पापी जिल्हाणु त यीशु
8
1 पर यीशु जैतुने फाट पुठ गा। 2 त पथवारी देहेर अन्तर आ, त सम्हाई मेह्णु तस केईं ए। से भीं बिश कइ तेन्हि शिक्षा देण लगा।3 तपल धर्मशास्त्री त फरीसी यक जिल्हाणु अण्ही, जे तेन्हि होर मेह्णु जुए टातो थी। तस बीचो बुच खड़ कर कइ तेन्हि यीशु केआं पुछु 4 “ए गुरु! असी ए जिल्हाणु नाजायज रिश्ता रखते टातो असी। 5 मूसे नियम अन्तर त असी जे निआंग असी कि ईं जिल्हाणु घोड़िआई घोड़िआई मारीण।a पर तु इस जिल्हाणु बारे की बोता?” 6 तेन्हि तस खरे चलाक जुए गलत बोलुण जे ई पुछु, ताकि तेस पुठ दोष लाई बटियेल। पर यीशु उनकुशी कइ भीं लिखुण लगा।
7 जपल से तस पुछुण लगे त तेन सुसुर भोई कइ तेन्हि जे बोलु, “तुं बुच जेन कदी पाप नेईं किओ, पेहले तस घोड़े देण दिए।” 8 तोउं दुबारी से उनकुशी कइ अपु अंगुलु बइ लिखुण लगा।
9 पर तसे ई बोक शुण कइ बुढे केआं गभुर तकर सम्हाई यक यक कइ तठिआ नश गे, त यीशु अकेला रेही गा। से जिल्हाणु बुच खड़ खड़ थी। 10 यीशु सुसुर भोई कइ तस जे बोलु, “जिल्हाणुआ! से सम्हाई को गे? तोउ पुठ कि केनि कोई दोष ना ला ना?” 11 त तेन तस जे बोलु, “ए प्रभु, केनि ना।” त यीशु तस जे बोलु, “अउं बि कोई दोष ना लान्ता। गा त दुबारी कदी पाप ना कर!”]
यीशु, धरती टगड़ियार
12 पता, यीशु दुबारी मेह्णु जे बोलुण लगा, “अउं धरती टगड़ियार भो; जे में पतोती एन्ता, से कदी अन्हारे अन्तर ना हंटता। पर से टगड़ियार तस जीवने बथ हरालती।”b 13 त फरीसी तस जे बोलु, “तु अपफ अपु उगाही देन्ता; त तें उगाही कोई ना मानता।”c 14 यीशु तेन्हि जे जवाब दी कइ बोलु, “अउं अपु उगाही अपफ बि दिउं त, तोउं बि से सही असी, किस कि मोउं पता असा कि अउं कोठिआ अओ असा त को जे घेन्ता। पर तुसी पता नेईं कि अउं कोठिआ अओ असा त को जे घेन्ता। 15 तुस इस धरती हेसाब जुए पंची कते; पर अउं केसे पंची ना कता। 16 अगर अउं पंची बि करुं तोउं बि में पंची सच्ची असी; किस कि अउं अकेला ना कता, अउं त में बोउ जेन अउं लंघो असा, अस दुहिए कते। 17 तुं नियम अन्तर बि ई लिखो असु कि दुई उगाही के कोई बि बोक पक्की भुन्ति।d 18 यक उगाह त अउं अपफ असा, होरा उगाह में बोउए असा जेन अउं लंघो असा।” 19 तेन्हि तस केआं पुछु, “तें बोउ कोठि असा?” त यीशु तेन्हि जे बोलु, “अगर तुसी में पता भुन्ताथ त में बोउए बि पता भुन्ताथ।” 20 ई सोब बोक तेन देहरे बहोड़ भण्डार भेएड़े शिक्षा देण टेम बोली, पर केनि से ना टाता; किस कि तसे टेम अपल तकर नेओथ अओ।
