मेन्नोत मेन्डान केल्ल आरू आचूरान लोग
2
1 आदूगी जाम्मा एड़जाट कामूलीन,
दोका चियरानोन,
आरू पोबाक एर्रानोन,
इरका कुचेरीन आरू लोगीन नेडीकतानोन चाय काडूर।
2-3 ईम पोरबू रेच्चाल आय एन्डान तिरोमीन चाकोर नार।
आदूग मापोरबू इमीन बाचाकतान पूरा इसाबूल ती ईम चान्दारे चेनूंग,
पुन्न जेनमूरान पापकूल पेलूग केच-केच एर्रान आकाट जियोम चियरान नाती मिसड़ा चिला चेत्त पाटेग केच-केच एरूर।
4 ईसू मेन्नोत मेन्डान केल्लीन आकाटतेड आय।
मोंजीपूरतेर ओनीन बाकनेर;
एरोड मापोरबू ओनीन आची किली मोल्लेतेड नीतीकतेड।
5 ईम ओन लेग्गाट वेर्रानूग,
ईम बेले कुदे मापोरबून जियोम डेरा पातरान गुडी ती रेची मेन्डान मेन्नोव मेन्डान केलकूलa आकाटतोर आरू आना ईसू मसीयाल तीग मापोरबू मेन्न चाजूरान आकाट तो बोकतीत जेतराb चोत्तीक मापोरबू तानूंग एलगाक मेन्डान पेलाचकूल एर चेनमोर।
6 एटे एनोड मापोरबून कागेत ती ईटे लिका मेन्डा:
“चूड़ूर,
आन (सियोन) एरूसेलेम ती ओक केल्लीन इड्डूमेन,
आद निक्के मोल्ले तो आरू आचूरान टोक तो आञ केल्ल आय
ओनीन बिसवात चाजूरानेड एड एरको
एतोडी एडी ओनीन लाज पाटतीकपाडा।”c
7 एपोर बिसवात चाजूरान इमूंग गो ओड निक्के मोल्लेतेड आय।
एरोड बिसवात चाजा लोगूग एके ओड
“मिसतीरीकूल काम चियाया एनी बाकनेर,
एरोड आद्दी टोक तो आञ केल्ल एर चेन्डान केल्ल”d
आरू
8 “लोगीन उट तिरीकतान केल्ल
आरू लोगीन उरकीकतान चाटरेन”e
आकाट एञ्ञेड।
एटे एनोड ओर मापोरबून पोद्दीन माना कान्डूग उट तिरूमेर।
आरू ओरीन इदूगी आय एनी मापोरबू नीतीकतेड नाड।
9 एरोड,
चीकोड ती मेन्डान इमीन तान्न काबा एरीकतान विलीज ती कूयूरान मापोरबून निरबे रेच्चाट चेलनूकूड़ूलीन पारगाकपूर एनी आय,
ईम ओक आची मेन्डान लोग,
आरू कोस मापोरबूग सेवा चाजूरान पेलाचकूल आरू मापोरबू तानूंग एलगाक मेन्डान देचेतोर आरू मापोरबून कुटूमतोर मेन्डार।
10 “ईम गो मुन्नी नातेरी चिला मेन्डूर,
एरोड एपोर मापोरबून कुटूमतोर आय;
मापोरबू इमूंग जियोम नोयपीकपाका मेन्डीड,
एरोड एपोर जियोम नोयपीकतेड नाड।”f
11 ए आन्न लाडरालेरे!
ईम ई मोंजीपूर ती पोर देचेतोर आरू पाव ताकूरानेर आकाट मेन्नी इम बीतराम तो जियोमोड लेड़ेय चाजूरान मेन्न के लागेन तो बिचारूलीन चायूर एनी गुवारूकमेन।
12 ईसून बिसवात चाजा लोगीन मुन्देल,
इम चेलनूकूड़ूल रेच्चा मेनकोव।
तेबे इमीन कियालतेर आय एनी लोग बोदी चियोड बेले,
ओर इम रेच्चाट कामूलीन चूड़ी किली आवीन चेत्तूग आमीन मापोरबू बेट गाट एरू वेर्रान वादेक ओनीन चाराकपेकेर।
आदीकारीकूल पाटेलीन मानूरानो
13 पोरबून चेत्तूग मांजा नीतीक मेन्डान जाम्मा आदीकारीकूल पाटेलीन मानूर।
कोस जाम्मेन ले बेड़तेड आय आदूग ओन पाटेन मानूर।
14 एड़जाट काम चाजूरानेरीन डेन्ड चियू आरू रेच्चाट काम चाजूरानेरीन इनाम चियू,
कोस चोटतेर्रान राजपालकूल पाटेलीन बेले मानूर।
15 एटे एनोड ईम आपला रेच्चाट कामूल तीग बाकवाट लोगीन गियान चिला पाटेलीन आटकाकपूर एनी मापोरबूग उवाट मेन्डा।
16 आरू ईम एर काबजे ती नी चिला लोगीन आकाट पीयूर।
एरोड ईम एर काबजे ती नी चिला कान्डूग केचूर तो कामूल चाजी किली पाकीक एर्रा एनी चोमजाका मापोरबून कामीयालेर आकाट पीयूर।
17 जाम्मेनी इजीत चाजूर;
आपला बिसवासी लोगीनोड चोग ती मेनूर;
मापोरबूग नारचूर;
कोसीन इजीत चाजूर।
18 ए कामीयालेरे!
पूरा इजीत तीग आपला सावकारकूल काबजे ती मेनूर।
आमान रेच्चाल आरू चुचारूतेडीनोडी एरा,
एरोड एड़जालेर पाटेलीन बेले मानूर।
19 एटे एनोड एड बेले नाती मोतलेब चिलाका सादना दायना एरोड ताम मापोरबून नेंजेर ती मेन्डाम एनी चोमजी किली सामालपोड मापोरबू आदीन मेन्न चाजूराड।
20 एटे एनोड ईम पापदेरोम चाजी किली मार तिनोड आरू सामालपोड नातो पायदा आय आदूग?
एरोड रेच्चाट काम चाजूरान चेत्तूग डेन्ड एरी किली सामालपोड,
मापोरबून नेंजेर ती आद ओड मेन्न चाजूरान इसाब आय।
21 आरू इदूगी आय मापोरबू इमीन कूयेड नाड।
एटे एनोड मसीयाल बेले इम चेत्तूग आबोड़ एरी किली ईम बेले ओन आकाट आबोड़ीन सामालची किली चेल्लानो आय एनी पाव टोटीकतेड नाड।
22 ओड नाती पापदेरोम चाजेडा
आरू ओन चोन्ड तीग नाती दोका चियरान पाटा बेले पेपोया।g
23 ओड एके कावडूरान पालटा कावडेडा,
आरू डेन्ड एरेक एरीनी दामकाकपेडा,
एरोड तानीन चेत्त नियाव चिड़ाकतानेडीन केय्य ती ओपीक चियरीड।
24 आम पापदेरोमूल चाजूरानोन चायी किली देरोम तो कामूल चाजोकोम एनी ओड तानी आम्म पापदेरोमूलूग कुरूस पारे ती आपला मेन ती डेन्ड एञ्ञेड।
ओनूग एर्रान गावेल तीग ईम उजरोर नार।
25 एटे एनोड मुन्नी ईम बूलकूरान मेन्डेल आकाट मेन्डूर।
एरोड एपोर ईम एके गाडीडीन आकाटतेडीनेल आरू इम जियोमीन राका चाजूरान पोरबून मान्देत लोगीन मुकीयालीनेल मेन्न उजराक एञ्ञोर नार।