पार 13

पोईलात जियाद

1 आनातले आन सोमून्द तीग पेत्तेर्रान ओक जियादीन चूड़ेन। आदूग देस गोटा कोडूल आरू सात गोटा तेलकूल मेन्डूव। आदीन कोडूल ती देस गोटा तुरेयूल आरू आदीन तेलकूल ती मापोरबून निन्दरूरान पिदीरूल लिकूरानोव मेन्डूव। 2 आन चूड़ेन जे? आ पोईलात जियाद बागनीन आकाट तो मेन्डू; आरू आदीन केलूल इलीन केलूल आकाट तोव, आरू चोन्ड डूवीन चोन्डीन आकाट तो मेन्डू। आ जियादूग मायोन्ड बाम्ब तान्न लावीन आरू कोसीन आकाट आंगरूरान बेड़तो पान्नीन चिय काट्टो। 3 आन आदीन तेलकूल तीग ओक तेल्ल ती जियोमीन तिन्दान बातेर तो गावेन चूड़ेन। एरोड आदीन जियोमीन तिन्दान बातेर तो गावा उजरोतो। आरू जाम्मा मोंजीपूर तो लोग काबा एरी किली आ जियादीन चेलालेर एरी आदीन पोटतेल चेन्डेर। 4 आरू आ मायोन्ड बाम्ब तान्न पान्नीन आ जियादूग चियी मेन्डानूग, लोग आदीन मोड़केर आरू आ जियादीन “ई जियादीन आकाट एडी चिल्लाड आरू आदीनोड एडी लेड़ू ओड़ार” एनी पोक्की किली मोड़केर।

5 आ जियादूग निक्के डेंग पाटा ऊबू आरू मापोरबून निन्दरूरान पोद्दूल पोक्कू ओक चोन्ड टोन्डोतो। आरू आदूग इरडू कोड़ इरडू नेलींगूल आर्रे मोंजीपूरीन आंगरूरान पान्न बेले टोन्डोतो। 6 आद तान्न चोन्ड चानची किली मापोरबून निन्दरोतो आरू ओन पिदीरीन आरू ओड डेरा पातरान पाडीन आरू सरग ती मेन्डानेरीन नेडीकतो। 7 आरू आदूग मापोरबू तानूंग एलगाक मेन्डान लोगोड लेड़रान आरू ओरीन आराकतान पान्न टोन्डोतो। आरू आदूग तेरानूल तेरानूलतेरीन आरू जातूल जातूलतेरीन आरू पाटेल पाटेलतेरीन आरू देचेल-देचेलतेरीन पोडे पान्न टोन्डोतो। 8 आरू मोंजीपूर ती मेन्डानेर जाम्मा, एटे एनोड मोंजीपूर उपजाका मेनेक ले कुड्डू एर्रान मेन्डा पापीन जुग-जुग तो जियोम बेटूरान लोगीन पिदीरूल लिकी मेन्डान कागेत ती पिदीरूल लिका चिलायेर जाम्मा आ जियादीन मोड़कूरार।

9 एरूग केकोचील मेन्डाव ओर केकोचील ओनी वेनूर: 10 मापोरबू एरीन आवूर लोगीन काबजेतेर एरू नीतीकतेड नाड, ओर आवूर लोगीन काबजे ती एर्रारी आरू एरीन कान्डेनोड आनकीक एर्रार एनी नीतीकतेड नाड, ओर कान्डेनोड आनकीक एर्रारी। आदूग मापोरबू तानूंग एलगाक मेन्डानेर दिरजे ती सामालची किली, मापोरबू बिसवात चाजूरान बातेरतेर मेनूंग लेक चाजू लागूरा।

दुसेर जियाद

11 आनातले आन मारी ओक जियादीन मोंजीपूर तीग पेतानोन चूड़ेन। आदूग मेन्डा पापीन कोडूल आकाट इरडू कोडूल मेन्डूव आरू आद एके मायोन्ड बाम्बीन आकाट ऊबूरू। 12 आद, आ मुन्नीत जियादूग टोन्डूरान जाम्मा पान्नूल तीग आंगरूरू आरू मोंजीपूर आरू आना मेन्डानेरीन, जियोमीन तिन्दान बातेर तो गावा उजरी मेन्डू जे? आ मुन्नीत जियादीन मोड़कू इट्टो। 13 आद बानेलेक-बानेलेक पोरलेत काम तो चिनेल टोटीकतू आरू मांजाकूल चूड़ेक-चूड़ेक सरग तीग मोंजीपूर ती किच उरकीकतू। 14 आद, आ मुन्नीत जियादीन मुन्देल, आ पोरलेत काम तो चिनेलीन टोटीक किली, मोंजीपूर ती मेन्डानेरीन बूलकाकतू। आरू ओरीन आरो जियादूग कान्डा पोरचूरानूग गावा एरी चायपीक मेन्डू आ जियादीन मुरीत चाजू तियारतो। 15 आरू आ जियादीन मुरीत ऊबोको आरू तानीन मोड़कायेरीन चाय्यीकपोको एनी, आ मुरीतूग जियोम तो नेञाल तापरान पान्न, आ पिटतेल तो जियादूग टोन्डोतो। 16 आरू आ पिटतेल तो जियाद, पिटीलेकतेर आरू बेड़कूल, सावकार आरू गेरीब, नाती बान्देन ती चिलायेर आरू काबजे ती मेन्डानेर जाम्मेन वेला केय्य ती चिलाड कापार ती चापा लागाक इट्टो। 17 आ चापा चापाक इडरानेरीन चिलाड आ जियादीन पिदीर चिलाड आदीन पिदीर तो लोम्बोरीन चापाक इडरानेरीन चायी, आवूर एडी वीड़ू आरू पात्तू ओड़ा मेनकेर एनी आटनी चाजूरू।

18 बुदी तीग इदीन लेक चाजू लागूरा। एड चोमेनतेड मेन्डाड ओड ई जियादीन लोम्बोरीन जोड़ेकेड। एटे एनोड आद मांजेन लोम्बोर आय आरू आदीन लोम्बोर 666 आय।