तितू 2

चेत्त देरोम तो पाटेलीन मेरचीक

1 एरोड ईन चेत्त देरोम तो पाटेल ती बिड़रान इसाबूलीन मेरचीकपारे मेन। 2 मुत्ताकेर चोमेनतेर आरू आवूर लोग तामीन इजीत मानूरान बातेरतेर मेनकेर आरू आपलेनी सामालपेकेर आरू ओर बिसवात ती, चोग ती आरू आबोड़ूलीन सामालतान ती मोंजीबूत मेनकेर। 3 आटनी मुरताचील चेला बूलेल ती केचूर चिलाका आवूर लोग तामीन इजीत मानूरान आकाट मेनकोव; आव लोगीन निन्दरूरानोव आरू मातवारूल मेना मेनकोव। एरोड आव नातो रेच्चाट आय आदीन मेरचीकपोकोव। 4 तेबे गो आव जुवान आयचीलीन, ईटे चोमजाक किली आरयान एरीक नाम्बीकताव: जुवान आयचील आपला-आपला माईडीनोड आरू पापकूलोड चोग ती मेनकोव, 5 आरू आपलेनी सामालतानोव, केचूर चिलायोव, ओलेक तो बुतेल चाजूरानोव, पेम चाजूरानोव, आरू आपला-आपला माईडीन काबजे ती मेन्डानोव मेनकोव एनी चोमजाकताव। तेबे मापोरबून पोद्दीन एडी निन्दरारा। 6 आटनी जुवान माईंड चिन्डीन बेले आपलेन सामालची किली मेन्डानो आय एनी ओरबोर एरी चोमजाक।

7 जाम्मा पाटेल ती ईनी कुदे रेच्चाट कामूल चाजी किली पाव टोटीकतानेड मेन। आरू ईन मेरचीकतानोव चेत्तेतोव आरू मानूरान बातेर तोव मेनकोव। 8 आरू आव बोदी चियू ओड़ा मोंजीबूत तो पाटेल मेन्डानूग, विरूदीकूल आम्म कान नातेली कून्दील कान्डूक ओड़ा कान्डूग लाज पाडेकेर।

9 कामीयालेर जाम्मा इसाबूल ती आपला-आपला सावकारीन काबजे ती मेन्डानो आय; जाम्मा पाटेल ती ओरीन वेड़का चाजूरानो आय; उलटा-उलटा ऊबूरानो एरा; 10 आरू नाती नी डोंगरानो एरा, एरोड जाम्मा टिटाक ले पूरा बिसवात चाजू एर्रान बातेरतेर मेनकेर। तेबे ईटे चाजूरानोन चूड़ी किली लोग आमीन बाचाकतान मापोरबून देरोम तो पाटेल चाबाव तोव एनी मेन्न चाजूरार।

11 एटे एनोड मापोरबू ईसू मसीयालीन मोंजीपूर ती चोटची किली, जाम्मा लोगीन बाचाकतान इसाब तीग तान्न माया पेमीन देका पाटतीकतेड नाड। 12 आरू ओड आमीन, आम मापोरबून बिसवात चाजायोन आरू मोंजीपूर तो इसाबूलीन लालेच चाजूरानोन चाय काड्डी किली, ई जुग ती आपलेनी सामालची किली, देरोम तो आरू मापोरबू मेन्न चाजूरान बोकतीत जियोम पीयरानेर मेनूंग आरयान एर्रानेर एरीकताड। 13 आरू आम, आम्म आसतीर तो आचेग पाव चूड़ चूड़ी मेनमोम। आद नाताय एनोड: आम्म बेड़तो मापोरबू आरू आमीन बाचाकतान ईसू निरबे रेच्चाट चाबाव तीग मेडूरान रेग देका पाडरानो आय। 14 ओडी आय आमीन जाम्मा बानीत ओदेरोमूल तीग चान्डाक आरू ओगराक किली तानूंग रेच्चाट कामूलीन रेच्चा मेन्न लागाक किली चाजू, आलवाल एर्रान ओक जातीतेरीन तान्न लोग नीतीक, तान्न जियोमीन बेले चिय काट्टेड। 15 ई पाटेलीन मेरचीक; उचांग चिय आरू जाम्मा पान्न तीग कावडू। एडी ईन जुवान मेन्डानोन इनमान चोमजा मेनकेर।