पार 20

आजार बेरेकूल तो आंगरूरानो।

1 मारी आन सरग तीग ओक सरग दूत तान्न केय्य ती किड़ीतपूर तो कुची कोया आरू ओक बेड़तो चिकरी पात्ती किली इड़ूरानोन चूड़ेन। 2 आरू ओड आ मायोन्ड बाम्ब चिलाड मुन्नीत बाम्ब चिलाड इबलीस चिलाड चेयतान एन्डानोन चुम्मी किली, काटकेड। 3 आरू ओड आदीन किड़ीतपूर ती तीनची किली आजार बेरेकूलूग केटची काट्टेड आरू आजार बेरेकूल पूरारे देचेल-देचेल तो लोगीन आद मारी बूलकाकपा मेनको एनी सील ताप्पेड। आजार बेरेकूल पोल्लान पिटतेल डेन्डीक तीग मारी आद चोड़ाक एर्रा ई।

4 मारी आन ईसू मेरचीक मेन्डान चेत्त पाटेल तो आरू मापोरबून पोद्द तो गोवाई चियरान चेत्तूग, चार्र कुडीक एर्रानेरीन जियोमूलीन चूड़ेन। आ जियोमूल, जियादीन मुरीतीन मोड़कायेरीनोव आय आरू ओर आदीन चापेन कापार ती चिलाड केय्यूल ती चापाकपायेर आय। ओरूग नियाव चिड़ाक पान्न टोन्डूरानूग, ओर गाद्दील ती उन्डी मेन्डानोन चूड़ेन। ओर जियोम पाड्डी किली चेंगे आजार बेरेकूल आर्रे गुलाय देचेन चेलाकतेर। 5 इद मारी पोईल जियोम पाडरानो आय। आरू आ आजार बेरेकूल पूरारे ऊरीन चायी आवूर एडी चाय्यरान कान तीग जियोम पाडेरा। 6 ई चाय्यरान कान तीग पोईल जियोम पाडरान ती जियोम पाडरानेर आसतीरीन बेटूरानेर आरू मापोरबू तानूंग एलगाक मेन्डानेर आय। ईटो लोगीन पोडे दुसेर चाय्यकूड पान्न चेलाक ओड़ा। एरोड ओर एके मापोरबून आरू मसीयालीन पेलाचकूल एर्रार आरू मसीयालोड आजार बेरेकूल देचेन चेलाकतार।

चेयतानीन मुरजाकतानो

7 आरू आजार बेरेकूल पूर्रान पिटतेल चेयतानीन केटतान कान तीग चायूरार। 8 आद मोंजीपूर बोँरेक मेन्डान देचेल-देचेलतेरीन बूलकाक पेता। आ जातूल तो लोगीन गोग आरू मागोग एन्डार। ओरीन चेयतान मापोरबून लोगोड लेड़ेय चाजू उड़चीकता। ओर नेकीक ओड़ा कियाल तो सोमून्द तो मान्नीन आंगोट लोग मेन्डार। 9 आरू ओर जाम्मा मोंजीपूर तो ओसार तो बाट ती ताकी चेनी किली, मापोरबू चोग चाजूरान लोगीन गेड़ेन बेड़ूरीर। आद मापोरबूग एलगाक मेन्डानेरीन गुड़सेल मेन्डान पाड आय। आरू किच एके सरग तीग उरकी किली ओरीन केरीकतू। 10 आरू ओरीन बूलकाकतान चेयतानीन एके किच आरू गन्दक तीग नीरूरान निक्के गुड़ गुड़रान किच तो सोमून्द ती तीनतेर। आना आ जियाद आरू मापोरबून कान तीग काबेर वेन्नी किली लोगीन पोक चियरान एनी टेगरान गुरून नातेक तीनची मेन्डीर। ओर आना चित्ता विलोमी आरू पाकटा पोकाली जुग जुगूग डेन्ड एर-एरी मेन्डार।

बेड़तो विल गाद्दी आरू चेरा-चेरीत नियाव।

11 आनातले मारी आन ओक बेड़तो विल गाद्दीन, आरू आना उन्डरानेडीन चूड़ेन। ओन मुन्देल मोंजीपूर आरू बादोर गूची किली मायोव आरू आवूग पाड मुरले चिला मेन्डू। 12 मारी आन चाय्यी किली जियोम पाड्डी मेन्डान बेड़कूल आरू पिटीलेकतेर जाम्मेनी गाद्दी मुन्देल निलची मेन्डानोन चूड़ेन। आरू मापोरबू ओक कागेतीन चानतेड। आना लोग चाजी मेन्डान जाम्मा कामूलीन लिका मेन्डू। आरू ओड मारी ओक कागेतीन चानतेड। आद जुग-जुग तो जियोम बेटूरान लोगीन पिदीरूल लिकी मेन्डान कागेत आय। आरू चाय्यी किली जियोम पाड्डी मेन्डानेरीन, आ कागेतूल ती एटे लिका मेन्डू आटनी, आपला-आपला कामूल तो इसाब ती मापोरबू नियाव चिड़ाकतेड। 13 सोमून्द ती बूड़ी चाय्यी मेन्डानेर आरू आवूर चाय्यी मेन्डानेर नातेक किड़ीतपूर तीग आ गाद्दीत मुन्देल निलतेर। आरू ओरीन जाम्मेनी ताम चाजी मेन्डान कामूल इसाब ती मापोरबू नियाव चिड़ाकतेड। 14-15 आरू एर-एर पिदीरूल जुग-जुग तो जियोम बेटूरान लोगीन पिदीरूल लिकी मेन्डान कागेत ती चिला मेन्डूव, ओरीन आरू चाय्यकूडीन आरू किड़ीतपूरीन नातेक किच तो सोमून्दीन आकाट तो कान तीनची काट्टेड। ई किच तो सोमून्द ती चाय्यरानो दुसेर चाय्यकूड आय।