पार 19

आलेलूया! मापोरबूग जुवार एरको।

1 इदीन ले पिटतेल आन सरग ती ओक बेड़तो जोप तो लोग निक्के जोड़ ती,

“आलेलूया! मापोरबूग जुवार एरको।

बाचाकतान इसाब, इजीत तो मान एर्रानो आरू पान्न आम्म मापोरबूनो ई आय।

2 एटे एनोड ओड नियाव चिड़ाकतानो चेत्तेतोव आरू देरोमतोव आय।

तान्न दारीयाट कामोड मोंजीपूर तो लोगीन नाचाक मेन्डान आ मुकीयाट दारीयाट आयालीन ओड नियाव चिड़ाकतेड।

ओड तान्न कामीयालेर नेतीरीन चेत्तूग आदीन पालटा पात्तेड”

एनी पोकरानोन वेट्टेन।

3 मारी ओपोट ओर

“आलेलूया! आ गेड़ा केरूरान गूञूकूड़ जुग जुगूग चुलची-चुलची मेन्डा”

एट्टेर। 4 तेबे कोड़ेक नेलवीर सियानकूल आरू नालू जियोम तो बानील गाद्दी ती उन्डी मेन्डान मापोरबून माटीकूटेल चियी किली मोड़केर आरू

“आटनीची एरको, आलेलूया!”

एट्टेर। 5 तेबे गाद्दी तीग

“ए आम्म मापोरबूग नारचूरान जाम्मा कामीयालेरे!

ओनीन इजीत मानूरान पिटीलेक आरू बेड़कूल लोगीने ओनीन चाराकपूर”

एन्डान ओक पोल्ला वेञ्ञो।

मेन्डा पापीन चुरचा बोजी

6 मारी आन ओक बेड़तो जोप तो लोगीन पोल्लेन वेट्टेन। आ पोल्ला निक्के नीर पोड़तान नीरीन आकाट आरू वाञी गुडरूरान आकाट वेनूंग एर्रू। ओर कोलार एरी किली,

“आलेलूया! एटे एनोड पोरबू आम्म मापोरबू, सोब ले लावतेड मेन्नी

देचेन चेलाकमेड।

7 वेरूर आम्मोर वेड़का आरू ऊदीम एरी किली ओनूग इजीत तो मान चियार।

एटे एनोड मेन्डा पापीन चुरचा एदेरनो ना।

आरू ओन मायतेर जियाट तानीन तानी तायार एरीकतो ना।

8 आदूग तानीन तानी, नाती मुर चिला, मोल्लेत जेग जेगाट विल गान्डेनोड

चिंगारची एर्रान पान्न चियरानो मेन्डू”

एनी पोक्केर। (मोल्लेत, जेग जेगाट विल गान्डा, मापोरबू तानूंग एलगाक मेन्डान लोगीन देरोम तो कामूलीन चिना आय।)

9 तेबे सरग दूत आनीन, “मेन्डा पापीन चुरचा बोजी ती निवतूरानेर आसतीर बेटूरार एनी लिक” एट्टेड। मारी ओड आनीन, “ई पाटेल मापोरबून चेत्त पोद्दूल आय” एट्टेड। 10 तेबे आन ओनीन मोड़कू ओन केलूल पाट्टेन। ओड एके आनीन “एमे! आटे चाजूरानो एरा। आन बेले इन आकाट, आरू आवूर बिसवासी लोगीन आकाट, ईसू मेरचीक मेन्डान चेत्त पाटेल तो गोवाई चियरान इन चेंगेत कामीयाल आय। मापोरबून मोड़कू। एटे एनोड ईसू मेरचीक मेन्डान चेत्त पाटेल तो गोवाई चियरानो ई आय, नाती केचूर चिला जियोमीन ताकोत तीग मापोरबून कान तो काबेरीन पोकरानो” एट्टेड।

