पार 12

आयाल आरू मायोन्ड

1 मारी सरग ती ईटो ओक बेड़तो चिना देका पाट्टो: ओक आयाल पोकालीन गान्डेन आकाट नूड़ी मेन्डू आरू नेलींग एके आदीन केलूल किड़ी मेन्डू आरू आदीन तेल्ल ती बारा गोटा चुक्केल तीग चिंगारची मेन्डान तुरेय मेन्डू। 2 आद मेन ती तेबोतो आरू पाईंग एर्रान बेरा एञ्ञो। आरू आद पाईंग एर्रान नोयकूडूग आबोड़ एर्रू। 3 आरू मारी ओक चिना सरग ती देका पाट्टो। ओ! ओ! आद ओक बेड़तो नेतरो नार देलीत मायोन्ड बाम्ब आय। आदूग सात गोटा तेलकूल आरू देस गोटा कोडूल मेन्डूव, आरू आदीन तेलकूल ती सात गोटा तुरेयूल मेन्डूव। 4 आदीन जाटी बादोर तो मून्डू बागूल तो ओक बाग चुक्केलीन टान्डी किली मोंजीपूर ती तीनची काट्टो। आ मायोन्ड बाम्ब, पाईंग एरू उन्डरान आयालीन मुन्देल आ आयाल पाईंग एरूके आदीन पापीन तारू निलतो। 5 आद ओक चिन्ड पापीन जेनोम चिञ्ञो। ओड लोवेत बाड़येन पात्ती किली किन्डीक बेले लोगीन पोडे जियोम नोयपीकपाका, केरमा गोटोक एराका जाम्मा देचेल-देचेल तो लोगीन आंगरूराड एनी नीतीकतानो मेन्डू। आरू आदीन पाप डेन्डीक तीग मापोरबून लेग्गे ओन गाद्दी ती आंगरू एतीक एञ्ञेड। 6 आरू आ आयाल चिड़ा बाटतेल एक आजार दुय सोव मून्डू कोड़ दिनेल आर्रे पोरोको एनी मापोरबू आदूग आन्नी पाड तायार चाजी मेन्डीड; आद आट तूलोतो।

7 मारी सरग ती लेड़ेय एञ्ञो। मिकाईल एन्डान मापोरबून मुकीयाल आरू बेरकेच तो सरग दूत आरू ओन कामीयालेर आकाट तो आवूर दूतकूल मायोन्ड बाम्बीनोड लेड़ू पेतेर। मायोन्ड आरू आदीन बूत डुमेल ओरोड लेड़ोव। 8 एरोड आव जीतू ओड़ोव। आदूग सरग ती आवूग मारी पाड चिल्ला एन्डान बातेर एञ्ञो। 9 तेबे आ बेड़तो मायोन्ड बाम्ब आरू आदीन दूतकूल आदीन चेंगे मोंजीपूर ती उरकीक एञ्ञोव। आद्दी जाम्मा मोंजीपूर तो लोगीन बूलकाकतान मुन्नीत ले मेन्डान बूत आरू चेयतान एन्डानो आय। 10 मारी आन सरग तीग ईटे पोकरान जोड़ तो पोल्लेन वेट्टेन: “एपोर आम्म मापोरबू लोगीन बाचाकतान इसाब, ओन लाव आरू ओड आंगरूरानो आरू ओन पान्न नातेक एञ्ञो ना। एटे एनोड आम्म बिसवासी लोगीन चित्ता विलोमी पाकटा पोकाली मापोरबून मुन्देल बोदी चियरान बाम्बीन, मापोरबू किड़ी तीनची काट्टेड। 11 आरू बिसवासी लोग मेन्डा पापीन नेतीर आरू ताम्म गोवाई पाटेलीन चेत्तूग आदीन जीतेर। आरू ओर ताम्म जियोमीन बेले चोग चाजेरा आरू चाय्यू बेले नारचेरा। 12 आदूगी ए सरगीने! आरू आना डेरा मेन्डानोरे! वेड़का एरूर। ए मोंजीपूरीने! आरू सोमून्दीने! ओ! ओ! इमूंग बेड़तो गेरा एर्रा। एटे एनोड चेयतान तानूंग, तान्न कामीन पूराक कुबे कोम्बेर चिल्ला एनी पुन्नी किली निक्के रिच्चोड इम लेग्गाट इड़ोतोना” एट्टो।

13 मायोन्ड बाम्ब तानीन मोंजीपूर ती तीनची एर्रानोन चूड़रानूग आ चिन्डीन जेनोम चियरान आयालीन कानची उञ्ञो। 14 एरोड आ आयाल मायोन्ड बाम्बीन लेग्गाट तीग वेली किली मुकपोकाल आरू चोय गोटा नेलींगूल आर्रे चिड़ा बाटतेल पोरोको एनी बेड़तो गाद्देन इरडू वेरबूलीन बेटी मेन्डू। 15 आरू मायोन्ड बाम्ब एके आ आयालीन पोटतेली तान्न चोन्ड तीग पेरेडीन आकाट तो नीरीन पोड़पीक किली, नीर आयालीन ओपीकपोको एनी वेरेड पुचोतो। 16 एरोड नेन्दील आ आयालीन चेकी एरू पिल्लोतो आरू मायोन्ड बाम्ब आ आयालीन ओपीकपोको एनी चोन्ड तीग पोड़पीक मेन्डान पेरेड तो नीरीन चोवकोतो। 17 तेबे मायोन्ड बाम्ब आ आयालीन पोडे निक्के रिच एरी किली, आदीन बाची मेन्डान तेरानतेरोड लेड़ू चेन्डो। आदीन तेरानतेर मारी मापोरबून नियोमूलीन मानी किली ईसू मेरचीक मेन्डान चेत्त पाटेलीन पातीयाक मेन्डानेर आय। 18 आरू आद सोमून्द रेट तो मान्न ती चेनी निलची काट्टो।