21 तेन तोउं तेन्हि जे बोलु, “अउं घेन्ता, त तुस मोउं तोपते त अपु पापे बजन माफी मरते। जेठि अउं घेन्ता, तठि तुस एई ना सकते।” 22 त यहूदी नेते अपफ बुच बोलु, “ए कि अपु मारणी मरता ना त किस बोता, ‘जेठि अउं घेन्ता, तठि तुस एई ना सकते।’” 23 त तेन तेन्हि जे बोलु, “तुस उन्होरी भीन्थ, त अउं खड़ोरिया अओ असा। तुस धरती भीन्थ, पर अउं धरती ना भो। 24 तोउं त मेईं तुसी जे बोलु कि तुस अपु पापे बजन माफी मरते। अगर तुस विश्वास ना कते कि ‘अउं सेईंए भोe’, त तुस अपु पापे बजन माफी मरते।” 25 त तेन्हि तस केआं पुछु, “तु कोउं भो?” यीशु तेन्हि जे बोलु, “जीं अउं शुरुवात केआं बोता अओ असा, ‘अउं सेईंए भो’। 26 तुं बुराई बारे मोउं सुआ बोलुण त पंची बि करीण असी। पर अउं ना कता। किस कि अउं सद सेईंए बोता, जे मेईं तस केआं शुणो असु, जेन अउं लंघो असा। से सच्चा असा।”
27 पर से ईं ना समझे कि यीशु तेन्हि जे परमपिता परमेश्वरे बारे बोलुण लगो असा। 28 त यीशु तेन्हि जे बोलु, “जपल तुस मनखे कुआ खड़िया ढनान्ते, तपल तुसी पता लगता कि ‘अउं सेईंए भो’ त अउं अपफ कुछ ना कता, पर जीं बोउ शिचालता, तीं अउं बोक कता। 29 त जेन अउं लंघो असा, से मोउं जोई साते असा; तेन अउं अकेला नेईं छोओ, किस कि अउं हमेशा सेईंया कम कता, जे तस खुश कते।” 30 यीशु ई बोलुण लगो थिआ कि सुआ मेह्णु तस पुठ विश्वास किआ।
सच्चाई अजाद कती
31 तपल यीशु तेन्हि यहूदी मेह्णु जे बोलु, जेन तसे बोक मनो थी, “अगर तुस में बोक मानते रेहन्ते त तुस सच्चे में चेले बणते। 32 तुसी सच्चाई पता लगता, त से सच्चाई तुसी अजाद कती।” 33 त तेन्हि तस जे बोलु, “अस अब्राहमे ऊड़ी भोf त कदी केसे गुलाम नेईं बणो; त तु कीं बोता कि असी अजादी मेती?” 34 यीशु तेन्हि जे बोलु, “अउं तुसी जे बोता कि जे बि पाप कता, से पापे गुलाम भो। 35 त गुलाम हमेशा गी ना बिश्ता; पर कुआ बिश्ता। 36 त अगर कुआ तुसी अजाद कता, त तुस सच्चे अजाद भोई घेन्ते। 37 मोउं पता असा कि तुस सम्हाई अब्राहमे ऊड़ी भो; तोउं बि तुस मोउं मारण चहन्ते, किस कि में बोक पुठ विश्वास करणे तुं मन नेईं। 38 अउं तसे बोता, जे अपु बोउ परमेश्वर केईं काओ असु, त तुस तसे कते, जे तुस अपु बोउ केआं शुणते।”
39 त तेन्हि तस जे जवाब दिता, “हें बोउ अब्राहम भो।” त यीशु तेन्हि जे बोलु, “अगर तुस सच्चे बि अब्राहमे गभुर भुन्तेथ त तुस बि तसे ईं कम कतेथ। 40 पर तुस त मोउं मारण चहन्ते, जे तुसी परमेश्वर केआं शुणो सच्चा वचन शुणान्ता। अब्राहमे त कदी ईं किओरु नेओथ। 41 पर तुस अपु बोउए ईं कम कते।” त तेन्हि तस जे बोलु, “अस तें ईं हलड़ नेईं जमो; हें यके बोउ असा, जे परमेश्वर भो।” 