मेन्डा पाप आरू ओन लोग
14
1 मारी आन नेंजराकतेन आरू इद चूड़!
आ मेन्डा पाप सियोन कोप्पे तीa निलतेड नाड आरू ओन चेंगे एक लाक इरडू कोड़ नालू आजार लोग मेन्डीर आरू ओर कापार ती ओन आरू ओन बुवेन पिदीरूल लिकूरानो मेन्डूव।
2 आरू सरग तीग आनूंग निक्के पोड़तान नीरीन आकाट तो आरू वाञी निक्के गुडरूरान आकाट तो पोल्ला वेनूंग एञ्ञो।
आरू आन वेट्टेन जे?
आ पोल्ला चारांगील कीचरान आकाट तो पोल्ला आय।
3 ओर गाद्दीत मुन्देल आरू जियोम तो बानील मुन्देल आरू सियानकूल मुन्देल ओक पुन्न पाटा पाडूरीर।
मोंजीपूर तीग कुरूस ती पोड़तान नेतीरोड चोड़ाक मेन्डान,
आ एक लाक इरडू कोड़ नालू आजार लोगीन चायी एडी आ पाटेन मेरीयू ओड़ा मेन्डीर।
4 ऊर मारी मापोरबून चायी आवूर नातेनी एत्तोडी मोड़का कान्डूग,
आयचीलोड दोस पाडाका वाटा मेन्डानेर आकाट बोकतीत इसाब ती दोस पाडायेर मेन्डीर।
ऊरी आय मेन्डा पाप आरे चेनोड बेले ओन पोटतेल चेन्डानेर;
कोयरान बानील तीग पोईलात कामेय मापोरबूनो आय।
आटनी ऊरी गो,
मापोरबू आरू मेन्डा पापीन लोग एरू,
मांजाकूल कान तीग,
कुरूस ती पोड़तान नेतीरोड चोड़ाक एर्रानेर आय।
5 ओर एतोडी पोन्ददी पाटा पोकायेर आरू केचूर चिलायेर आय।
मूवीर सरग दूतकूलीन काबेरूल
6 मारी आन ओकूर सरग दूत निक्के डेंग ती वेल्लानोन चूड़ेन।
ओन लेग्गाट मोंजीपूर ती मेन्डान देचेल-देचेलतेरीन,
तेरानूल तेरानूलतेरीन,
पाटेल पाटेलतेरीन,
आरू जातूल जातूलतेरीन वेनपीक एतोडी बादला रेच्चाट काबेर मेन्डू।
7 ओड निक्के जोड़ ती,
“मापोरबूग नारचूर आरू ओनूग इजीत तो मान चियूर।
एटे एनोड ओड नियाव चाजूरान बेरा एदेरनो ना;
आरू सरग,
मोंजीपूर,
सोमून्द आरू नीर पेतान बिजेन गेड़रानेडीन मोड़कूर” एन्डीड।
8 ओन ले पिटतेल मारी ओकूर सरग दूत,
“उरकोतो!
मुकीयाट बाबूल गेड़ा उरकोतो!
