यीशु त चुसुणे बाड़ा यूहन्ना
11
1 जपल यीशु अपु बारोही चेली जे सोब बोके बोल छेई, से बि तठिआ घेई गा। से इधौरी-उधौरी ग्रां त शेहरे मेह्णु जे शिचालुण लगा त प्रचार बि किआ। 2 त चुसुणे बाड़ा यूहन्ना जेहेल अन्तर मसीहे कमे बारे शुणु त अपु चेले तेस केआं ई पुछुण जे लंघाए। 3 तसे चेली यीशु जे बोलु, “कि परमेश्वरे बोलो से एणे बाड़ा तु भो ना, कि असी कोउं होरा भाड़ण?” 4 यीशु जवाब दिता, “जे कुछ तुस शुणते या हेरते, घेई कइ सोब यूहन्ना जे बोलीण दिए। 5 अन्हे से हेरते, लटे से हंटते, कोढ़ी ठीक भोई घेन्ते, टौणे से शुणते त मरो से जीएईंते, होर जे कंगाल असे तेन्हि खुश खबरी शुणान्ते।a 6 होर धन्य असे से मेह्णु, जे मोउं पुठ विश्वास कते, त कदी शक ना कते।”7 जपल से तठिआ घेई गे त यीशु यूहन्ने बारे मेह्णु जे बोलुण लगा, “तुस अरुणि धार कि हेरण जे गो थिए? ब्यारी बेलिए हिलतु घास हेरण जे गो थिए ना? ना! 8 फिर तुस की हेरण जे गो थिए? खरे झिणे डबो मेह्णु हेरण जे ना? ना ना! हेरे! जे खरे झिणे डबते से राजमहल अन्तर बिश्ते। 9 फिर किस गो थिए? केसे भविष्य वक्ता हेरण जे ना? आं, अउं तुसी जे बोता कि भविष्य वक्ती केआं बि बोडे हेरण जे गो थिए। 10 ए सेईंए भो जेसे बारे धरमे कताब अन्तर लिखो असु: परमेश्वरे बोलु,
‘हेर, अउं अपु दूत तोउ केईआं अगर लंघान्ता,
जे तोउ जे बथ सुसुर जुढ़ेरता।’b
11 अउं तुसी जे बोता कि जे जिल्हाणु जमो असे, तेन्हि अन्तरा चुसुणे बाड़ा यूहन्ना केआं ज्यादा खास कोई न भो। पर स्वर्गे राज्य अन्तर सोबी केआं मठुड़ बि यूहन्ना केआं खास असा। 12 चुसुणे बाड़ा यूहन्ना प्रचार करण केआं खड़ आज तकर स्वर्गे राज्ये खिलाफ सुआ कोशिश भुण लगो असी त ताकतवर मेह्णु तस अपु वश अन्तर करणे कोशिश कते।c 13 चुसुणे बाड़ा यूहन्ने एण तकर सोब भविष्य वक्ता त नियम परमेश्वरे राज्ये बारे भविष्य वाणि कते रिहे। 14 अगर तुस मनुण चहन्ते त यूहन्ना ईं से एलिय्याह भविष्य वक्ता भो, जे एणे बाड़ा थिआ।d 15 अगर तुस में बोक ध्यान जोई शुणियेल त तुस समझ घेन्ते।”
16 “मोउं इस टेमे मेह्णु के बराबरी केस जोई करीण? से तेन्हि गभुरु के ईं असे, जे बाजार बिश कइ यक होरी जे हक दी कइ बोते: 17 ‘असी तुसी जे ढोंस बेईंछ बजाई, पर तु ना नचे; असी रोलो-गाश की, पर तुसी अपु डडोर न बजाउ।’ 18 किस कि यूहन्ना खाणे पीणे बाड़ा न थिआ, त तुसी बोलु कि ‘एस अन्तर दुष्ट आत्मा असी।’ 19 अउं, मनखे कुआ खाणे पीणे बाड़ा असा त तुस बोते ‘हेरे! बोडपेटि त प्याकड़, मामला नेणे बाड़े त पापी मेह्णु के मितर भो’! तोउं बि कमी के फले बइ मेह्णु पता लगता कि परमेश्वरे ज्ञान सच्चा असा।”
अविश्वासी पुठ तौबा
20 तोउं यीशु तेन्हि शेहरी मेह्णु पुठ झई किढ़ण लगा, जेन्के बुछ तेन सुआ चमत्कारे कम किओ थिए, किस कि तेन्हि अपु मन ना बदले। 21 तेन बोलु, “ए खुराजीने शेहरे मेह्णुओ! ए बैतसैदा ग्रांए मेह्णुओ! तुं खेया खाट भोई घेण असु किस कि जे चमत्कारे कम मेईं तुं बुछ किए, अगर से सूर त सैदा शेहर अन्तर किओ भुन्तेथ, त से मेह्णु जाई कपले केईआं बुरुड़ लपेट कइ त पटास थशि कइ पछतान्तेथ त अपु मन बदलान्तेथ। 22 पर अउं तुसी जे बोता कि परमेश्वरे न्याय करणे रोज तुं हाल सूर त सैदा शेहर केआं बि ज्यादा बुरा भुन्ता।”
23 “त ए कफरनहुम शेहरे मेह्णुओ, तुस सोचते भोल कि तुसी स्वर्ग अन्तर सुआ इज्जत मेती। पर ना! तुं हाल त नर्क घेणे भुन्ता! जे चमत्कारे कम तोउ अन्तर किओ असे, अगर सदोम शेहर अन्तर किओ भुन्तेथ, त से आज तकर बि भुन्ताथ। 24 आं, तेस रोज तुं हाल सदोम शेहरे मेह्णु केआं बि ज्यादा बुरा भुन्ता।”e
थको त भुंजो मेह्णु जे अराम
25 तेस टेम यीशु प्रार्थना कर कइ बोलु, “में बोउआ, स्वर्गे त धरती प्रभु, अउं तें धन्यवाद कता कि तेईं ए बोके ज्ञानी त अक्लदार मेह्णु केआं नियोक कइ रखी त बेअक्ल कें धे दिती। 26 आं, ए बोउआ, किस कि तोउ इहांणि ठीक लगु।” 27 तोउं तेन तेन्हि जे बोलु, “में बोउए मेन्धे सोब किछ दुतो असु; बोउ छड़ कइ कोई कुआ न जाणते; त कुआ छड़ कइ होर कोई बोउ न जाणते; होर सिर्फ से मेह्णु जाणते जेस पुठ कुआ अपु बोउ प्रगट करण चहन्ता।f 28 मोउं केईं एईए तुस सोब, जे मेहनत कर कइ थको असे त परेशानी बेलिए दबीए असे, अउं तुसी अराम देन्ता। 29 में बोके जूंण अपु मन अन्तर करे त मोउं केआं शिचे; किस कि में गुण हर किछ सेहण करणे बाड़ा त मन अन्तर दया रखणे बाड़ा भो। त तुसी अपु मन अन्तर अराम मेता। 30 किस कि में बोके जूंण सुख्तु त में भारा पोला असा।”