे बि असी, जेन्हि प्रभु हें परमेश्वर अपु भेएड़ भिआन्ता।” 40 पतरसे होरी बि सुआ बोकी के बेलि से समझाए “अपु अपफ इस दुष्ट जमाने मेह्‍णु केआं बचाए।” 41 त जेन्हि तसे बोके मनी, से पुओणि अन्तर चुसिए; होर तेस रोज कोई टाई हजार मेह्‍णु तेन्हि चेली जोई मिइ गे। 42 होर प्रतिनिधि केआं शिचण, सतसंग करण, साते रौठि खाण त प्रार्थना दुआ करण अन्तर मस्त भोई गे।

विश्वासी मेह्‍णु के जीण

43 प्रतिनिधि के बेलिए सुआ चमत्कारे कम त निशाणी भुण लगी त सोब हैरान भोई गे। 44 सोब विश्वास करणे बाड़े कठे बिशतेथ, होर तेन्के हर चीज हेस्सेदारी अन्तर थी। 45 से अपु अपु धन संपत्ति त सामान बेचबुच कइ जीं जेसे जरूरत भुन्तीथ, बांट छतेथ। 46 से रोज रोज यक सतसंग बण कइ देहेर अन्तर किठिन्तेथ, होर गी गी घेई कइ प्रभु रौठि बांट चुन्‍ठ कइ खांतेथ त सुआ खुशी जुए त बजन केहर-बेहरी सोब साते खांते पीन्तेथ। 47 होर से परमेश्वरे गुणगान कते रेहन्तेथ। सोब मेह्‍णु तेन्हि हेर खुश भुन्तेथ: होर रोज रोज प्रभु तेन्हि जोई होरे मेह्‍णु मिआन्ताथ, जे मसीह पुठ विश्वास कर कइ बच घेन्तेथ।