आनातेर,
दारीयाट आयाल,
चोरनारे मेल उनतीकतान आकाट,
जाम्मा देचेल-देचेल तो लोगीन मूरती पूजेल तीग दोस पाटतीकतेर।
आदूग मापोरबू निक्के रिच ती डेन्ड चिञ्ञेड” एनी पोक-पोकी वेञ्ञेड।
9 ओन ले पिटतेल मारी ओक तिसेर सरग दूत निक्के जोड़ ती,
“एड एरको,
आ जियाद आरू आदीन मुरीतीन मानोड आरू आपला कापार ती चिलाड केय्य ती आदीन चापा चापाक इडोड,
10 ओड बेले मापोरबून रिच तो बेटकी ती चाप्पी मेन्डान पुली मेलीन आकाट तो,
ओन निक्के रिचीन बुकतूराडb आरू नाती केचूर चिला सरग दूतकूल आरू मेन्डा पापीन मुन्देल किच आरू नीरूरान गन्दकीन तीग आबोड़ एर्राड।
11 आरू ओर आबोड़ एर्रान कान तो गूञूकूड़ जुग जुगूग चुलची-चुलची मेन्डा।
जियादीन आरू आदीन मुरीतीन मोड़कूरानेर आरू आदीन पिदीर तो चापेन चापाक इडरानेर,
चित्ता विलोमी आरू पाकटा पोकाली,
पाबू ओड़ाका आबोड़ बेटूरार” एट्टेड।
12 मापोरबून तियारनी पाटेन पातीयाक किली,
ईसूग बिसवात चाजू एर्रान बातेरतेर मेन्डान,
मापोरबू तानूंग एलगाक मेन्डानेर दिरजे ती सामालची मेनूंग लेक चाजू लागूरा।
13 मारी आन सरग तीग,
“इदीन लिक:
एपोर ले,
एड पोरबून बिसवात चाजी किली चाय्यरार,
ओर आसतीरीन बेटूरार” एनी पोकरान पोल्लेन वेट्टेन।
आदूग,
“ओ,
इद चेत्ते आय!
ओर चाजूरान रेच्चाट कामूलीन,
मापोरबू तान्न चुरते ती पात्ती मेन्डानूग,
ओर ताम मोसागेत चाजूरान तीग पाबी किली आसतीरीन बेटूरार” एनी मापोरबून जियोम पोक्कूमेड।
नियाव चाजूरान दिना एदेरनो ना
14 आनातले आन नेंजराकतेन आरू इद चूड़!
ओक जेग-जेगाट बादोर आरू आ बादोर ती मांजेन चिन्डीन आकाटतेड ओकूर आंगरू उन्डेड नाड।
ओन तेल्ल ती सोन तो तुरेय आरू केय्य ती ओक वान्ड तो चेटालc मेन्डू।
15 मारी ओक सरग दूत सरग ती मेन्डान गुडी तीग पेची किली,
आ बादोर ती उन्डरानेडीन निक्के जोड़ ती,
“नियाव चाजूरान दिना एदेरनो ना।
इन चेटालोड कोय्य,
कोयरान बेरा एञ्ञो ना।
एटे एनोड मोंजीपूर तो लोगीन पापदेरोम कुबे एञ्ञो ना” एन्डीड।
16 आदूग बादोर ती उन्डरानेड मोंजीपूर तो ओक कूट तीग ओक कूट आर्रे मेन्डान लोगीन चेटालोड कोयरान आकाट नियाव चाजेड।
17 मारी ओक सरग दूत सरग ती मेन्डान गुडी तीग पेतेड आरू ओन केय्य ती बेले वान्ड तो चेटाल मेन्डू।
18 मारी ओक सरग दूत,
दूप नेडीकतान पाड तीग वेञ्ञेड।
दूप नेडीकतान पाड तो किच जोमटाकतान काम ओनोती आय।
आरू ओड केय्य ती वान्ड तो चेटाल पात्ती मेन्डानेडीन जोड़ ती,
“मोंजीपूर तो आंगूर पालकूल पाड़ञूरानूग,
इन वान्ड तो चेटालोड आंगूर जोप्पेलीन कोय्य काड” एट्टेड।
19 तेबे आ सरग दूत मोंजीपूर तो ओक कूट तीग ओक कूट आर्रे तान्न चेटालोड मोंजीपूर तो आंगूर पालकूलीन कोय्यी किली,
आंगूर रेस पीदूरान बेड़तो कोदरे ती इट्टेड।
आ कोदरा मापोरबू निक्के रिच ती डेन्ड चियरान इसाब तो चिना आय।
20 आरू मापोरबून माना लोग गेड़ेग ले वाल,
आंगूर रेस पीदूरान कोदरे ती,
आंगूर पालकूलीन रेमदाकतान आकाट रेमदाक एर्रार।
आरू रेस पीदूरान कोदरे ती गुर्रोचीलीन कासरा पातीकतान आर्रे एदूरान आत्ती,
गिड़ीये ती नेतीर पेची किली तीन सोव किलो मीटेर आर्रे पोड़तो।