पार 21

पुन्न सरग आरू पुन्न मोंजीपूर

1 मारी आन पुन्न सरगीन आरू पुन्न मोंजीपूरीन चूड़ेन। एटे एनोड मुन्नीत सरग आरू मुन्नीत मोंजीपूर मेट चेन्डोव आरू सोमून्द बेले मायोतो। 2 मारी आन, मापोरबू आची मेन्डान पुन्न एरूसेलेम गेड़ेन सरग तो मापोरबून कान तीग इड़ूरानोन चूड़ेन। आद तान्न गोसीयालूग चिंगारची एरी तायार मेन्डान मायतेर जियाटीन आकाट मेन्डू। 3 मारी आन गाद्दी तीग, “इद चूड़! मापोरबून डेरा, मांजेन नाड़बूल मेन्डा। ओड ओर चेंगे डेरा पातराड आरू ओर ओन लोग एर्रार आरू मापोरबू कुदे ओर चेंगे मेन्नी ओर मापोरबू एर्राड। 4 ओड ओर बोम्मेल तीग जाम्मा आड़रान नीरूलीन ताचराड आरू आना चाय्यकूड मुरले चिल्ला; आना आड़रानो आरू नेञ्ञकूरानो आरू नोयरानो मुरले चिल्ला। एटे एनोड मुन्नीत जाम्मा इसाबूल मेट चेन्डोव” एन्डान जोड़ तो पोल्लेन वेट्टेन।

5 आरू गाद्दी ती उन्डरानेड, एके “इद, चूड़! आन जाम्मा इसाबूलीन पुन्नोव चाजूमेन” एट्टेड। आरू ओड मारी बेले, “इदीन लिक काड, एटे एनोड ई पाटेल बिसवात चाजूरान बातेर तोव आरू चेत्तेतोव आय” एट्टेड। 6 मारी ओड आनीन, “आन जाम्मेनी पूराकतेन नान। आनी जाम्मेनी उपजाकतानेन आरू आनी जाम्मेनी मुरजाकतानेन आय। आरू आनी मुर आरू चेरा चेरीतेन आय। आन नीर आन्डरानेरीन, नीर आन्डरानो मिड्डारे इनाम तो नीर उनतीकतान। आद जुग-जुग तो जियोम चियरान नीर पोड़तान बीजे तो आय। 7 एड चेयतानीन आराकतार, ओरी ई इसाबूल जाम्मेन काबजेतेर एर्रार: आन ओर मापोरबू एर्रान आरू ओर आन्न पापकूल एर्रार। 8 एरोड सताव एरू नारची किली बिसवातीन चायूरान पुरकीकूल, बिसवात चाजायेर, गिन-गिनाकतान कामूल चाजूरानेर, आनकीकतानेर, दारीयालेर, गिड्डालेर, मुरीतूलीन मानूरानेर, आरू टेगरान जाम्मा लोगीन नातेक ओड किच तो सोमून्द ती तीनताड। आद किच आरू गन्दकीनोड नीरी-नीरी मेन्डा; इद्दी आय दुसेर चाय्यकूड।”

पुन्न एरूसेलेम

9 मारी चेरा चेरीत सात गोटा गेटनेल तीग कोप्पी मेन्डान सात गोटा बेटकीलीन केय्य ती पात्ती मेन्डान, सात गोटा सरग दूतकूल कान तीग ओकूर आन्न लेग्गाट वेञ्ञेड आरू आन्नोड ऊबी किली, “इट वेर, आन इनीन मायतेर जियाटीन चिलाड मेन्डा पापीन आडेयीन टोटीकतान” एट्टेड। 10 तेबे ओड आनीन जियोम तो ताकोत तीग ओक बेड़तो, डेंगाट कोप्पे ती उञ्ञेड। आरू मापोरबू आची मेन्डान एरूसेलेम गेड़ा सरग तो मापोरबून कान तीग इड़ूरानोन टोटीकतेड। 11 आद मापोरबून चाबाव तीग मेडूरान रेग तीग, निक्के मोल्लेत एसब आरू बिल्लोर केलकूलीन आकाट मेडूरू। 12 आ गेड़ेत बीती निक्के डेंग मेन्डू, आरू आदूग बारा गोटा कापाटूल मेन्डूव आरू वेलकूल ती बारा गोटा सरग दूतकूल मेन्डीर। आरू आ कापाटूल ती इसराएलीन बारा जानीन कुटूमतेरीन पिदीरूल लिकूरानो मेन्डूव। 13 पोकाल पेतानेल मून्डू कापाटूल, पाडरानेल मून्डूक, पोडेड टिटाक मून्डूक, आरू किड़ेड टिटाक, मून्डू कापाटूल मेन्डूव। 14 गेड़ेत बीतीग बारा गोटा पाया कोटरानोव मेन्डूव आरू आ पाये ती मेन्डा पापीन, आ बारा जान पोरबू नीतीकतानेरीन पिदीरूल लिकूरानो मेन्डूव।

