पार 15

सात गोटा गेटनेल

1 आनातले मारी आन सरग ती आवूर ओक बेड़तो आरू काबा एरीकतान चिनेन चूड़ेन। आद नाताय एनोड, चेरा चेरीत सात गोटा गेटनेलीन एन्देर्रान, सात गोटा सरग दूतकूल आय। ओरोव पोलोड मापोरबून निक्के रिच एर्रानो पोलूरा।

2 तेबे आन किच मिसूरान काँचीन आकाट तो ओक सोमून्दीन चूड़ेन। आरू आ जियादीन, आदीन मुरीतीन आरू आदीन पिदीर तो लोम्बोरीन नातेक, चापाक इडाका आदीन आराक मेन्डानेर, आ काँच तो सोमून्द लेग्गाट मापोरबून कान तो चारांगीलीन पात्ती किली निलतानोन बेले चूड़ेन। 3 आरू ओर पोरबून कामीयाल मूसाल आरू मेन्डा पापीन पाटेलीन ईटे पाडूरीर:

“ए सोब ले लाव तो पोरबू मापोरबू!

इन कामूल निक्के बेड़कूल आरू काबा एरीकतानोव आय।

ए जातूलतेरीन कोसीने!

इन पावूल देरोमतोव आरू चेत्तेतोव आय।”

4 “ए पोरबू! जाम्मा ई इनूंग नारचूरार,

आरू जाम्मा ई इन पिदीरीन चाराकतार

एटे एनोड ईन ओकूरी नाती केचूर चिलायोत आय।

जाम्मा देचेल-देचेलतेर वेरी किली इन मुन्देल मोड़कूरार

एटे एनोड ईन चेत्त तीग लोगीन नियाव चाजूरानो देका पाट्टो ना” एन्डीर।

5 इदीन ले पिटतेल आन नेंजराक किली सरग तो गुडीन, एटे एनोड जुमान चिड़ाक मेन्डान इसाब तो सुन्दूप इड्डी मेन्डान गुड़सा चानची मेन्डानोन, 6 आरू आ सात गोटा गेटनेलीन एन्देर्रान सात गोटा सरग दूतकूल निक्के जेग जेगाट विल गान्डेल नूड़ी किली, एदरोम ती सोन तो पोटीन काट्टी किली, गुडी तीग पेतानोन चूड़ेन। 7 तेबे नालू जियोम तो बानील तीग ओकूत, आ सात गोटा सरग दूतकूलूग, जुग जुगूग जियोम मेन्डान मापोरबून निक्के रिच तीग कोप्पी मेन्डान, सोन तो सात गोटा बेटकीलीन चिञ्ञो। 8 आरू मापोरबून चाबाव तीग मेडूरान रेग आरू ताकोतीन चेत्तूग गुडी गूञूकूड़ तीग कोप चेन्डो। आरू आ सात गोटा सरग दूतकूल एन्देर्रान सात गोटा गेटनेल पोलार्रे एडी गुडी ती तान्नू ओड़ेर।