42 त यीशु तेन्हि जे बोलु, “अगर परमेश्वर तुं बोउ भुन्ताथ त तुसी अउं बि ट्यारा भुन्ताथ; किस कि अउं परमेश्वर केआं अओ असा। अउं अपफ नेईं अओ, पर परमेश्वरे अउं लंघो असा। 43 तुसी में बोक तोउं ना समझ एन्ती किस कि तुस में बोक ना मानते। 44 तुसी सम्हाई के बोउ शैतान भो त तुस तसे इच्छाई मुताविक जीण पसंद कते। से त शुरुवात केआं ईं मेह्णुमार असाg त तस कदी परमेश्वरे सच्चा वचन ट्यारे ना लगे, किस कि सच्चाई तस अन्तर नेईं। जपल से झूठ बोता, त अपु सभावे हिसाब जुए बोता किस कि से झूठा असा त झूठ बोलुणे बाड़ी के बोउ असा। 45 तोउं त जपल अउं सच्चाई बतान्ता, त तुस मोउं पुठ विश्वास ना कते। 46 तुं बुच कि कोई बि में दोष किढ़ बटता ना? त अगर अउं सच्चु बोता त तुस मोउं पुठ विश्वास करिये लौता। 47 जे परमेश्वर केआं असा, से परमेश्वरे बोक शुण कइ मानता। पर तुस तोउं शुणुण नेईं लगो, किस कि तुस परमेश्वर केईआं नेईं।”
यीशु अब्राहम केआं बि बोडा
48 ई बोक शुण कइ यहूदी नेती तस जे बोलु, “कि असी ठीक ना बोलु ना कि तु यक सामरीh ईं असा त तें अन्तर दुष्ट आत्मा असी।” 49 यीशु तेन्हि जे बोलु, “मोउं अन्तर कोई दुष्ट आत्मा नेईं। पर अउं अपु बोउए इज्जत कता त तुस में बेज्जती कते। 50 अउं अपु शान ना चहन्ता, पर यक असा जे में शान चहन्ता। से सम्हाई के पंची कता। 51 अउं तुसी जे बोता कि जे मेह्णु में बोक मानता, से कदी मरते नउ,i पर तेन्हि अमर जीवन मेता।” 52 त यहूदी नेती तस जे बोलु, “अब असी पता चला कि तें अन्तर सच्चे बि दुष्ट आत्मा असी; किस कि अब्राहम त जाई कपल मरि गो असा, भविष्य वक्ते बि जाई कपल मरि गो असे त तु बोता कि ‘अगर कोई में बोक मनाल त से अमर भोई घेन्ता, त कदी ना मरता।’ 53 हें लकड़ दादु अब्राहम त मर गा, त तु कि तस केआं बि बोडा असा ना? भविष्य वक्ते बि मर गे, त तु अपफ जे की समझता?” 54 यीशु जवाब अन्तर बोलु, “अगर अउं अपफ अपु इज्जत कता त में इज्जत कुछ नेईं। पर में इज्जत करणे बाड़ा में बोउ असा, जेस तुस ‘हें परमेश्वर’ बोते। 55 पर तुस तस ना जाणते, अउं जाणता। अगर अउं बोता कि ना, तसे मोउं पता नेईं, त अउं बि तुं ईं झूठा बणता। पर अउं तस जाणता त तसे बोक मान कइ जीन्ता। 56 में धरती पुठ बिशणे रोज हेरण जे तुं लकड़ दादु अब्राहम सुआ हप्पड़िये थिआ, त तेन काओ बि त सुआ खुश भुआ।” 57 तेन्हि यीशु जे बोलु, “तोउ होता पंझा साल बि नेईं भो, त तु बोता कि अब्राहम काओ असा।” 58 यीशु तेन्हि जे बोलु, “अउं तुसी जे बोता कि अब्राहम जमुण केईआं पेहलाई अउं असा।”j 59 तपल तेन्हि तस मारण जे घोड़ टातेk पर यीशु नियोख कइ देहेर केआं नश गा।