माईड आरू आयाल
3
1 पान्न चेलाकतानेर जाम्मेनी मानूरान आकाट ए आयचीले!
ईम बेले आपला-आपला माईलीन काबजे ती मेनूर।
2 तेबे ओर कान तीग एड बेले मापोरबून पाटेलीन पातीयाकपायेर मेनोड बेले,
ओड ईम पोकरानूग एरा,
एरोड आपला आयालीन चेलनूकूड़ूलीन चूड़ी किली मापोरबून पाटेलीन पातीयाकपेकेड।
एटे एनोड इजीत तो आरू केचूर चिला इम चेलनूकूड़ूल तीग ओर मापोरबून कान बिसवात चाजेकेर।
3 ईम चिंगारची एर्रानो आमान लोगीन टोटीकतान बाटतेल तो चिंगार एरा मेनको।
बेनील आन्डरानो,
सोन तो कान्दील नातेक तुन्दरानो,
आरू गान्डेल नूड़रानो,
ईव जाम्मा बाटतेल तो चिंगारूल आय।
4 एरोड इम मेन्न तो पाकी मेन्डान मांजा मुड़ा चुचारू ती आरू दिरजे ती मेन्डान एतोडी नाचा चिंगार तीग चिंगारची एरी मेनूर।
एटे एनोड मापोरबून नेंजेर ती इदीनो निक्के मोल्ला आय।
5 एटे एनोड मुन्नीत जुग ती बेले इटनी मापोरबून कान आचा चाजी मेन्डान मापोरबू तानूंग एलगाक मेन्डान आयचील आपला-आपला माईडूग ओपीक एरी किली तामीन चिंगारतूव।
6 एटे सारा इबराईमीन सावकार एनी कूयी किली ओन पाटेन पातरू,
आटनी ईम बेले रेच्चाट कामूल चाजी किली नाती नारपीकतान इसाबूलूग नारचाका मेनोड आदीन माचील एर्रार।
7 आटनी ए माईले!
ईम बेले आपला आयचीलीन रेच्चा चोमजी किली आवीन चेंगे पीयूर।
आरू इम चेंगे आव बेले इनाम टोन्डूरान जुग-जुग तो जियोमीन काबजे तोव एर्रानूग,
आवीन इम ले कोमजोरतोव आय एनी इजीत चाजूर,
तेब ईम बिन्ती जोड़रानोन नाती बेले आटकाया।
रेच्चाट चाजूरान चेत्तूग सताव
8 चेरा चेरी आन पोकरानो इद आय:
ईम जाम्मा ई ओकती चोर ती मेनूर;
केरमा गोटोक एरूर,
ओकूरीन ओकूर तोल्लेनकूल आकाट चोग चाजूर;
जियोम नोयपीकपूर;
सोजालेर मेनूर।
9 इमीन एड बेले कियाल चाजोड ईम उलटा कियाल चाजूमोर कावडूरान पालटा कावडूमोर एरोड उलटा आसतीर चियूर।
एटे एनोड ईम आसतीर तो काबजेतोर एरू आय मापोरबू इमीन कूयेड नाड।
10 एटे एनोड
“एड एरको रेच्चा पीयू मेन्न चाजी,
आपला जियोम ती आसतीर ती मेनूंग बावोड,
ओड तान्न नेवान्डीन कियाल तो पाटेल तीग,
आरू आपला चोन्डीन दोका चियरान पाटेल ऊबूरान तीग बाचाकपेकेड।
11 आरू ओड कियाल तो कामूलीन चायी किली रेच्चाट कामूलीन चाजेकेड;
आरू ओड मिलेन ती मेन्डानोन कानची किली आदीन उवाट ती नी मेनकेड।
12 एटे एनोड पोरबू देरमीकूलीन नेंजराक-नेंजराक मेन्डाड,
आरू ओड ओर बिन्तीन केकोचील ओनी वेनदाड।
एरोड पोरबू कियाल चाजूरानेरीन विरूद पोत गोरी मेन्डाड।”a
13 आरू एबे,
ईम रेच्चाट कामूल चाजू रेच्चा मेन्न लागाक मेनोड,
मारी एडी इमीन नोकसान एरीक ओड़ार।
14 आरू ईम एके देरोमीन चेत्तूग सताव बेटोड बेले,
ईम आसतीरीन बेटूरार।
एरोड लोग नारपीकपोड बेले नारचूमोर।
आरू बायबीताल मुरले एरमोर।
15 एरोड आपला मेन्न ती मसीयालीन नाती केचूर चिला पोरबू आय एनी मानी किली,
इम कान मेन्डान आचेन इसाब ती एड बेले इमीन जाच आडोड ओनूग जवाब चियू एतोड नांग तायार मेनूर।
16 आतोड सोजाल मेन्नी इजीत तीग ओनीन चोमजाकपूर आरू आपला बीतराम तो मेन्नीन गोवाई ती केचूर चिलायोर मेनूर।
तेबे ईसू मसीयालीन चेत्तूग इम रेच्चाट चेलनूकूड़ूलीन नेडीकतानेर लाज पाडेकेर।
17 एटे एनोड ईम कियाल तो कामूल चाजी डेन्ड बेटूरान ले ईम रेच्चाट कामूल चाजूरान चेत्तूग डेन्ड बेटूरानो आय एनी मापोरबून मेन्न मेन्डा एरोड आद रेच्चाट आय।
18 एटे एनोड,
आमीन मापोरबून लेग्गे एपीक मसीयाल देरमी मेन्नी बेले ओदेरमीकूलीन पापदेरोमीन चेत्तूग ओपोट डेन्ड एञ्ञेड।
ओनीन मेन तो इसाब ती गो आनकीकतेर एरोड मापोरबून जियोमीन इसाब ती ओड जियोम पाटतीक एञ्ञेड।
19 आयची जियोम तीग ओड चाय्यरानेर जियोमूल केटची एरी मेन्डान कान चेनी आवीन मेरचीकतेड।
20 आ जियोमूल नूवाल जाजीन चाजेक मापोरबून पाटेन पाता मेन्डानेरीनोव आय।
आतोड मापोरबू दिरजा पात्ती,
नीर जाज चाजूरानो निबड़ारे कातीड।
एरोड आ जाज ती ओदेर,
एटे एनोड आमान आँट जानी तान्नी किली नीर तीग बाचाक एञ्ञेर।
21 आरू आयची नीर एपोर इमीन बाचाकतान बपतीसमेत चिनेन आकाट मेन्डा।
आद आमान मेनीन मुर्रीन नोडीकतान नियोम एरा,
एरोड ईसू मसीयाल चाय्यरान कान तीग जियोम पाटतीक एर्रानूग,
इम बीतराम तो मेन्नीन गोवाई ती बोदी चिलायेर मेनूंग मापोरबून गुवारतान पाटा आय।
22 एबे ईसू सरग ती चेनी किली मापोरबून वेला टिटाक इजीत तो पाड ती उन्डेड;
आरू सरग दूतकूल,
आरू बूत डुमेल आरू वेन्दीड बिटाचीलीन जाम्मा ताकोतूलीन ओन काबजे ती मापोरबू चिञ्ञेड नाड।