सत्तर चेले लंघाण
10
1 ई सोब भुण केआं पता, प्रभु यीशु सत्तरa होरे मेह्णु चुणे त जेस जेस शेहर त ग्रां तेस घेण थिउ, तठि तठि त से दुई दुई जेईं अपु अगर लंघाए। 2 तेन तेन्हि जे बोलु, “फसली बग त सुआ असे, पर कमुणे बाड़े थोड़े ईं असे। त मालिके छनेअरे करे कि बग लुणुण जे कमुणे बाड़ी लंघाए।b 3 घिए; हेरे! अउं तुसी तीं लंघान्ता जीं कोई शेंखु बुच ढडुड़ रखता।c 4 त अपफ जोई न रुपेई, न झोड़ा, न बूट नीए, होर न बत केसे जे नमस्ते करेd। 5 जेस केसे गी बि घियेल त पेहले बोले ‘इस गीहे भला भो’। 6 अगर तेस अन्तर कोई अशुश पाणे लेएक भोल त तुं अशुश तेस पुठ घेन्ति, ना त तुसी केईं वापस एई घेन्ति। 7 तेस गी बिशे, त जे किछ तेन्हि केआं मेईंयेल से खाए पिए, किस कि मजूर अपु मजूरी मेओ लौती।e दुआरे दुआरे न रुड़के। 8 जेस शेहर बि घियेल, अगर से तुं आबिश करियेल त जे कुछ बि खाण जे तुन्धे देन्ते, तस खाण दिए। 9 तठियाणि बीमार मेह्णु ठीक करे त तेन्हि जे बोले ‘परमेश्वरे राज्य तुं भेएड़ पुजी गो असा’। 10 पर केस शेहरे मेह्णु अगर तुं आबिश ना करियेल त तसे बाजार घेई कइ बोले, 11 ‘तुं शेहरे धूड़ बि जे हें खुरी जुए लगो असी, अस तुं साम्हाणि ठुटकी छते। फिर बि तुसी ई समझे कि परमेश्वरे राज्य नीड़ा एई गो असा।’f 12 अउं तुसी जे बोता कि न्याय करणे रोज तेस शेहरे मेह्णु के हाल सदोम शेहरे मेह्णु केआं बि सुआ बुरा भुन्ता।”gविश्वास ना करणे बाड़े शेहर जे अफशोस
13 तोउं यीशु बोलु, “ए खुराजीने शेहरे मेह्णुओ! ए बैतसैदा ग्रांए मेह्णुओ! तुं खेया खाट भोई घेण असी। किस कि जे चमत्कारे कम मेईं तुं बुछ किए, अगर से सूर त सैदा शेहर अन्तर किओ भुन्तेथ, त से मेह्णु कपले ईं बुरुड़ लपेट कइ त पटास पुठ बिश कइ पछतान्तेथ त अपु अपु मन बदलान्तेथ।h 14 पर परमेश्वरे न्याय करणे रोज तुं हाल सूर त सैदा केआं बि सुआ बुरा भुन्ता। 15 होर त ए कफरनहुम शेहरे मेह्णुओ, तुस सोचते भोल कि तुसी स्वर्ग अन्तर सुआ इज्जत मेती। पर ना! तुं हाल त नर्क घेणे भुन्ता!”
16 तोउं यीशु तेन्हि मेह्णु जे बोलु, “जे तुं शुणता, से जीं में शुणता; होर जे तुसी ना मानता, से मोउं बि ना मानता। होर जे मोउं ना मानता, से में लंघाणे बाड़े बि ना मानता।”i
सत्तर चेली वापस एणे
17 पता से सत्तर चेले बोडे खुशी जुए वापस ए त बोलुण लगे कि “ए प्रभु, तुं नओं बेलिए दुष्ट आत्मा बि हें वश अन्तर असी।” 18 तेन तेन्हि जे बोलु, “मेईं शैतान स्वर्ग केआं बिजली ईं उणिहां जे झड़ता का।j 19 हेरे, मेईं तुन्धे कीड़े त बिच्छु पुठ हंटणे, त दुश्माणे सोब ताकत पुठ हक दुतो असा। होर केसेरी बेलि तुसी किछ ना भुन्तु। 20 फि बि तुस एत खुश ना भो कि आत्मा तुं वश अन्तर असी, पर तुस इस बझई जुए खुश भो कि परमेश्वरे तुसी बचाणे लिए ठीक किओ असु।”
यीशु खुश भुण