विल गुर्रोल ती चोत्ती वेर्रानेड

11 आन मारी सरग चानची मेन्डानोन आरू इद चूड़! ओक विल गुर्रोल आरू आदीन कान चोकरानेडीन चूड़ेन। ओनीन बिसवात चाजूरान बातेरतेड आरू चेत्तेतेड एन्डार। ओड देरोम तीग नियाव चिड़ाक किली लेड़ेय चाजूराड। 12 ओन बोम्मेल गुड़ गुड़रान किच कूड़ेन आकाट मेडूरूव आरू ओन तेल्ल ती कुबे देचेल तो कोसकूलीन तुरेयूल मेन्डूव। आरू ओन पोडे ओक पिदीर लिकूरानो मेन्डू, आदीन तानीन चायी एडी पूनार। 13 ओड नेतीर ती तुरबूरान गान्डेन नूड़ेड नाड आरू ओन पिदीर मापोरबून पोद्द आय। 14 सरग तो पालटेनकूल मान्दा मोल्लेत, नाती मुर चिला जेग जेगाट विल कुड़तेल तुन्दी, विल गुर्रोचील ती चोत्ती ओन पोटतेल-पोटतेल चेन्डीर। 15 आरू देचेल-देचेलतेरीन आनकीक ओन चोन्ड तीग निक्के वान्ड तो कान्डेन आकाट तो पोद्दूल पेतूव आरू ओड लोवेत बाड़या पात्ती किली किन्डीक बेले ओरीन पोडे जियोम नोयपीकपाका, केरमा गोटोक एराका आंगरूराड। आरू आंगूर रेस पीदूरान कोदरे ती आंगूर पालकूलीन रेमदूरान आकाट, ओड सोब ले लाव तो मापोरबून निक्के रिच तीग, ओरीन बिलाकताड। 16 कोसकूलीन कोस आरू पोरबूकूलीन पोरबू एन्डान पिदीर ओन गान्डे ती आरू ओन कुडू ती लिकूरानो मेन्डू।

17 आनातले मारी आन ओक सरग दूतीन पोकाल पोडे निलतानोन चूड़ेन। ओड निक्के जोड़ ती कूयी किली निक्के डेंग ती वेल्लान बिसरान तिन्दान जाम्मा तीतेलीन, “वेरूर मापोरबून बेड़तो बोजी ती उलजूर। 18 कोसकूल चेप्पूल, आरू मुकीयालेर चेप्पूल आरू लाव तो माईंड चिन्डीन चेप्पूल, आरू गुर्रोचील आरू आवीन कान चोकरानेरीन चेप्पूलीन, आरू काबजे ती चिलायेरीन आरू कामीयालेरीन, पिटीलेकतेर बेड़कूल जाम्मा लोगीन चेप्पूलीन तिनूंग वेरूर” एट्टेड।

19 मारी आन आ जियाद आरू मोंजीपूर तो कोसकूल आरू ओर पालटेनकूलीन मान्दा चेंगे बिड़ी किली, आ गुर्रोल ती उन्डरानेड आरू ओन पालटेनकूलोड लेड़ू उलजी मेन्डानोन चूड़ेन। 20 आरू आ गुर्रोल ती उन्डरानेड, आ जियादीन चुम्मेड आरू आदीन चेंगे मापोरबून कान तीग काबेर वेन्नी किली लोगीन पोक चियरान एनी टेगरान गुरून बेले चुम्मेड। ऊडी आय आ जियादीन मुन्देल पोरलेत काम तो चिनेल टोटीक किली, आ जियादीन चापेन चापू इडरानेरीन आरू आदीन मुरीतीन मानूरानेरीन बुरलाक मेन्डीड। ऊर इरूलीन जियोम मेनेक-मेनेक गन्दक तीग नीरूरान निक्के गुड़ गुड़रान किच तो सोमून्द ती तीनतेड। 21 बाचूरान पालटेनकूल आ गुर्रोल ती चोत्ती वेर्रानेडीन चोन्ड तीग पेतान कान्डेन आकाट तो पोद्दूलोड चाय्यीक एञ्ञेर। आरू जाम्मा तीतेल, ओर चेप्पूलीन तिन्नी पोटा पाञ्ञीकतोव।