पतरस
लिकूरान पोईल चिट्टी
जुवारतानो
1
1 आन,
पोरबू ईसू मसीयाल नीतीकतान पतरसीन टिटाक ले,
पुन्तूस,
गलतीया,
कप्पदूकीया,
आसीया आरू बितूनीया पेरगेनूल ती बुरली एरी किली ई मोंजीपूर ती पोर देचेतेर आकाट मेन्डान मापोरबू आची मेन्डान लोगूग लिकूरान चिट्टी इद आय:
2 मापोरबू बुवा पिटतेल एर्रानोन मुन्नी की पुन्दान चेत्तूग तान्न जियोमीन कान तीग इमीन तानूंग एलगाक किली ईसू मसीयालीन पाटेन मानू आरू ओन नेतीर तीग आलकी एरी ओगराक एरू इमीन आचेड नाड।
मापोरबून माया पेम आरू चुक इमूंग चेड़ीगेन टोन्ड टोन्डी मेनको।
बेरकेच तो आचा
3 आम्म पोरबू ईसू मसीयालीन बुवा मापोरबून जुवारपूर।
ओडी आय जियोम नोयपीक किली आमूंग पुन्न जेनोमीन चिञ्ञेड।
आ पुन जेनोम तीग आमूंग बेरकेच तो आचा टोन्डोतो।
आ आचा ईसू मसीयालीन चाय्यरान कान तीग मापोरबू जियोम पाटतीकतानूग आम्मोत एञ्ञो।
4 एटे एनोड आम्म काबजेत बाटा आमूंग टोन्डोतो।
आद एतोडी नाचायो आरू नाती चूत पाडायो आरू एतोडी बादलायो आय।
मापोरबू आदीन इमूंग सरग ती इट्टेड नाड।
5 आञ्ञोती एरा,
ईम ईसून बिसवात चाजूरान चेत्तूग,
नीतीक मेन्डान बेरा पूरा पारगाक एरू तायार मेन्डान बाचाकतान इसाब एदारे मापोरबू आपला ताकोतोड इमीन चाकलूराड।
6 इदीन तीग ईम वेड़का एरूर;
एरोड बेले एपोर ओदो दिनेल आर्रे,
बानीग-बानीग तो पोरकूरान इसाबूलीन चेत्तूग,
इमूंग मुर मुरा एरू लागूरा।
7 एटे एनोड नाचरान सोनीन किच ती तुन्दी किली पोरकूरार।
आ सोनीन मोल्लेन ले,
इम बिसवात आगेर मोल्ले तो आय।
आदूग इम बिसवात चेत्ते तो आय एनी पोरकू,
ई आबोड़ूल वेरमोव।
इम बिसवातीन पोरकूरान पिटतेल,
ईसू मसीयाल पारगाक एर्रान वादेक,
इमूंग मापोरबू इजीत तो मान चियी किली पिदीर काट्टीकताड।
8 ईम ईसून चूड़ारी;
एरोड बेले ईम ओनीन चोग चाजूमोर।
आरू एबे बेले ईम ओनीन चूड़ू ओड़ोर नार;
एरोड बेले ओनीन बिसवात चाजूमोर आरू पोक्कू एरा कियाल तो सरग तो वेड़के तीग कोप्पोर नार।
9 एटे एनोड ईम बिसवात चाजूरान इनाम,
इम बीतराम तो जियोमीन बाचाकतानोन पूरा बेटूमोर।
10 इयची बाचाकतान इसाबीन आय,
मापोरबून कान तीग काबेर वेन्नी किली लोगीन पोक चियरान गुरूकूल लेक ती मेन्नी कानची-कानची आरू रेच्चा जाच आडी-आडी मेन्डीर आरू इम कान एदूरान ई माया पेम तो इसाबीन ओर मुन्नी की पोक्की मेन्डीर।
11 ओर कान मेन्डान मसीयालीन जियोम ओरीन पिटतेल मसीयालूग एर्रान डेन्डूल बीतेर ती आरू आ डेन्डूल एर्रान ले पिटतेल ओनूग टोन्डूरान इजीत तो मानीन बीतेर ती पोक्की मेन्डीड।
आरू आद एतोड एर्रा?
आतोड एटे-एटे एर्रा?
