दछि बुटा त तसे डा।
15
1 तोउं यीशु यक बोक लाई “अउं यक सच्चा दछि बुटे ईं असा; त में बोउ जिमदारे ईं असा। 2 में से सोब डा जे फल ना देन्ते, तस से काट छता त जे फल देन्ते, तेन्हि से छांटता ताकि तठि हउ बि सुआ फल लगियेल। 3 मेईं जे शिक्षा दुतो असी, तस मान कइ तुस साफ भोई गो असे। 4 त तुस मोउं जुए जुड़ कइ बिशे त अउं बि तुसी जुए जुड़ कइ बिश्ता। जीं कोई बि डा बुटे केआं अलग भोई कइ फल ना दी सकतु, तीं तुस बि मोउं केआं अलग भोई कइ कोई फलa दी ना सकते।”
5 “अउं यक दछि बुटे ईं असा त तुस डाए ईं असे। जे मोउं जुए जुड़ कइ बिश्ते त जेन्हि जुए अउं जुड़ता, से सुआ फल देन्ता, किस कि मोउं केआं अलग भोई कइ तुस कुछ बि कइ ना सकते। 6 अगर कोई मोउं जुए ना जुड़ते त जिमदार तस काट कइ फटान्‍ता, त से शुख घेन्ते। पता मेह्‍णु तेन्हि नी कइ आग अन्तर फुकी छते। 7 अगर तुस में बोक मानते रेहन्ते त में शिक्षा अन्तर चलते। तोउं, जे बि तुस मगेल, से तुन्धे दीइन्तु। 8 तुस जपल सुआ फल फलते, तोउं में बोउए शान बधती त तुस ई हरालते कि सच्चे तुस में चेले भीन्‍थ।”
9 “जीं बोउए मोउं जुए परेम किओ असा, तीं अउं बि तुसी जुए परेम कता। त मोउं केआं कदी दूर ना भो। 10 जीं अउं बोउए निआंग मान कइ तस जुए परेम जुए बिश्ता, तीं अगर तुस में निआंग मानते त मोउं जुए परेम जुए बिश्ते। 11 मेईं ई सोब बोक तोउं बोली कि जीं मोउं अन्तर सुआ खुशी भुन्ति तीं तुसी अन्तर बि भो त तुं खुशी पूरी भुओल। 12 में निआंग ई असी कि जीं अउं तुसी जुए परेम कता, तीं तुस बि यकी होरी जुए परेम करे।b 13 अपु मितरे लिए अपु जीवन देण केआं बोडा परेम होर कोई नेईं 14 अगर तुस में निआंग मान कइ तस कराल त तुस में मितर असे। 15 अभेईं केआं खड़ अउं तुसी जे ‘गुलाम’ ना बोता, पर ‘मितर’ बोता। किस कि मालिक गुलाम जे अपु बोक ना बोता, पर मेईं त अपु सम्हाई बोक जे बि मेईं अपु बोउ केआं शुणो थी से तुसी जे बोल छओ असी। 16 तुसी अउं नेईं चुणो, पर मेईं तुस चुणो असे त तुं धे कम दुतो असु कि तुस घेई कइ फलc अण्हे त तुं फल हमेशा रिहे। त तुस में नओं पुठ बोउ केआं कुछ मगेल त से तुं धे दी छता। 17 अउं दुबारी तुसी जे तस निआंग देन्ता कि यक होरी जुए परेम करे।”
यीशु अपु चेली जे सलाह देण
18 तोउं यीशु तेन्हि जे बोलु, “जपल धरती मेह्‍णु तुसी भुंजान्ते त तुस याद करे कि तुसी केआं पेहले तेन्हि अउं भुंजो असा। 19 अगर तुस धरती मेह्‍णु ईं भुन्तेथ, त धरती मेह्‍णु तुसी जुए परेम कतेथ। पर किस कि मेईं तुस तेन्हि बिचा चुणो असे, तोउं त से तुसी भुंजान्ते। 20 dपेहले मेईं जे बोके तुसी जे बोलो थी कि गुलाम अपु मालिक केआं बोडा ना भुन्ता, तस याद रखे: अगर तेन्हि अउं भुंजा, त से तुसी बि भुंजान्ते। अगर तेन्हि में बोक मनो भुन्तीथ त से तुं बोक बि मानतेथ। 21 पर ए सोब से तुसी जुओई में चेले भुणे बझई जुए कते, किस कि तेन्हि मोउं लंघाणे बाड़े पता नेईं। 22 अगर अउं ना एन्ताथ त तेन्हि जे तेन्के पाप बारे ना बोताथ त से पापी ना बोलिन्तेथ; पर अब त मेईं एई कइ तेन्हि बोताउ, त तेन्के पाप लिए अब कोई बाहान नेईं। 23 जे मोउं ना मानता, से में बोउ बि ना मानता। 24 अगर अउं तेन्हि बुच से कम ना कताथ जे केनि कदी नेईं किओ त से पापी ना बोलिन्तेथ। पर अब तेन्हि में सम्हाई कम हेर कइ बि मोउं त में बोउ दुहि जेईं ना मानते। 25 ए तोउं भु ताकि धरमे कताब अन्तर जे लिखो असु
‘वेबझह तेन्हि मोउं जुए दुश्माणी की’” e
“पूरु भुओ। 26 पर जपल से मदत करणे बाड़ा एईयाल जेन अउं तुसी केईं लंघान्ता, मतलब, सच्चा परमेश्वरे आत्माf जे बोउ केआं एन्ती, से में बारे उगाही देन्त। 27 त तुस बि में उगाह देन्ते किस कि तुस में कमे शुरु केआं मोउं जुए साते असे।”