पार 22

चेरा चेरीत पाटेल

1 मारी सरग दूत आनीन जेलूब केल्लीन आकाट जेग-जेगाट मेन्डान जुग-जुग तो जियोम चियरान नीर तो पेरेडीन टोटीकतेड। आद मेन्डा पापीन आकाटतेडीन आरू मापोरबून गाद्दी तीग पेची किली, 2 आ गेड़ेत चेड़ेक नाड़बूलोड पोड़तू। आदीन इकलाट आरू आकलाट जुग-जुग तो जियोम चियरान पाल तो मेरकूल मेन्डूव। आ मेरकूल ती एके बारा मासी, नेलींगूग-नेलींगूग पालकूल पातरूव। आ मेरकूल तो एवूल देचेल-देचेल तो लोगीन उजराकतूव। 3 एपोर ले आना मापोरबून कान तीग चेरापीत एर्रानो नाती मेनाया आरू मापोरबून आरू मेन्डा पापीन आकाटतेडीन गाद्दी आ गेड़े ती मेन्डा आरू ओन कामीयालेर ओनीन मोड़कूरार। 4 ओर कुदे ओन मोकोमीन चूड़ चूड़ी मेन्डार आरू ओर ओन लोग आय एनी टोटीक ओन पिदीर ओर कापारूल ती लिकूरानोव मेन्डाव। 5 आना मारी चित्ता मुरले एराया, आरू ओरूग दिया आरू पोकालीन विलीज बेले लागाया। एटे एनोड पोरबू मापोरबू ओरूग विलीज आकाट मेन्डाड आरू ओर जुग जुगूग देचेन चेलाकतार।

ईसू दूड़ा वेर्रानो

6 मारी ओड आनीन, “ई पोद्दूल बिसवास चाजूरान बातेर तोव आरू चेत्तेतोव आय। एटे एनोड पोरबू मापोरबू, आपला जियोमीन मापोरबून कान तीग काबेर वेन्नी किली लोगीन पोक चियरान गुरूकूलूग चियरानेड, तान्न सरग दूतीन, जेटके नी एर्रान इसाबूलीन तान्न कामीयालेरूग टोटीक एनी चोटतेड नाड।”

7 आनातले ईसू “इद, चूड़! आन जेटके नी वेर्रान। ई कागेत ती लिकी मेन्डान मापोरबून काबेर तो पोद्दूलीन पातीयाकतानेरूग आसतीर टोन्डूरा” एट्टेड।

8 ई पाटेलीन चूड़रानेन आरू वेनदानेन आन, एऊना आय। आन ईवीन चूड़ेक आरू वेनेक, आनीन ई पाटेलीन टोटीकतान सरग दूतीन मोड़कू केलूल पाट्टेन। 9 एरोड ओड आनीन, “एमे, ईन आटे चाजूरानो एरा। आन बेले इन आकाट आरू इन चेंगेत आवूर मापोरबून कान तीग काबेर वेन्नी किली लोगीन पोक चियरान गुरूकूल आकाट आरू ई कागेत तो पोद्दूलीन पातीयाकतानेर जाम्मेन आकाट, इन चेंगेत कामीयाल आय। मापोरबू ओकूरीनी मोड़कू” एट्टेड।

10 मारी ओड आनीन “ई कागेत तो मापोरबून कान तो काबेर तो पोद्दूलीन सील ताप्पी बोन्द चाजूमेन, एटे एनोड ई पाटेल पूरा एर्रान बेरा लेग्गे एदेरनो ना। 11 एड ओदेरोम चाजूमेड ओड ओदेरोम चाज-चाजी मेनकेड; आरू एड मेन्न तीग किच किचाट मेन्डाड ओड मेन्न तीग किच किचाटी मेनकेड; आरू एड देरमी मेन्डाड ओड देरमी मेनकेड। आरू एरीन मापोरबू तानूंग एलगाक मेन्डाड ओड मापोरबू तानूंग एलगाकतानेडीन आकाटी मेनकेड” एट्टेड।

12 आनातले पोरबू ईसू ईटे पोक्केड: “इद चूड़! आन जेटके नी वेर्रान। आरू जाम्मेगी ओर कामूल चाजूरान इसाब ती, पालटा पातरानो चिलाड इनाम चियरानो आन्न केय्य ती मेन्डा। 13 आनी जाम्मेनी उपजाकतानेन आरू आनी जाम्मेनी मुरजाकतानेन आय। आनी मुन्नीतेन आरू पिटतेलतेन आरू आनी मुर आरू चेरा चेरीतेन आय।”

14 “आपला कुड़तेलीन मेन्डा पापीन नेतीर ती चाटची मेन्डानेरूग आसतीर टोन्डूरा। ओरूग जुग-जुग तो जियोम चियरान मेर तो पाल्लीन तिनूंग पान्न टोन्डूरा आरू ओरूग वेलकूल पावोड गेड़े ती तान्नू पान्न मेन्डा। 15 एरोड एड़जालेर आकाट तो गिड्डालेर, दारीयालेर, आनकीकतानेर, मुरीतूलीन मानूरानेर, आरू टेगरान उवाटूलीन मेन्न चाजूरानेर जाम्मा गेड़ेग ले वाल मेन्डार। 16 आन, ईसू, इमीन, पोरबून बिसवात चाजूरान मान्देलीन, ई चेत्त इसाबूल तो गोवाई पोक्कू, आन्न सरग दूतीन चोटतेन नान। आन दाऊदीन कुटूम तो मुर मांजा आरू तेरानतेड आरू पोका पुलसून्दरीग पेची किली मेडूरान वेव चुक्केन आकाटतेड आय” एट्टेड।

17 मापोरबून जियोम आरू मायतेर जियाट इरडूकी “वेर” एनमोव। आरू वेनदानेर बेले “वेर” एनकेर। एरूग नीर आन्डूमो ओड वेरकेड। आरू एरूग जुग-जुग तो जियोम चियरान नीरीन उनूंग मेन्न बावूमो ओड पोयसेल चियाका उनकेड।

18 ई कागेत तो, मापोरबून कान तो पाटेन वेनदान जाम्मा लोगीन, आन, एऊना, लेक ती मेनूर एनमेन। एड बेले ई पाटे ती नातीन बेले जोड़ी किली चान्दीकपोड, मापोरबू ई कागेत ती लिकी मेन्डान गेटनेलीन ओन कान चान्दीकताड। 19 आरू एड बेले मापोरबून काबेर तो, ई कागेत तो पोद्दूलीन गुचाकपोड, जुग-जुग तो जियोम चियरान मेरीन पाल तो बाटेन मापोरबू ओनूग चियाडा। आरू मापोरबू आची मेन्डान गेड़े ती बेले ओनीन तान्नू इडाडा।

20 ई पाटेल चेत्त आय एनी गोवाई चियरान ईसू, “ओ आन जेटके नी वेर्रान” एनमेड।

आमीन, आटनीची एरको! ए पोरबू ईसू! वेर।

21 पोरबू ईसून माया पेम मापोरबू तानूंग एलगाक मेन्डानेरीन चेंगे मेनको। आमीन, आटनी एरको।