पार 17

दोस पाडरान मुकीयाट आयाल

1 आनातले आ सात गोटा बेटकील पात्ती मेन्डान, सात गोटा सरग दूतकूल कान तीग ओकूर वेरी किली आनीन, “इट वेर, आन इनीन, निक्के पोड़तान कुबे नीर ती उन्डतीक मेन्डान मुकीयाट दारीयाट आयालीन आकाट तो, बाबूल गेड़ेन नियाव चिड़ाकतान इसाबूलीन टोटीकतान। 2 आदीनोड मोंजीपूर तो कोसकूल दोस पाट्टेर नार। आरू मोंजीपूर ती मेन्डानेर, मेल उन्नी चोरनूरानेरीन आकाट आदीन दारीयाट कामूल तीग दोस पाट्टेर नार” एट्टेड।

3 आनातले आन मापोरबून जियोम तो ताकोत बेटूरानूग, सरग दूत आनीन चिड़ा बाट ती उञ्ञेड। आन आना, ओक नेतरो रेंग तो जियादीन कान ओक आयाल उन्डी मेन्डानोन चूड़ेन। आ जियादीन कान मापोरबून निन्दरूरान पिदीरूल कोप्पारे लिकूरान मेन्डूव; आरू आदूग सात गोटा तेलकूल आरू देस गोटा कोडूल मेन्डूव। 4 आ आयाल काकान्ड रेंग तो आरू नेतरो रेंग तो गान्डा नूड़ी मेन्डू। आरू आ गान्डा सोन आरू निक्के मोल्लेत मनी पिटकेलोड आरू मोती पिटकेलोड कोतानो मेन्डू। आरू आदीन केय्य ती, मेल तीग कोप्पी मेन्डान ओक सोन तो बेटकी मेन्डू। आ मेल एके आदीन गिन-गिनाट आरू चूत पाटतीकतान दारीयाट कामूल तो चिना आय। 5 आदीन कापार ती बेड़तो बाबूल, दारीयाट आयचीलीन ईय्या आरू मोंजीपूर ती गिन-गिनाट बानीलीन उपजाकतान ईय्या एन्डान पाकीकतान इसाब तो पिदीर लिकूरानो मेन्डू। 6 आन आ आयाल, मापोरबू तानूंग एलगाक मेन्डान आरू ईसूग बिसवात चाजू एर्रान बातेरतेर मेन्डान चेत्तूग आनकीक एर्रानेरीन नेतीरीन उन्नी चोरनी मेन्डानोन चूड़ेन।

आरू आन, आ आयालीन चूड़ी किली निक्के काबा एर चेन्डेन। 7 एरोड आ सरग दूत एके आनीन, “ईन नांग काबा एरमोत? आन ई आयालीन आरू इद चोक्कोतोना आ सात गोटा तेलकूल आरू देस गोटा कोडूल मेन्डान जियादीन बीतेर तो पाकीक मेन्डान इसाबीन इनीन पोक चियरान। 8 ईन चूड़ोत जे? आ जियाद मुन्नी गो मेन्डू, एरोड एपोर चिल्ला; एरोड आद पातालपूर तीग पेची किली मारी वेर्रा; आतोड आदीन मापोरबू नाचाकताड। आरू जुग-जुग तो जियोम बेटूरान लोगीन पिदीरूल लिकी मेन्डान ओक कागेत मेन्डा। आना मोंजीपूर उपजूरान वादेक ले पिदीरूल लिका चिलायेर, मुन्नी मेन्डू आरू एपोर चिल्ला आरू मारी वेर्रा जे? आ जियादीन चूड़ी किली काबा एर्रार।

9 इदीन रेच्चा गियान ती चुरता चाजू लेक चाजू लागूरा: सात गोटा तेलकूल, आ आयाल उन्डी मेन्डान सात गोटा कोप्पेलीन टोटीकतान चिनेल आय। 10 आरू आव सात गोटा कोसकूलीन टोटीकतान चिनेल बेले आय। ओर कान तीग चेवीर कोसकूल गो चाञ्ञेर नार आरू ओकूर एबे मेन्डाड। मारी ओकूर एबले बेले वेराडी। एरोड ओड वेरोड डेन्डीक जियोम मेन्डाड। 11 आरू मुन्नी मेन्डू, आरू एपोर चिल्ला, आ जियाद कुदे आटवां कोस आय। आरू आद आ सात गोटा कोसकूल चेंगे तो आय आरू आदीन मापोरबू नाचाकताड।

12 ईन चूड़ोत जे? आ देस गोटा कोडूल, देस जान कोसकूल आय। ओर एबलेतार्रे आपला राजूलीन बेटारी, एरोड ओर आ जियादीन चेंगे ओक गेन्टा आत्ती पान्न चेलाकतान कोसकूल पोदीन बेटूरार। 13 ऊर जाम्मा ओकती चोर ती मेन्डानेर आय आरू ओर ताम्म ताकोतीन आरू पान्नीन आ जियादूग चियरार। 14 आरू ओर मेन्डा पापीनोड लेड़रार। एरोड मेन्डा पाप, पोरबूकूलीन पोरबू आरू कोसकूलीन कोस मेन्डानूग, ओरीन जीतूराड। आरू ओन चेंगे, तान कूयी किली आची मेन्डान तानीन बिसवात चाजूरान लोग मेन्डार” एट्टेड।

15 आनातले मारी आ सरग दूत आनीन, “ईन आ दारीयाट आयाल उन्डी मेन्डान कुबे नीरीन चूड़ोत जे? आ नीर गो जातूल-जातूल तो आरू जोपूल-जोपूल तो आरू देचेल-देचेल तो आरू पाटेल-पाटेल तो लोग आय। 16 आरू ईन चूड़ोत जे? आ देस गोटा कोडूल देस गोटा कोसकूलीन चिना आय। ओर आरू आ जियाद, आ दारीयाट आयालीन आकाट तो गेड़ेनोड कुचेर एर्रार आरू आदीन मेलाक किली डुमड़ा चाजूरार आरू आदीन चेप्पूलीन तिन्नी किली आदीन किच कुड़ाकतार। 17 एटे एनोड मापोरबू ओर मेन्न ती, तान्न उवाटीन पूरा चाजूरान बिचार उपजाकतेड नाड। आदूग ओर मापोरबून पोद्दूल पूरारे, ओकती चोर एरी, आपला-आपला देचेल चेलाकतान पान्नीन जियादूग चियरार। 18 आरू ईन चूड़ोत जे? आ आयाल मोंजीपूर तो कोसकूलीन आंगरी मेन्डान मुकीयाट गेड़ा बाबूल आय” एट्टेड।