21 तपल से शुची आत्माई बेलि भर कइ खुश भुआ त बोलु, “में बोउआ, स्वर्गे त धरती प्रभु, अउं तें धन्यवाद कता कि तेईं ए बोके ज्ञानी त अक्लदार मेह्णु केईआं नियोक कइ रखी त बेअक्ल कें धे दिती। आं, ए बोउआ, किस कि तोउ इहांणि ठीक लगु।” 22 तोउं तेन तेन्हि सत्तर चेली जे बोलु जे तेन लंघो थिए, “में बोउए मेन्धे सोब किछ दुतो असु; बोउ छड़ कइ कोई कुआ न जाणते; त कुआ छड़ कइ होर कोई बोउ न जाणते; होर सद से मेह्णु जाणते जेस पुठ कुआ अपु बोउ प्रगट करण चहन्ता।”k 23 तपल तेन बाराह चेली के कना जे खिरक कइ तेन्हि जे बोलु, “धन्य असे तुस सम्हाई जे तुस ई सोब तस हेरते। 24 किस कि अउं तुसी जे बोता, सुआ भविष्य वक्ते त राजे चहन्तेथ कि कि जे कम तुस हेरते, से बि हेरियेल, पर तोउं बि ना काउ; से चहन्तेथ कि जे बोके तुस शुणते, से बि शुणियेल, पर तोउं बि ना शुण बटी।”
सच्चे भेयाड़े कथा
25 lत हेरे! यक धर्मशास्त्री खड़ भुआ त तसे परखणे लिए ई पुछुण लगा, “ए गुरु, मोउं अमर जीवन मेण जे की करुण?” 26 तेन तस जे बोलु कि “नियम अन्तर की लिखो असु? तु की पढ़ता?” 27 तेन बोलु, “नियम अन्तर लिखो असु, ‘तु प्रभु, अपु परमेश्वर जोई अपु पूरे मन, त पूरे प्राण त पूरी शक्ति जुए परेम कर। त अपु भेयाड़ जुए अपु बराबर परेम कर।’” 28 यीशु तस जे बोलु, “तेईं ठीक बोलु। ईं कर, तोउं तु अमर रेहन्ता।” 29 पर तेन अपफ जे इ हरालण जे कि तेन सचमुच यक अणजाण सवाल पुछो असा, तेन बोलु, “त में भेयाड़ कोउं असा?” 30 यीशु बोलु, “यक मेह्णु, यरुशलेम केआं यरीहो शेहर जे घेण लगो थिआ त डाकु से बटेर कइ मडा त तसे झिणे खुई कइ से अधमरा कइ तठि छड़ दिता। 31 त ई भु कि तेन बते बइ यक पुजारा घेण लगो थिआ। पर तस हेर कइ होर कनारे बइ घेई गा। 32 पता तीं यक लेवी ऊड़ी मेह्णु m बि तेन बते बइ आ, पर तस हेर कइ से बि होर कनार बइ घेई गा। 33 पर सामरिया राज्ये यक जातुर तेन बइ आ त तेस मेह्णु हेर कइ तसे दाह आई। 34 से तसे भेएड़ एई कइ तसे घा साफ किए, त दुवाई लाई कइ मरमपट्टी की। त अपु घोड़े पुठ तस बिशाण कइ सराई नीआ त तठि तसे सेवा की। 35 दोके रोजे बाद, तेनि दुई दीनार दी कइ सराई मालिक जे बोलु, ‘एसे देखभाल कर, त जे कुछ बि होरा खर्चा भुन्ता तस अउं वापस एई कइ दी छता।’ 36 अब तें समझ अन्तर आ ना जे मेह्णु डाकु कुटो थिआ, एन्हि टोहिए बुच तसे सही भेयाड़ कोउं भो?” 37 त तेन धर्मशास्त्री बोलु, “जेन तस पुठ दाह की, से।” यीशु तस जे बोलु, “गा त तु बि इरुह कर।”
सच्चे भेयाड़े कथा
मार्था त मरियमे गी यीशु
38 nजपल यीशु त तसे चेले घेण लगो थिए त यीशु यक ग्रां अन्तर गा। तठि मार्था नओएं यक जिल्हाणु तसे अपु गी धाम की। 39 मरियम नओएं तसे यक भेण थी। से प्रभु खुरी भेएड़ बिश कइ तसे वचन शुणतिथ। 40 पर मार्था तसे सेवा कते-कुते थकी गई त तसे भेएड़ एई कइ बोलु, “ए प्रभु, तुसी कि पता नेईं ना कि में भेण मोउं केआं अकेले कम करवाण लगो असी? त तस जे बोल कि मोउं जुओई मदत कर।” 41 प्रभु तस जे बोलु, “मार्था, ओई मार्था; तु सुआ चीजी के बारे सोचती त थकी बि घेन्ति। 42 पर यके बोके बारे सोचुण जरूरी असु, जे कि ‘में बोक शुणुण’। मरियम तस करण जे चुणो असी जे तस केईआं ना छुड़केईन्तु।”