15 आन्नोड ऊबूरानेडीन केय्य ती, गेड़ा आरू आदीन कापाटूल आरू बीतीन ऊदीक ओक सोन तो गेज्जेक लाटी मेन्डू। 16 आ गेड़ा उन्डरान पाड नालू टोकूल तोव मेन्डूव। आरू आदीन लाटी आरू ओसार ओकती सामान मेन्डू। आरू ओड आ गेज्जेक लाटीनोड आदीन ऊदीकतेड आरू आदीन लाटी दुय आजार आरू दुय सोव किलो मीटेर एञ्ञो। आदीन लाटी आरू ओसार, आरू डेंग ओकती सामान मेन्डू। 17 ओड आ गेड़ेत बीतीन बेले ऊदीकतानूग सात कोड़ नालू आतूल एञ्ञो। ऊदीकतानो सरग दूतीन इसाब ती आरू मांजेन इसाब ती ओकती काटार मेन्डू। 18 आ गेड़ेत बीती एसब एन्डान मोल्लेत केल्ल तो बान्नी मेन्डू। आरू गेड़ा जेग जेगाट काँचीन आकाट नाती मिसड़ा चिला सोनोड बान्नी मेन्डू। 19 आ गेड़ेत बीतीन पाया कोटरानो मोल्लेत मेडूरान केलकूलोड चिंगारतानो मेन्डू। पोईल तो पाया एसब केल्ल तो मेन्डू; दुसेर निल मनी तो निलीयाट रेंग तो मेन्डू। तिसेर लालडी तो, चोंवता मरकत तो पाय रेंग तो, 20 पाँचवां गोमेदक तो नेतरोत, चटवां मानीकीये तो, सातवां पारीयोप देलीत पीतमनी तो, आटवां पेरोज तो, नोवां पुकराज तो, देसवां लेयसानीये तो, इगारवां दुमरकान्त तो, आरू बारवां काकान्ड रेंग तो याकूत तो बानरानोव मेन्डूव। 21 बारा गोटा कापाटूल बारा गोटा मोतीलतोव मेन्डूव। ओक-ओक कापाट ओक-ओक मोती तीग बान्नी मेन्डू। गेड़ेत चेड़ेक एके जेग जेगाट काँचीन आकाट नाती मिसड़ा चिला सोन तो मेन्डू।

22 आरू आन आ गेड़े ती आरोई गुडीन चूड़ेना। एटे एनोड सोब ले लाव तो पोरबू मापोरबू आरू मेन्डा पापीन आकाटतेड मेन्डानूग आना गुडी लागा मेन्डू। 23 आरू आ गेड़े ती पोकाल आरू नेलींग लागा मेन्डू। एटे एनोड मापोरबून चाबाव तीग मेडूरान रेग तीग आना विलीज आट्टोतो आरू मेन्डा पापीन आकाटतेड बेले आदीन दियेन आकाट मेन्नी विलीज आटीकतीड। 24 आरू देचेल-देचेल तो लोग आ गेड़ेत विलीज तीग पीयरार आरू मोंजीपूर तो कोसकूल आपला देन मालीन आरू निरबे चाबाव तो मोल्लेत बानीलीन आना एन्दरी किली मापोरबून इजीत मानूरार। 25 आरू आना एतोडी पोकाल आन्डा कान्डूग आदीन कापाटूलीन एतोडी केटपारा आरू आना एतोडी चीकोड एराया। 26 आरू देचेल-देचेल तो लोग आपलेग इजीत आरू मानीन एन्दरी मेन्डान देन मालीन आरू निरबे चाबाव तो मोल्लेत बानीलीन आना एन्दरी किली मापोरबून जुवारतार। 27 एरोड चूत पाडरानो आना मुरले तान्नू ओड़ा। आना मापोरबू गिन-गिनाकतान कामूल चाजूरानेर चिलाड टेगरान कामूल चाजूरानेर मुरले तान्नू ओड़ार। एरोड जुग-जुग तो जियोम बेटूरान लोगीन पिदीरूल लिका मेन्डान, मेन्डा पापीन आकाटतेडीन कागेत ती पिदीरूल लिकी मेन्डानेरी तानरार।