एनी ओर पुनूंग कानची-कानची मेन्डीर।
12 तामूंग एरा,
एरोड इमूंग सेवा चाजू आय ओर ई पाटेलीन पोकरीर एनी मापोरबू ओरीन पारगाक मेन्डीड।
आयची एडो पाटा एपोर,
सरग तीग चोटची मेन्डान नाती केचूर चिला जियोमीन कान तीग इमीन वेनपीकतानेर तीग इमूंग टोन्डोतो।
ई पाटेलीन सरग दूतूल बेले रेच्चा चूड़ू लालेच चाजूमेर।
नाती केचूर चिलायेर मेनूर
13 आदूगी आपला-आपला मेन्न तीग एतोड नांग तायार एरी किली,
आरू चोमेन ती मेन्नी किली,
ईसू मसीयाल पारगाक एर्रान वादेक इमूंग टोन्डूरा बे,
आ माया पेमूग पूरा आचा चाजूर।
14 आरू पाटा पातरान पापकूल आकाट मेन्नी,
ईम मुन्नी पूना वादेक चाजूरूर जे?
आ कियाल तो लालेचूल ती बिड़ी मेनमोर।
15 एरोड एटे इमीन कूयूरानेड नाती केचूर चिलायेड मेन्डाड,
आटनी ईम बेले आपला-आपला जाम्मा चेलनूकूड़ूल तीग नाती केचूर चिलायेर मेनूर।
16 एटे एनोड “आन नाती केचूर चिलायेन आय,
आदूगी ईम बेले नाती केचूर चिलायोर मेनूर”a एनी मापोरबून कागेत ती लिका मेन्डा।
17 आरू ईम “ए बुवा”,
एनी बिन्ती जोड़ूमोर जे?
ओड चेकी एराका जाम्मेगी आपला-आपला कामूल तो इसाब ती नियाव चिड़ाकतानूग ईम इना पोर देचेतोर मेन्नी पीयरान वादेक ओनीन मान चियू नारची किली काटाकपूर।
18 एटे एनोड इम बुवेर दादीलेर वादेक ले चेली मेन्डान पोकात रीती रिवाजूलीन तीग इमीन मापोरबू मोल्ला चियी चोड़ाकतेड।
आ मोलयाकतानो नाचरान सोन चान्दी तीग एरा एनी इम पुट्टोर;
19 एरोड मसीयालीन निक्के मोल्लेत नेतीर तीग चान्डाक एञ्ञोर।
ओड नाती केचूर चिला,
चिलाड एके नाती कियाल चिला चाजेन तो मेन्डा पापीन आकाटतेड आय।b
20 ओनीन मापोरबू मोंजीपूर उपजूरान ले बेले मुन्नीत ले पुन्नी मेन्डीड,
एरोड एपोर ई दूनाल तो चेरा चेरी वादेक,
इम चेत्तूग ओनीन पारगाकतेड।
21 आरू ओनीन चाय्यरान कान तीग जियोम पाटतीक किली इजीत तो मान चिञ्ञेड।
ओन कान तीग,
ईम मापोरबून पातीयाकतोर।
आदूग इम बिसवात आरू आचा मापोरबून कान मेन्डा।
22 ईम मापोरबून चेत्त पाटेलीन मान मानी इम जियोम ती ओगराक एरमोर।
आदूग एपोर ईम चेत्ते बिसवासी लोगीन चोग चाजू नाम्बीकतानूग आपला गेरोब तीग ओकूरीन ओकूर आदीक चोग चाजूर।
23 एटे एनोड ईम चामरान इसाबूल (वित्तील) तीग एरा एरोड एतोडी चाम्मा इसाबूल (वित्तील) तीग,
जियोम चियरान आरू एतोड नांग मेन्डान मापोरबून पोद्द तीग पुन्न जेनोमीन बेटोर नार।
24 एटे एनोड
“जाम्मा लोग लाटेल आकाटतेर आय,
आरू ओर जाम्मा चाबावूल लाटेल तो पूवूल आकाट तोव आय।
लाटेल वेट्टी किली पूवूल ईल चेन्डान आकाट लोगीन चाबावूल गो नाच चेन्डाव।
25 एरोड पोरबून पोद्द एके जुग जुगूग बेरकेच मेन्डा”
आरू आयची एडो पाटेनी आय इमीन वेनपीक मेन्डीर।