पार 16

मापोरबून रिच तो बेटकील

1 आनातले मारी आन गुडी तीग आ सात गोटा सरग दूतकूलीन, “चेनूर आरू मापोरबून रिच तीग कोप्पी मेन्डान सात गोटा बेटकीलतोन मोंजीपूर ती चाप्पूर” एन्डान जोड़ तो पोल्लेन वेट्टेन। 2 आदूग पोईलात सरग दूत चेनी किली तान्न बेटकी तोन मोंजीपूर ती चाप्पेड। आदूग आ जियादीन चापा मेन्डानेरूग आरू आदीन मुरीतीन मोड़कूरानेरूग नोकसान एरीकतान आरू नोयरान पोवेल उपजोव।

3 आनातले दुसेर सरग दूत तान्न बेटकी तोन सोमून्द ती चाप्पेड आरू आद मोड़ीत नेतीरीन आकाट एर चेन्डो आरू सोमून्द तो जियोम मेन्डान जाम्मा बानील चाञ्ञोव।

4 आनातले तिसेर सरग दूत एके तान्न बेटकी तोन पेरेडूल आरू बीजेल तो नीर पेतान कान चाप्पेड आरू आव नेतीर उलटोव। 5 तेबे आन आरो सरग दूतीन काबजे ती नीर मेन्डू ओड,

“ए नाती केचूर चिलायोतीने! ईन देरमी आय। ईन एबे मेन्डात, मुन्नी बेले मेट्टोत।

ईन चेत्ते नियाव चिड़ाक किली ई आबोड़ूलीन एन्दरोत।

6 एटे एनोड ओर मापोरबू तानूंग एलगाक मेन्डानेरीन

आरू मापोरबून कान तीग काबेर वेन्नी किली लोगीन पोक चियरान गुरूकूलीन नेतीर ओटीक मेट्टेर।

आरू ईन ओरीन नेतीर उनतीकतोत।

ओर आटनीत डेन्ड बेटूरान बातेरतेरी आय”

एन्डानोन वेट्टेन। 7 आनातले मारी आन दूप नेडीकतान पाड तीग, “ओ ए सोब ले लाव तो पोरबू मापोरबू! ईन नियाव चिड़ाकतानो चेत्ते तो आरू देरोम तो आय” एनी जवाब चियरानोन वेट्टेन।

8 आनातले चोंवता सरग दूत तान्न बेटकी तोन पोकाल ती चाप्पेड आरू आदूग किच्चीन आकाट तो केर ती नेन्डी टेडीक किली मांजेन वेटीकतान पान्न चिञ्ञेड। 9 आरू मांजा निक्के नेन्डीन चेत्तूग आबोड़ एञ्ञेर आरू ओर गेटनेल वेरीकतान मापोरबून पिदीरीन निन्दरेर; एरोड मेन्नीन उजराक किली ओनीन इजीत तो मान चियू मेन्न चाजेरा।

10 आनातले पाँचवां सरग दूत तान्न बेटकी तोन आ जियादीन गाद्दी ती चाप्पेड आरू आ जियादीन देचे ती चीकोड कुट चेन्डो। आरू लोग डेन्डूल चेत्तूग ताम्म नेवान्डूलीन काच्चू मुरीयाकतेर। 11 आरू तामूंग एरी मेन्डान नोयकूडूल आरू पोवेल चेत्तूग सरग तो मापोरबून निन्दरेर; एरोड ताम चाजूरान आबूच कामूलीन चाजूरान तीग मेन्नीन उजराकपेरा।

12 आनातले चटवां सरग दूत तान्न बेटकी तोन परात पिदीर तो बेड़तो पेरेड ती चाप्पेड आरू आ पेरेड तो नीर, पोकाल पेतानेल तो कोसकूलूग पाव एरको एनी वेट चेन्डो। 13 आनातले आन आ मायोन्ड बाम्ब, आ जियाद, आरू आ मापोरबून कान तीग काबेर वेन्नी किली लोगीन पोक चियरान एनी टेगरान गुरून चोन्ड तीग मून्डू बेन्डेल आकाट तो बूत डुमेल पेतानोन चूड़ेन। 14 आ बूत डुमेल पोरलेत काम तो चिनेल टोटीकतू आरू आव गुलाय मोंजीपूर तो कोसकूलीन सोब ले लाव तो मापोरबून आ बेड़तो दिने ती लेड़ेय चाजू उड़चीक चेन्डानोव आय।

15 “इद चूड़ आन डोंगाल किटके मेन्नी वेर्रान आकाट वेरमेन। एड लेक ती मेन्नी आपला गान्डेन नूड़ी किली डुमड़ा मेनाका, लोग ओनीन डुमड़ा चूड़ाका मेनोड ओनूग आसतीर टोन्डूरा” एनी पोरबू ईसू पोक्कूमेड।

16 आनातले आव ओरीन इबरानी पाटे ती अरमगीदोन एन्डान पाड ती उड़चीकतोव।

17 आनातले सातवां सरग दूत तान्न बेटकी तोन वाल्ली ती चाप्पेड, आरू सरग तो गुडीत गाद्दी तीग, “एबे पूरा पोलोतो” एन्डान बेड़तो पोल्ला वेञ्ञो। 18 आनातले गो, बादोर ती बिजली मेडूरू; वाञी गुडरूरू; उरूम पुयील उरकूरूव आरू नेन्दील निक्के मेलूरू। मांजा मोंजीपूर ती उपजूरान वादेक तीग एबेत आर्रे, ईटे नेन्दील निक्के मेलूरानो एतोडी एराका मेन्डू। 19 आरू आवीन तीग आ मुकीयाट गेड़ा बाबूल मून्डू गोन्देल एर चेन्डो आरू देचेल-देचेल तो गेड़ेल उरकोव। आ मुकीयाट गेड़ेत लोगीन पापदेरोमूलीन मापोरबू चुरता चाजी किली चिपड़ी ती कोप्पीक मेन्डान मेलीन गाद चेंगे उनतीकतान आकाट तान्न जाम्मा रिचीन इड़कीकतेड। 20 आरू नेन्दील मेलूरान तीग जाम्मा डिपकेल आपला पाडकूल तीग गूच चेन्डोव, आरू कोप्पेल आट एटे एञ्ञोव एनी पाता चेलोया। 21 आरू बादोर तीग इरडू कोड़ पाँच किलो आत्ती बोजेत, एदीर केलकूल उरकोव। ई एदीर केलकूल उरकूरान गेटनेल निक्के गेरे तो मेन्डू। एरोड बेले आ गेटनेलीन चेत्तूग, लोग मेन्नीन उजराकपाका मापोरबून निन्दरेर।